PC Bawihthanga Chanchin (1952-2017)

 PC Bawihthanga: Kum 1952 Good Friday bawr velah khan Bawibanga leh Lianchhingi te inkarah Sialsir khuaah alo piang a, a pa hi CID hnathawk a ni. Pastor Saihnuna kutah Baptisma a chang. A nu leh pa te hi an inneih rei loh avangin pianpui unau dang a nei lova, a nu ina a hrin a unau dangte chu heng te hi an ni –

1) Hmangaihi w/o India, Republic Veng, Aizawl

2) VL Thanga Hmar w/o RK Lalrinpuii, College Veng, Aizawl

3)H. Lalrinmawia w/o C. Lalbiakengi, Tuikhuahtlang, Aizawl

Kum 1976-ah Upa K. Laibata fanu Rohmingliani nen Upa C.Petera kutah an innei a, kum 1976 khan an fa hmasa ber hmeichhe lo piang chu a pian tirh teah a boral a. A hnua fa 3 nei lehin heng hi an fate chu an ni -

1)     Kapliana Pachuau (1978)

2)     Rev PC Nghaklianmawia (1981)

3)     Laldinpuia kum (1983)

 Hemi bakah hian fanu pakhat Zoramhmangaihi a nei bawk.

A fate:

            Kapliana Pachuau hi Lalropuii nen inneiin fa 3(Mipa 2 leh Hmeichhia 1) an nei a, tunah hian Serchhip Times Chanchinbu Editor leh neitu a ni. Hmar Veng Br YMA-ah Vice President a ni a, Serchhip District Boxing Assn-ah Sr Vice President a ni bawk.

            Rev PC Nghaklianmawia hi Jenet Lalnunhlui nen inneiin fa mipa 2 an nei a, Mizoram Synod hnuaiah Pastor hna thawkin kum 7 chhung Nepal ramah Missionary Pastor in a awm hnuah, tunah hian Bangalore hmunah M.Th a zir zawm leh mek. Lehkhabu 5 vel a ziak tawh.

            Laldinpuia hi Lalfamkimi nen inneiin fa mipa 2 an nei tawh a, tunah hian Presbyterian English School Serchhip-ah Principal hna a thawk a, Govt Serchhip College ah Assistant Professor(Part-time) in a thawk bawk. SEDAL leh District Consumer Association-ah Secretary a ni mek. Lehkhabu 3 a ziak tawh.

            Zoramhmangaihsangzuali hi Lalpekliana nen inneiin fa 4 an nei tawh a, tunah hian Dungtlangah an khawsa mek.

A mizia:

Amah hi thian kawm nuam ti tak mi a ni a, thian te thu hnial ngailo leh mi pawisawi lo, amaherawhchu midang vengthawng vak lemlo a ni, ama veizawng te chu midang te thu ngaichang lemlo pawha tawng chhuak phawng phawng mai thin a ni a, hemi kawngah hian mi huatthu te pawh a sawi palh hial thin mai thei. Dikna duh mi a ni a, dik ni a a hriatah chuan midang vengthawng hauh lovin huaisen takin a dikna chu a auchhuahpui mai thin. Mi hlim thei tak, zaidam lutuk lo, thenawm khawvengte tana hnawka awm hlau tak a ni, mi thuhnuaia awm hreh mi tak a ni bawk.

Kohhran lamah pawh a phak ang tawkin a inhmang ve thin a, Sunday School kaikim lawmman hi a la ve fo thin. Ramthar/Building leh Kohhran hnatlangah te a theih phawt chuan thawh tum mi a ni a, Ramthar Missionary chawmna, Building Budget leh Krismas ruai thawhlawm te pawh taima takin a damloh hma zawngin a lo khawn ve thin a ni.

Hnathawh lam:

A pa hi police a tang thin a ni a, a pa quota hian Police ah a lut a, amaherawhchu amah hi mi thuhnaia awm(khuahkhirhna hnuaia awm) duhlo mi anih avangin Training laiin Training tluan peih lovin a thianpa nen an bansan a, hemi atang hian police a tan chakna a nei zui ta lo a ni. Kum 1968-ah Zoram Buai lai khan MNF Hnam sipai te puibawmtu Runner-ah a tang thin. A hnuah Hnam sipaiah hian rammu vein China rama training tura kal te zingah a tel ve a, amaherawh chu eng engemaw harsatna avangin china ram tak hi a lut thei talo a ni.

 

Lo neih hi a eizawnna a ni a, hah takin lo vatin a enkawl zui thin a, amah hi mi chak tak anih avangin hnathawh hi nuam a ti em em a. In a awm mai mai te hi a thiam lova, chu ai chuan ramah te riakin a tul ang ang hna a thawk mai thin. An nupa hian ram lamah hian an kal deuhreng mai thin. Kum 2000 chho vel atang khan tuna Hmawngawn kama huanram hi a enkawl tan a, a hnuah Sangha dil te siamin tunah hian Sangha dil 3 lai a enkawl nghe nghe a ni. Sangha dil hi a tuichilh hle mai a, Sangha dil a enkawl atang hi chuan thildang a rilruah a awm hman meuh lo. Ruah a sur tam deuh chuan a hnathawhnaah chau deuh pawh nise Sangha dil tuilak en turin ram lamah ruah sur hnuaiah pawh a kal mai thin.

Nepal-ah:

Kum 2012 kumtir lamah khan a fapa Rev PC Nghaklianmawia, Pastor a a thawhna hmun Kakarvitta, Nepal-ah an nupain a fapa naupang ber Laldinpuia’n a zinpui a, thla khat vel lai an zuk thang. Hemi tum hian Nepal ram khawpui ber Kathmandu leh khualzin ho tlawh thin an khawpui pakhat Pokhara te pawh an fangkual nghe nghe. A chak em em thin Thlawhna, Rel leh Lawngah te a chuang a, nuam a tiin a hlim hle a ni. 

Cancer!

Kum 2016 kumtawp atang khan insawiselna deuh a nei a, amaherawh chu damdawi lama in entir chuang lem lovin nachhawkna te a ei a, a dam veleh mai bawk a. Kum 2017 kumtirah Damdawi inah in entirin a thisen chi hrang hrang te exam a ni a, Jan 25 khan Doctor chuan a natna chu Cancer ni ngeia a ngaih thu a sawi. Jan 26-ah Sangha Dilah chhungkaw picnic neih a ni a, a tuk Jan 27-ah Aizawl lamah te kalin Ultrasound leh CT Scan te an zuk ti leh a, Jan 31 chhunah CT Scan result enin Doctor chuan Chuap Cancer a ni ngei a ni tih a sawi a. Hemi ni la la hian amah pawh a natna hi hrilh nghal a ni.

            Tiang a Cancer a ni tih hriat a lo nih takah chuan theih ang angin enkawl a ni a, a tirah chuan Chemo lak hi a duhlo a, amaherawh chu a hnuah Chemo khai chu tha zawkin hriain a duh leh ta zawk a. Tichuan Zemabawk Cancer Hospital-ah Chemotheraphy chu lak a ni ta a ni. Cancer a vei a ni tih hriat hlim hian a rilru kal peng tur ven nan theihtawp chhuah a ni a, Pastor leh Counsellor te panpui a niin anni hnen atang hian thlamuanna thu tha tak tak a ngaithla a, hei hian a natna tawrh chungchangah pawh a chhawk zangkhai hle niin a lang.

            Tichuan theih ang angin enkawl chhoh zel a ni a, September thla tir atang khan a hritlang awmna vel chu a chau deuh tan a. Sept 8 tlaiah Damdawi inah dah a ni a, Trauma Bed no 6-ah dah a ni a, Sept 15-ah Damdawiin a tangin a chhuak. Oct 22-ah Damdawiinah a lut leh a, Trauma bed no 1-ah a awm a Nov 2-ah a chhuak leh. Nov 8-ah Damdawiinah in dahluh leh a ni a, Traumna Bed no 8-ah a awm, a hnuah Bed no 6-ah insawn a ni. Ni 17 Nov-ah Trauma atangin Cabin Ward no 2-ah insawn phei a ni. Ni 20.11.2017 ah Cabin No 1 ah insawn leh a ni.

            A fapa Pastor hna thawk mek rawngbawlna hi a hlutsakin a ngai pawimawh thiam hle a. Induction service a a telpui loh pawhin a fapa awmna bial hi remchang hmasa ah a hmuhpui hram hram thin a. A fapa hnenah pawh hian, "I rawngbawlna hi ngai pawimawh ber la, kei chu min ngaihtuah suh. Isua ta ka ni alawm, ka ngaihtuahawm loh, keimah avang chuan rawn haw chhoh pawh a ngai lo," tiin a fuih thin. A fapa in a damlo kana a rawn haw tum a, an inthen dawn(ni 20.11.2017) pawhin, a taksa chau avanga tawng harsa ti tak chungin fiah tha takin, "Min ngaihtuah reng reng suh. I zirlai kha tha takin zuk zir la, kei chu ngaihtuah ka ngai reng reng lo, hei, kei chu heti hi ka ni ta a. Isua ta ka ni tawh a, chuvangin ka ngaihtuah awm loh, thlamuang takin haw thla rawh," tiin rilru dam takin a thlah nghe nghe a ni. A fapa nen hian a tawng that theih lai pawhin phone hmangin an inbe fo a, Pathian thu te an sawi thin a, a fapa hian Pathian thu hmangin a rawn kawm thin a, a fapa in phone atanga a rawn tawngtaisak laite chuan mittui tla zawih zawihin a lo 'Amen' a. Kohhran leh Pathian tan a hun tam zawkah thahnem lo mah se, a hun hnuhnung lamah chuan a natna zarah Pathian nena intawhna tak tak a lo neih phah ta a ni. "Keinin vanduainaah kan ruat, a hmangaihna lantirtu" tih kha a nunah a lo thleng dik ta a ni.

            A natna chuan zual lam pan zelin ni 25.11.2017 Zan Dar 8:00-ah Serchhip Hospital Cabin Room 1 atangin a khawvel zinkhawng chu a lo zawh tawp ta a ni.