Van thleng phak rawngbawlna

Rom 12:2 : He khawvel dan ang hian awm suh ula; Pathian duhzawng, a tha leh lawm tlak leh, that famkim chu in hriatfiah theih nan, in rilru a thara awmin lo danglam zawk tawh rawh u.

Philippi 3:20 : Keini zawng van khua leh tui kan ni si a, van atanga min chhandamtu Lal Isua Krista lo kal tur chu nghakhlel takin kan thlir a ni.

Van thleng phak rawngbawlna | Laldinpuia

He khawvela ringtu tena Pathian rawng kan bawl a amah kan zui nachhan ber chu nakinah Vanramah kan thih hunah kan la thleng dawn tih kan rinna vang a ni. Hemi avang hian he khawvelah theihtawp kan chhuah a, kan phak ang tawk tawkah Pathian rawng kan lo bawl ve thin. He tih lai hian phak ang tawk tawka rawng kan bawlna hi van mite tana lawmpuitlak a ni em tih erawh ngaihtuah chian a ngai ta khawp niin a lang.

Mizo te hi Kristian kan ni a lawm tih ringawt ah hian kan lugawi rei ta hle mai. Lal Isua a hming chauha ring a zui peih silo ringtu kan ramah kan tam ta lutuk hian harsatna min thlen mek a ni. Lal Isua ringtu inti nazawng hian Van ram an thleng dawn lo. Hei hi amah Lal Isua ngeiin chiang takin a sawi a ni (Matthaia 7:21). Hetiang anih avang hian tunlaia ringtu te hian kan rinna hi kan enfiah a, Pathian tana kan rawngbawlna hian Van a thleng phak a ngem? Chawngheia tihtak zeta kan tawngtaina hian Pathian lalthutphah a thleng phak em? Pathian duhzawng a ni em? tih te hi kan ngaihtuah chian a tul ta hle mai.

Kan ram Kristianna han thlir ila. Mizoram hi a ram len zawng ngaihtuah chuan khawvela Kristian tamna ber leh Kristian pawl hrang tam na ber kan ni hial ang. Mahse chuti chung chuan kan ram inrelbawl dan diklo leh eirukna nasat zia hi hahipin kan sawi kan sawi bawk si. Kan ram rorel khawlah a tam zawk chu Kohhran upa an ni a, mahse kan ram inrelbawlna chuan Kohhran duhloh zawngin hma a la chho mek zel chu anih hi. Kan ram hruaituten Bible chang innghahna atana hmang siin dawtin mipui min bum a, Kohhran kalhin hma an la a, a siamtha turin Kohhran hruaitute an ngen leh bawk si. Hei hian kan rama Kristianna kan kalpui dan dik tawkloh zia chu a hril chiang hle a ni. Van nun nena inzawm ringtu, Lal Isua rin mai duhtawk lova a taka zuia nunpuitu ram hruaitu kan mamawh ta hle a ni.

Kan Kohhran rawngbawlna hian van a thleng phak em? Kohhranah theihtawpin kan inhmang a, a kul a taia tangin thahnem ngai takin kan bei ve a, hetih lai hian kan rawngbawlna hi Lal Isua duh dan a ni em, Van a thleng phak angem? Tih erawh kan inchhut ve fo a tul awm e. Kohhran rawngbawlnaah te hian theihtawp chhuah ve thin mah ila kan thahnemngaihna te hian Van a thlen phak siloh chuan a pawi dawn em a ni. Chuvang chuan rawngbawltute, Kohhran member zawng zawng te hian Kohhran rawngbawl hna kan thawh naah hian Lal Isua duhdan kan zui em? Tuna ka hmalakna hian thlamuanna min pe em? Midang te ah Lal Isua hmel a chawimawi em? tih te ka inchhut fo a tul a ni. Kohhran rawngbawltu nih chak em em, hruaitu dinhmuna din loh chuan vui mai, Kohhran a chanvo neih loh chuan hnungtawlh mai thin ringtu kan nih chuan kan rawngbawlna hian Van a thleng phak ngai lovang.

Kristian Thalai Pawl rawngbawlna hi Io thlir zui ila, enge kan rawngbawl chhan? Enge KTP a kan phur em em nachhan hi tih han inzawt ta ila, kan chhan dan a dang fur mai thei a ni. Thalai te tan chuan KTP rawngbawlna hi chanvo pawimawh tak mai ni. Kan that lai hun leh vanglai te Lal Isua duh dana hun hman hi a nuam a, a hahdam thlak bawk a ni. Chutih lai chuan kan rawngbawlna hi Lal Isua duhdan a ni em? Van a thleng phak angem? Tih erawh kan inngaihtuah ve fo a ngai. Pathian tihna tak tak nei lova KTP a inhman hi inhman tui a har khawp mai, KTP rawngbawlnaah hian Pathian duhdan aia mahni ngaihdan lo dah pawimawh hi a lo awl khawp mai. Hemi kawngah hian kan fimkhur a ngai hle a ni. Kan rualpui te keini aia dinhmun sang an han chan hlauh te hian thik a awl khawp mai, tin activities a kan hming a lan ve ngailoh te, Branch aiawh tur thlanna vela a chuang zinga han tan reng bik te hian vui mai a awl, Kohhran in KTP duhdan nilo deuha a rorelna a puanchhuah te hian vuivai mai a awl leh zual. Heng zawng zawng hi mahni thahnemngaihna rawngbawlna a ni a, heng hian Van nun a kenglo a ni.

KTP te hian kan rawngbawlnaah hian dawhtheihna te, teirei peihna te, engkima lungawi zel nun neih te hi kan zirchhuah tel a ngai a ni. Hruaitu kan nih avanga member te rim taka an thawh laia thuthluang chunga lo thlir mai mai tur kan ni lo. Member kan nih avanga hruaitute phut em em tur pawh kan ni lo. Keimahni theuh kan rawngbawlna leh kan rawngbawl chhanah chiang ila, Van nun nena inzawm in nung ila. Tirhkoh Paula’n a lo sawi thin ‘Engkimah lungzawi zel theihna nun’ hi kan nei ngei ngei ang.

Harsatna tawklo rawngbawltu kan tam lutuk hian kan Kristianna ti a tidal mek zawk a ni. Kan rawngbawlna kawnga harsatna kan tawh thin te hi a pumpelhna zawn ai chuan a kaltlang dan/a hmachhawn dan ngaihtuah ila, chu chuan kan rinna kawngah min thanlen tirin Van nun min temtir ngei ang.

KTP member te hian KTP tan theihtawp i chhuah zel ang u, Kohhran kut ke ni turin theihtawp i chhuah zel ang u. Kan rawngbawlna hian Van thleng se la, kan memberpui te thik leh sawisel tawk chauhva rawngbawl lovin, Kohhran upa thing titawk chauhva rawngbawl lovin, ‘Engkima lungawi zelna nun’ neiin Van nun nena inzawm, Van thleng phakin rawng bawl ila. Kan ti ta sa sa, kan hun kan pe ta sa sa, Kohhran leh a rawngbawlnaah hian tihtak zetin Lalpa rawng I bawl thar leh ang u.

He khawvela kan awm chhung hian he khawvel dan anga awm mai mai tur kan ni lova, he khawvelah pawh Pathian duhzawng ti a, atana nung tura siam kan ni. He khawvel hi kan kumhlunna tur a ni lova, he khawvel ami kan nilo. Keini chu van khua leh tui, chatuana chhe thei tawhlo chawlhna in neitute kan ni. Tunlai khawvelna Pathian rawngbawl hming pu si Pathian duhzawng ti silo te, thahnemngai tak si, mihring lama an thahnem ngaihna tawp ta tlat te an awm thin, heng zawng zawng hi hnawl ila, keini van khua leh tui te hi chuan van thleng phakin tihtak zetin Lalpa rawng i bawl ang u.

He leia Kohhran hi Van Kohhran nen a inzawm kan ti thin. Chutiang bawkin a Kohhran rawngbawlna hi Van Kohhran rawngbawlna nena a inzawm theih nan tihtak zetin Lalpa rawng i bawl thar leh ang u.

02-12-2017

(NOTE: Ni  4.12.2017 zan Serchhip Hmar Veng Branch KTP Inkhawma ka thusawi)