26-Serchhip Constituency leh 2018-a MLA Candidate te bihchianna-II

- Laldinpuia

Serchhip Biala ding tur candidate te bihchianna:

Serchhip Biala Party hrang hrang leh Independent Candidate te hi a mimalin han bihchiang thuak thuak ta ila, 

VANLALRUATA hi PRISM President a ni a, PRISM Party Ticket in a ding a. PRISM hi sawrkar khalh ngiltu langsar tak annih avangin mipui te hian kan hre lar viau mai a, amaherawh chu party dang anga Unit system a kal lova a pumpui huapa Campaign tawp mai an nih avang hian hetiang hi mipui te hian kan hrethiam lo deuh niin a lang a, amaherawh chu an hnathawh tawhte leh an manifesto thlir chuan tling thei se chu kan ram tan chhenfakawm tak chu an ni ngei ang.

KAPLIANA PACHUAU hi vantlang thila inhmang tak, mahse Politics lamah erawh tawn hriat nei lemlo a ni a. Serchhip ZPM-a an khaipa leh a boruak siamtu ber anih reng laiin tunhnaia Mizoram ina a la hmelhriat ngai loh bu rawn khuar thar National People’s Party (NPP) hmingin a rawn ding thut mai a, he Party hian Serchhip-ah unit an neih awm hriat a ni lova, a phur zual thenkhat ten theihtawpin hma an la mai niin a lang. Hetiang chunga tlin chu thil harsa tak chu a ni ngei ang. Amaherawh hi chu ani hi Serchhip Bial chhunga mi in candidate awmchhun anih avang hian an campaign naa Serchhip Cosntituency mi leh sa a nihna an hmachhuan hi mipui te rilruah a tlak fuh viau chuan an che tha viau thei bawk.

C LALRAMZAUVA hi Serchhip Bialah hian a ding ngun tawh viau mai a, ZNP Ticket in a ding hmasa ber a, a hnuah MNF Ticket in a din chhunzawm leh ta a.  Tun tumah hian MNF Party hi an thawm a lian khawp mai a, sawrkar ngei ngei turah an inngai niin a lang a, hei hian tun inthlanah hian an party tan remchanna tam tak a siamsak niin a lang. Hei hi Pu Zauva hian a vanneihpui dawn em tih hi mitam tak thlir dan a ni. Kumin hi MNF Party that ber kum leh candidate an set fuh ber kum tih hi mi tam tak ngaihdan a ni a, hemi chung pawha a tling zo lo anih chuan term dang zel ah chuan beisei tur a vang tawh viau mai thei.

LAL THANHAWLA hi Congress President leh Mizoram Chief Minister nilai a ni a, campaign hran lo mahse mihlun a nihna leh a dinhmun hian mi tam tak chu a hip nghal mai thei. Serchhip Bialah hian Term 7 lai mai thlantlin a lo ni tawh a, hei vang hian mi hlun tam tak a nei tawh tura ngaih a ni. Amaherawh chu an hruaitu thenkhat te chhuah avang leh mipui tehnkhat teah sawrkar lai mek duhkhawplohna lian tak a awm niin a lang a, hei hian an dinhmun a tiphet deuh angem tih erawh hunin a la hril ang. Sawrkar lai anih avang erawh hi chuan candidate dang te aiin hun remchang leh hman tangkai tur tam tak a nei niin a lang.

ZAICHHAWNA HLAWNDO hi Zoramthar Movement rawn vawrhchhuaktu hi a ni a, tun tumah hian Serchhip ah a vawi khat nan a rawn ding dawn a, anni hi Political Party annih loh avangin Independent in a ding dawn a, tling tur chuan beisei a sang lo viau mai thei. Amaherawhchu Pathian thu hmanga ding anga an inchhalna hian Kohhran mi tam tak chu a huikhawm thei mai thei. Thahnem ngai takin tan an khawh niin a lang a, amaherawh chu party dang angin Public Meeting leh Rally lampang hi an phur pui tehchiam lo a nih hmel, mi tam tak rilru hneh tum aiin anmahni mi leh sa tlem te nen hlim taka hun hman lam hi an tuipui zawk em aw? Tih hi ngaihdan awm thei a ni.

LALDUHOMA hi ZNP hotu leh dintu a ni a, a chanchin hi mi tam tak chuan kan hria a kan ngaisang ru hle niin a hriat. Amaherawhchu pawn lama kan faka kan ngaihsan viau lai hian party politics lamah erawh chuan amahah rinna kan la nghat ngam lo deuh niin a lang. Tun tum Election-ah hian a Party ZNP dah thain ZPM hnuaiah Indpendent in a ding dawn a, ZPM ah hian ZNP, MPC leh ZEM te an inchhungkhawm a, Neutral tam tak hian an support bawk niin a lang. Hetianga an tanrual theih chuan sawrkarna siam tur pawh hian chance tha tak an nei niin a hriat.

LALCHUNGLURA hi BJP Ticket in Serchhipah a ding dawn a, Serchhipah erawh thawm an la neilo hle. Chuvang chuan tlin tum vanga ding ni lovin engemaw chhan dang avanga ding ve satliah mai mai a ni berin a lang. A tlin a rinawm lo mai ni lovin Serchhip Bialah chuan BJP te hian tun dinhmunah chuan chance an neilo niin a lang. Amaherawhchu tunah hian kan ramah hian BJP hi a chhia tinreng kan hmehbel emaw tih mai tur a ni a, hei hi anmahni thatlohna lam aimahin party lehlam ten remchangah lain anmahni an tlin theih nan thiam taka mipuite BJP haw tura min fuihna a ang mah zawk.

Engapawh nise, candidate te chanchin leh an tlin leh tlinloh thu rinthu a sawi vak ai chuan VOTE khan thil a tithei zawk a, an hausak leh rretheih lam emaw, thlantlin tawh an nih leh nihloh lam ni lovin tun tuminthlana Vote hmu tam ber kha tling a puan tur chu a ni mai a, chuvang chuan VOTE hi a hlu hle a ni tih hriain mipui ten fimkhur takin tunhnaia min tilawmtute chauha thlir lovin kum 5 chhunga kan Constituency min enkawltu tur an nih tih hrechungin VOTE i thlak theuh ang u.