Lehkha chhiar lamah hma kan sawn a tul

Tunlai khawvel a changkang zel a, thilthar leh chindan chi hrang hrang a tam a. Khawvel hmasawnnain a ken tel Technology lama hmasawnna chuan a lian ber atanga a te ber thlengin min fanchhuak vek a. Literature huanga ke pen chu sawiloh lehkhabu bu khat te pawh la chhiar chhuak lo te khan Social media facebook leh whatsapp-ah duh duh kan sawi thei a, kan veizawng kan auchhuahpui a, khaktu leh vengtu awm tawh hek suh, kan thlasik mau puah ve phawng phawng tawh mai a, hei hian kan khawvel nun hman chhoh zelnaah kan Society-ah hian hmasawnna lam aiin hnungtawlhna leh tlakchhiatna min thlen mek zel niin a lang a a pawi hle.

Lehkha chhiar lam kan thatchhiat avangin thu leh hla lamah hma kan sawn lo hle a, chumi ina a nghawng chu Social media hrang hrang whatsapp, facebook etc velah Mizo tawng dik mumal mang lova thuziah a tam em em mai a, hei hi thangthar ten an in copy chho zel ta mai si a, hetiang reng a kan kal chuan reilo teah kan Mizo literature hlu tak hi a la boral zo ang a, kan Mizo society leh pi leh pute nundan te khan hriatreng a hlawh tawhlo mai ang tih a hlauhawm ta hle a ni. Thangthar te kan harh thar leh a tul hle a ni.

Lehkha chhiar tam hi finna a ni, kan ti fo thin a, mahse tunlai thangthar te zingah chuan lehkha chhiar peih kan tlem ta hle thung si. Lehkha chhiar aia hun khawhralna hmun dangah kan zawng a, Social media vela mi thu post copy lehchhawn nan hun tam tak kan khawhral a, thu belhchian dawl mang hleilo te kan copy kual vak vak a. Mahni irawm chhuaka thu leh hla nei silo hian mi thu leh hla thehdarhsakah ringawt kan ramtang ta mai a, a pawi hle. Mi tam tak chuan social media atang hian kan hlutna kan tihniam mek zel a ni.

Chuvang chuan thangthar te hian lehkha chhiar lam hi kan intihhmuh a, lehkha chhiar lama hma kan sawn a pawimawh hle mai. Kan vengah hian YMA Library tha leh changtlung tak kan nei a, Serchhip ah phei chuan kan veng hi YMA Library nei tha ber pawl kan ni, he kan library-ah hian lehkhabu pawh tam tak kan nei a. Amaherawhchu lehkhabu hawhtu lam hi kan awm mang thin lo hi a manganthlak khawp mai. A enkawltuten theihtawpa vengchhung mipuite tana tan an han la chung pawh hian hma kan sawn thei meuh lo chu a ni. Hetiang lamah hian chhungtinte hi kan inzirtir thar leh a tul khawp mai. Nu leh pa ten theihtawp chhuah ila, kan fate hi lehkhabu chhiar tam turin fuih ila, chu chuan an nitin lehkha zir naah pawh hian nasa takin a pui thei dawn a ni. Lehkha chhiar tam ila, chanchinbu te, lehkhabu tha tak tak te hi chhiar ila, hemi hmang hian thu leh hla lamah hma kan sawn anga hlawkna tam tak kan tel thei dawn a ni. Tunlai khawvela Social media kaltlanga kan Mizo literature tlu chhe mek hi tundin anih leh theih nan lehkha chhiar lamah theihtawp i chhuah ang u.

Kan hun hlu tak hi TV en nan ringawt te, facebook leh whatsapp vel khawih nan ringawt ten hmangral lovin lehkhabu tha chhiar nan te, chanchinbu chhiar nan ten hmang thin ila, vengchhunga mi biakrawn tlak leh mi tangkai kan ni mai dawn a ni.

-          Laldinpuia