Engvangin nge Serchhipin Gas kan harsat em em?

Nikum(2016) atang tawh khan Serchhip hian Gas harsatna hi kan tawk zauh zauh a, kuminah phei chuan kan harsa ta hle mai a, Mizoramah a harsa ber pawl kan ni mai awm e tihtur khawpin kan harsa a, hetih lai hian Serchhip tena Gas kan harsat chhan leh vangah inpuhmawhna a tam hle mai a, a then chuan Manager chak loh vang a ni te an ti a, thenkhat thung hian Congress sawrkar chakloh vang a ni, te an ti a, a then chuan kawngchhiat vang a ni/a phurtu motor awmloh vang a ni tih thawm te a awm bawk a. Hetiang hi kan huntawng anih avang hian Serchhip ina Gas kan harsat chhan ni awm a lang thei chu han tarlan tum ta ila.

Serchhip-a Gas dinhmun:

Serchhip khawpuia Gas Agent awmchhun, MIZOFED Serchhip hian tun dinhmunah hian Consumer 11016 an nei a, heng zinga 7807 te hi active customer te an ni. Customer neih dana chhutin thlatin trip 13 hi Serchhip mipui tena Gas kan mamawh a ni a, hetih lai hian kumin chhoah Gas kan dawng thalo hle. Serchhip Mizofed Manager hnen atanga thudawn danin kumin January atanga September thla chhunga Gas an dawn dan kimchang (domestic+commercial cylinder) chu a hnuaia tarlang ang hi a ni-

           January – bur 3720+168 (Trip 13)                February – bur 2916+96 (Trip 10)

            March – bur 4446+96 (Trip 15)                     April – 4122+108 (Trip 14)

            May – bur 3798+120 (Trip 13)                       June – bur 1992 + 96 (Trip 7)

            July – Bur 1668 + 108 (Trip 6)                       August – Bur 1969 + 96 (Trip 7)

            September – Bur 1980 – 108 (Trip 7)            October – Bur 1969 – 144 (Trip 7)

Gas harsatna chhan ni awma lang:

            Serchhip a kan Mizofed Manager hian Gas harsatna sukiang tur hian theihtawp a chhuah a, khawtlang hruaitute pawh a sawipui thin bawk a, a tih theih ang zawng zawng chu a ti ve niin a lang. Chutih laiin kan khawtlang hruaitute pawhin theihtawp an chhuah a, rorel lai Congress Party hotute pawhin theihtawp an chhuah bawk a. Tin heng bakah hian District Consumer Association te hian Chief Minister te hmuin Chief Minister pawhin IOC hotute hnenah ziakin a lo thlen tawh bawk a. Hetiang anih avang hian Serchhip khawtlang hruaitute leh Mizofed lam pawhin theihtawp an chhuah tlang a, chutih laiin Serchhip in Gas duhkhawp kan la nei ta chuang lova, kan la harsa ta tho mai a. Hei tak hi mipuia zawhna awm ta chu a ni. Enge kan harsat tak em em nachhan chu ni ta ang?

1)      IOC atanga transporter te Gas phurhna(contract rate) hi a hniam hle a, Serchhip –Aizawl hi Trip khatah Rs 13020/- chiah a phurtu te hian an hlawh a, hei hi a motor enkawlna nena ngaihtuah chian chuan a hlawklo hle a, chuvang chuan Truck tam tak chu an tlan tha duh lo nghe nghe a ni. Hetiang anga rate tlawma an contractor ten an chhan nachhan chu tunhma zawng khan Legal Metrology leh Consumer lam atanga gas check leh man kha a awm khat hle a, kha vang khan hralhruk hisapin tender kha an chhang thin an ti! Tunah chuan sawrkarin Legal Metrology tha taka nei tawh a, YMA leh Consumer ten theihtawpin hma an la bawk a, Gas sem apiang an check tak zel avangin motor neitu/khaltu ten eiruk tur an nei ta lova, Gas an phur tha duh ta lo a ni, an ti. Gas an phur tha duhlo a, engengemaw chhuanlam siamin Mualkhang Gas Bottling Plan-ah an inreport tha duhlo a, chuvang chuan Gas awmloh vang ni lovin a phurtu tur motor awm mumal loh vangin Gas harsatna hi kan tawk chho ta a ni. Serchhip chauh kan harsa lova, Mizoram a khaw hrang hrang ten Gas hnianghnar hi kan nei lo rei ta hle a ni.

2)      Chutianga phur tha duhlo te chu ban mai awm kan ti mai thei. Mahse kan hriat tur chu IOC hi sawrkar Department anih loh avangin a contractor te hi a pawngpaw ban ngawt thei lova, anmahni hlawkna tur anih chuan mipui lam chuan tuar deuh mahse pawi an tilo ni berin a lang. IOC atanga contractor te supply hi a hun a la tawp lova, nakumah hian a hun a tawp anga chutah chuan tender koh that leh beisei a ni a, tunah rih chuan contract kallai a la tawp loh avangin. Gas phur tha duhlo motor laka action lak ngaihna vak hi a awm rihlo a ni(chhuanlam siam an thiam hle bawk si a).

3)      Hemi chungchangah hian Mizoram sawrkar pawhin theihtawp a chhuah a, mipui te harsatna sukiang tur hian kawng hrang hrangin hma a la mek a ni. Amaherawhchu Mizoram pum harsatna anih avangin chinfel erawh a har hle a, tuna a lan danah chuan Mualkhanga Truct in report hi a tlem tawlh tawlh a, hei vang hian Gas pawh kan harsa tawlh tawlh dawn niin a lang. Hetiang anih avang hian khawtlang hruaituten ruahmanna felfai tak an siam a tha hle a ni. District Consumer lam ten Mualkhang lam atanga thu an dawn danin Mualkhangah Gas stock a tam hle a, a phurtu lam erawh an in report tha mang lo thin a, chu chu an harsatna ber niin sawi a ni.

Khawdang an harsa ve em?

            Gas harsatna hi Mizoram pum a nghawng a, Serchhip chauh hi a tuartu kan ni lo. District dang te pawh an harsa ve hle a ni. Amaherawhchu Serchhip hi Mizoram laili kan ni a, Aizawl atanga a hlat vakloh avang hian transporter rate hi a tha vaklo a ni mai thei, chuvang chuan motor neitu lam hian Serchhip-a kal ai chuan khaw hla zawka kal hi a thlang fo thin niin thudawn a ni. Tin, Aizawl lampang hi an hnianghnar deuh ni a hriat a ni a, hei hi a chhan chu Aizawl a Gas Agency tam tak chu mi hausa tena an enkawl anih avangin anmahni pualin motor an nei a, an duh hun hunah Mualkhangah anmahni motor hmangin an zuk trip mai theih avang a ni.

Gas Agency midang awm belh se:

Serchhip khawchhungah hian Mizofed chauh Gas Agency an awm a, hei hian mipui mamawh a phuhru tawk tawhlo hle niin a lang a. Hemi chungchangah hian District Consumer Association te chuan nikum khan IOC lam atanga hotu lian lokal te chu kawmin Gas Agency dang an lo dil a, mahse IOC lam hotute sawidan chuan kan Household leh population in Agency dang (IOC hnuaiah) dinbelh tur chuan a la phak tawklo tih thu an sawi. Kum 2011 chhiarpuiah khan Serchhip Town-ah mihring 21,158 kan awm a, chhungkua(household) hi 4085 chiah kan awm! Gas Domestic Connection hi Serchhip-ah chuan active customer ringawt pawh kan town chhunga chhungkaw awmzat aiin 3722 zetin kan tam zawk avangin company lam tan Agency dang dinbelh ngaihna a awm rihlo a ni berin a lang

            Hetiang anih chuan Private Agency dang IOC ami nilo te hi lakluh dan kawng awm se, kan mihausa leh sumdawng te hian hetiang lamah hian hma an la se, kawng a awm thei hlauh anih phei chuan Serchhip mipui tan chuan a lawmawm viau ang.

Gas kan harsat chhan ber:

            Kawng hrang hrang thlir hian Gas kan harsat tak chhan ber ni a lang chu, mi diklo tak ten kan ram an thu an nei thin a. Hun rei tak an lo inhaivur tawh a, mipui chanai tam tak min ruksak thin a, a langa mawi taka lang siin a rukin mipui te rawk kan ni a, kan chanvo tam tak kan chan a. Chu chu sawrkar leh khawtlang tangrualin tha ti lovin mi diklo te a hrek a, a hrem a, mipui chanai chhuksaktute an thiltihsual man a chawitir thin a, hemi avang hian Gas harsatna pawh hi a lo thleng ta a ni. Tun hi Mizo mipui te kan tanrual hun laitak a ni, tunah hian Dikna leh Eirukna kan ramah a indo mek a, mipui ten kan tuar mek a ni. Mipui ten Dikna hi tan tlat ila, eirukna avanga zalen ai chuan dikna avangin engemaw chen tuar hi huam ila, kan tuar chhuah huna chuan zalenna famkim kan nei tawh ang. Chumi nghakthleng thei tur chuan dawhtheihna kan neih hram hram erawh a ngai hle a ni. //

 - Laldinpuia