Kei heta hi ka awm mi tir ta che

He kan India ram ropui takah hian khawvela mihring hmun sariha thena hmun khat vel zet kan cheng a (1.324 billion in 2016). Heng zingah hian Kristian ni a inchhal te chu mi maktaduai 24 lek kan ni, a percentage ang zawnga chhut phei chuan 2.3% lek kan nih chu. Khawvel ram ropui ber te zinga chhiar tel chhoh mek India rama hetiang zah lek Kristian kan awm hi, a zahthlak a, a tlawm thlak hle zawk a ni. Kristian te tan thawhtur a tam hle mai.

Kan ram roreltu Narendra Modi-a sawrkar lah chuan Kristian sakhua nuaibo tumin tan an khawh nasa si a, Hindutva te an ti a, RSS te an ti. BJP a ruh zual te chuan India ram hi Hindu lalram a siam tumin tunah hian theihtawp chhuahin hmun hrang hrangah bu an khuar mek zel a ni, kan Mizo te zingah ngei pawh hetiang lama sawi kai kan nei tan ta, Mizo te zingah Kristian nunphung aia Hindu sakhaw kalphung sawimawi zawk te pawh kan awm tan ta zeuh zeuh. Hetiang anih lai hian Kristian te tan chuan awm mai mai na chi a ni ta lo, kan Lalpa tana theihtawp chhuaha tan kan khawh ve hi a tul ta takzet a ni.

India ramah hian chanchintha hril hi Kohhran hrang hrang ten kan bei mek a, hma pawh kan sawn hle, kumtin ringthar pawh kan neih chhoh belh mek zel a ni. Chutih laiin a dera rawngbawltu kan awm thin hian mintithuanawp leh thin. Tunlai khawvelah chuan Pathian rawngbawl te hi inhlanna tellova eizawnna anga thawk te pawh kan awm ta nual awm e. Hei hian ringlote mithmuhah Krista hmel a tibal fo thin. Chutih lai chuan Lalpa tana thawktu tur(Missionary) induhthawh erawh a na viau lawi si. Missionary hna hi hna zahawm leh hlu a ni a, khawvel ina a hlutna a hrilhfiah zawhloh, khawvela chawimawi nachhan tur awm lo, mahse khawvel lehlama chawimawina lallukhum dawngtu tur te an ni. Anni tan chuan khawvel hi kumhlunna hmun tur a ni lova, insawhnghehna hmun tur a ni hek lova, khualzinna hmun mai a ni. Sum leh pai ngah leh Bank Account-a pawisa tam tak khawl an mamawh lova, an ro hlu chu LALPA a ni. In leh lo tha leh incheina mawihnai an lungkham lova, an incheina chu KRISTA a ni. ‘Khawvel hi bo mahse, Isua ka nei’ titute an nih avangin he khawvel khawsak lungkhamnain a tibuai phak lova, an tan chuan nikhat hreawm a tawk a, a tuk lola awm tur chu Pathian kutah an dah mai a, lungawi takin neih nei lovin, engkim neitu nei siin an awm mai thin. Heng mite tan tluka khawvela dinhmun hahdamthlak hi a awm tawh kher lovang. An nunna chu thi turin a inpeih a, an harsat leh tawrhna chu an chhelna hmanrua a ni a, an lei taksa thihna chu an nunna tur a ni thung si.

Hetiang anga hna hlu leh zahawm, ropui thawk tur chuan Pathian nena inpawlna nun, inpekna tak tak neih a ngai hle, pawngpaw basangam ve ngawtna chi a nilo. India rama Krista Chanchintha hrilna tur rawngbawlna tam tak hmachhawp awm mekah hian Pathian tana mahni inphat thei te tan chuan Missionary a kal hi he khawvela Pathian tana kan inpekna vawrtawp remchang tak a ni. Tunah pawh hian Synod Mission Board lam chuan Missionary hna dilna a hawng lek mek a. Hetiang lama rilru lo seng tawh thin, Pathiana inpumpekna tak tak nena rawngbawl duh leh inpe thei te tan chuan mumang danglam tak neih kher emaw, inlar hmuh emaw ngai kher lo pawhin mahni chhia leh tha hriatna inpekna atangin ‘Kei heta hi ka awm, mi tir ta che’ ti a Missionary hna hi dil ve mai tur a ni.