Party aiin a ram leh a felna

Mizote hi hnam fing tak, mahse kaihhruai nuam tak leh kan duapna lai hre fuh tan chuan khawikipah pawh kaihhruai theih mai kan ni awm e.  Kristian ram kan ni a, Kristian sakhaw thu leh hla chu kan ram chhungah na na na chuan khawikipah pawh ngaihven leh ngaihsan a hlawh thin. Chutih lai chuan sawrkar inrelbawlna kawngah erawh kan fail chiang hle. Kum 1987 Feb 20-ah State a hlankai kan ni a, khami atanga tun thlengin sawrkar tha, mipui te sawrkar leh ram leh hnam dinchhuahna thlentu sawrkar hi kan la tawng lo niin a lang a, a pawi hle mai. Hetih lai hian India sawrkar hi Democracy a ni a, mipui te din leh mipuite vanga awm a ni a, chuvang chuan sawrkar tha kan neih theihlohna chhanah hian mipui te hian mawh phurhna lian tak kan nei a ni tih kan hriat a tul khawp mai.

            Kan sawrkar kalphung kan duhkhawplo a, sawrkarna chelhtu party te kan sawisel a, hetih lai hian keimahni mipui lam hian kan tihtur kan ti em? Keimahni lam hi kan dik em? tih pawh hi kan chhut ve a ngai khawp mai. Mizorama mipui za zela 99 vel zet hi chu Kohhran a telna nei/ Kohhran member kan ni awm e. Chutih lai chuan sawrkar tha kan nei theilo kan tih fo chuan Kohhran member te hian kan zir tawklo tihna a ni thei angem? Kan Kohhran awmna a diklo nge, kan rin Pathian a dik lo zawk, nge keimahni kan rinawmlo zawk? Ngaihtuah chian a tul ta hle mai.

            Kohhran mite hi BIBLE ina Kohhran mite awmdan tur a sawi ang hian nung ila chu sawrkar tha hi kan beisei ngai lovin kan nei maiin a rinawm. Kohhran mite hian kan zirlo a, keimahni hian kan ram leh hnam tlukchhiat mek naah hian mawh kan phur tih hi kan pawm ngam a tul khawp mai. Pathian thu aiin kan party hotute thu leh hla kan zawm a, Pathiana rinawm aiin kan party ah kan rinawm a, a ram leh a felna zawng hmasa lovin kan chhawr theih tur party leh keimahni chhungkaw inhaivur theihna tur kan zawng zawk a, hei hian pawi nasa tak a khawih a ni. Mi thalo kan tih ngei ngei pawh VOTE lo ngamlo khawpin party kan ruihchilh a, chu chuan kan ram a tichhia a, hlemhletna leh eiruknain hmuhtheihna min chimbuai ta a ni.

            Kohhran mite hi party a rinawm ringawt lovin kan ram leh hnam ah chiang ila, kan ram leh hnam tana tha tur anih chuan kan party awmna ami anih loh pawhin VOTE mai ila, party a rinawm aiin Pathian leh a Kohhranah rinawmin Pathian leh a Kohhran duh danin VOTE thlak ila, chu chuan min la siam tha thei ang. VOTE thlak thin zawng zawng te hian VOTE kan thlak dawn hian party a vote lovin a ram leh a felna, Pathian leh a Kohhran ho tana tha tur, kan ram leh hnam dinchhuahna tur i thlir hmasa ber thin ang u. Kan chhawr theih tur Party ai chuan kan ram leh hnam dinchhuahna thlen theitu tur party zawm ila, kan chhungkua ina kuttling lova sum kan lakluh teuh teuh theihna tur mi VOTE ai chuan kan thawhchhuah te a dik taka kan tihral a, keimahni mai nilo midang te pawh ina an chhawr theih tur roreltu thlang thiam ila, chu chuan tuna kan ram rum mekna hi a chhanhim ang a, party mi leh sa inhaivur avanga diklo taka thiltih hi a bo tawh ang a, chu chuan kan ram leh hnam mai bakah Kohhran hi Pathian khawpui ti a miten an sawi theihna turin a thian thianghlim leh thei ang. Chu beiseina chu thlirtu i ni ve anih chuan DIKNA nen tun atang hian hma lam i pan beuh beuh ang u. 1/11/2017

 | Laldinpuia