Mi 2 kalta te kha

Kum 2016 hi Serchhip khaw tan chuan kan kum thatloh kum a ni awm mang e. Kumin chhung hian mitthi kan tam ta hle mai a, khuarel chhiatna lam erawh Pathian khawngaihna avangin kan khua hian kan tawng tehchiam lova, amaherawhchu thihna lampangah erawh khawtlang kan rim hle. Kan thian te, rualduh te leh hmelhriat tam tak ten kumin chhung hian mual min liamsan ta hi a pawi hle a ni. Heng zingah hian Serchhip khua ina thu leh hla kawnga kan chhuanvawr mi 2 mual min liamsan ta te hi an uihawm zual mang e! Heng kan mi 2 kalta te – Pu Lungduhsanga leh Pu KL Chhuanvawra te hian Serchhip tan chuan channa nasa tak a ni.

Pu Lungduhsanga (Thih ni 23.3.2016)

            Ani hi la thalai tak zuanzang vehvawh a ni a, a thian te chuan Sangte tiin kan ko mai thin. Kawm a nuam a, a bula awm a nuam a, a hriatna a that mai bakah thil a man chakin titi a thiam hle bawk.

            Serchhipa a awmlai zawng khan Serchhip literature hmasawnna atan theih tawp a chhuah a, Serchhip a thu leh hla inzawmkhawm pawl Serchhip District Academy of Letters Pu Lalhmingmawia Ralte tena kum 2003-a an din khan a phusa ber pawl niin Joint Secretary hmasa ber a ni. SEDAL–ah hian a tui chho em em a, SEDAL-a a inhman uar lai hian thu leh hla a hnutchhiah nual a, Pu Lalremsanga Hnamte leh Pu T. Romama te chanchin te leh an hlaphuah dan te pawh ngaihnawm takin a lo ziak tawh a ni.

            Amah hi pa inngaitlawm leh intihlar tum lo, a ruka kutchhuak nei ngah em em si a ni a, a damlai khan mahni kutzala lehkhabu buatsaih ve a rilruk thu leh a setting vel siamsak angaih dawn thu hi min hrilh thin a, kei chuan phur takin buaipui ka inhuam thu ka hrilh thin a. Mahse a damlai erawh chuan kan puitlin thei ta lo a ni. A thih hnuah a kutchhuak vel kan han khawn khawm chu article leh essay ngaihnawm tak tak a lo ziak kur nguai mai tih kan hmuchhuak a, chungte chu thamral mai mai atan kan phalloh avangin tunah hian a thian ten kan lakhawm meka ‘Phaiphuleng Lenmawii’ tih hming phuahin Pu Lungduhsanga kutchhuak ngaihnawm tak tak te hi chhiar theihin tihchhuah a la ni thuai ang.

            Sangtea khan Serchhip khua hi a vei a, kan khawtlang inrelbawl dan te hi a vei em em a, mahse a hnathawhna avangin Lunglei lamah a awm a tul si a, Lunglei lam atang pawhin Serchhip khua leh kan thu leh hla hi a rawn ngaihven hle thin. A talent that zia kha mitam tak chuan kan hre theuh awm e, kawng tam takah a rawn tlak em em vek a, hranghlui te chanchin leh khawvel thilthleng mek chanchin te, politics te a hre hle. Serchhip khawpui chanchin pawh hranghlui te a ti ti pui na atangin ngaihnawm takin a ziak nghe nghe. Hetiang ang mi hlu leh talent nei tha Serchhip in kan chan ta hi a uihawm hle a ni.

            A thih hma lawk a facebook a a thu post hnuhnung ber hian a thu thiam zia a tarlang hle awm e:

Khawvar dawnah thim a chhah thin ang hian

Hringnun khua var tur hi thimchhah hian a dang fo

Chu thimchhah chu beiseina meichher nen lo chuan ,

Paltlang zawh rual a ni lo.

Thenkhat erawh chu Hruaitu hmar Arsi Isua hmu turin an chung zawn van a thiang a ,

Thenkhat sual bawih a tang te tan chhum chhah takin chu Arsi chu a hliah thin

Thihna luikawr ruamah hian ban a chelhtu ka neih chhung chu

Ka zuam zel fo ang

Harsat ,lungngaih,buaina hmachhawn....

-Lungduhsanga

14 March, 2016

K.L.Chhuanvawra (Thih ni 3.7.2016)

            Kum 2009 khan tum khat chu phone in min rawn bia a, “SEDAL a kan secretary Pu Lalhmingmawia Ralte kha Aizawl ah an sawn dawn ta si a, a aiawh turin nangni i tlin ber ang SEDAL Secretary turin ka rawt che a nia” minrawn ti tawp mai a, SEDAL chu enge ni a enge an hmalakna mumal pawh ka hre bawk si lova ka tih pawhin “ka rawt fel tawh che” a ti mai si a. Tichuan ka hriatloh hlanin SEDAL Secretary chu ka lo nita reng mai a, ama thlazar hnuaiah tun thlengin Secretary ah ka la awm ta a, hei hi Pu KL Chhuanvawra nena kan inhmelhriat tak tak tanna a ni.

            Amah kha khawtlang tana mi thahnemngai tak a ni a, Serchhip khawtlang hi a vei em em thin a. Ama tel tawhna chinah chuan khawtlang leh Kohhranah thil tha duh mi a ni a. Thil chikmi tak a ni bawk a, khawtlang leh Kohhranah midang tihdan te entawnin kal dan phung tha zawk ni a a hriat te pawh a rawt fo thin a, chung a thil rawtchhuah te chu kan inkawm chang hian min hrilh thin a, ka beng hriat ngeia a sawi Kohhran leh khawtlang inrebawlnaa a thil rawt chhuah te chu :

1) Tuna Central KTP Chanchinbu 'Kristian Thalai' hi a rawt chhuaktu bul berte zing ami a ni a. Ama agenda rawt atangin Serchhip Bial in KTP General Conf ah an rawt a, chumi avang chuan kum 1970 atangin chhuah tan a ni.

2) Tun hma atang tawhin Biakinah hian hmeichhe lam leh mipa lam thutna bakah Khuang hnung tlar laiah hian thuthleng tlar khat rem ve a ni thin a. Chutah chuan tlangval te, naupang te, naupawm te leh a duh duh an thu mai thin a. Pu Vawra hian kum 1962 khan Aizawl Kohhran pakhata an tihdan chu a hmuhin tha a ti hle a. Serchhip Kawnpui Kohhranah tih ve a rawt a, a rawt ang chuan tlar laiah chuan nula leh tlangval thuttir an ni ve ta a. Hei hian Pathian biak inkhawm zai boruak pawh a tinuam hle a, Bial chhung Kohhran dang te pawhin an ti ve ta zel a ni.

3) Kumhlui thlahzana zanlai inkhawm pawh hi a tir chuan Serchhip lam Kohhran hian an la ti ngai lova, Pu Vawra hian Kohhran Pathian Biak Inkhawm kaihhruaina kum 1953-a tihchhuah bu a chhiar atangin tha ti hle a, serchhip Kawnpui Kohhran KTP-ah tih ve a rawt a, an han hmang chhin a, nuam an ti hle mai a, Bial chhung Kohhran dangte pawhin an entawn chho ta zel a ni.

4) Serchhip(Kawnpui) din tan anih chhuichhuaktu a ni a, Serchhip Kawnpui Golden Jubilee leh Diamond Jubilee lawm te rawt chhuaktu a ni.

5) Serchhip District hming vuahtu a ni. Serchhip District hi a tirah chuan 'Aizawl South District' tia vuah a ni a. Hei hi Pu Vawra hian a duhlo nasa mai a,a duhloh thu hi tualchhung chanchinbu hrang hrangah ziakin 'Serchhip District' ti a vuah a duh thu a sawi thin a. Chu chu hriain Bialtu MLA Pu Lal Thanhawla chuan, "In duh zawng hming thlang ula, chu chu kan hmang dawn nia" a rawn ti a. Tichuan Chhiahtlang leh Serchhip khawtlang hruaitute Serchhip Town Hall-ah an inhmukhawm a, District hming atan rawtna dang, ‘Ramlai District’ tih te pawh a awm a, mahse chanchinbu vela a lo chhuah thin tawh Pu Vawra rawtna 'Serchhip District' tih chu lungrual takin an thlang ta a ni.

6) Tun thlenga Zoram puma kan hman mek, chhiat tawh chhinchhiahna puan them dum zar/tar thin hi YMA General Conference-ah a rawt chhuah a ni bawk.

7) Tun hma khan Zoram pum huap Primary Sikul English Zirlaibu-a mihring hmingte hi Vai hming, Sharma,Rama,Sita etc tih hlirin an rawn dah thin a. Hei hi va sawiselin Mizo hming - Liana, Rova,Thanga etc tih veka rawn thlak turin Text Book Committee-ah a va thlen a. Lo pawmin an siamtha nghal vek bawk.

8) Mizoram Calendar ah hian thlalak hrang hrang an tarlang thin a, hetah hian a thla mil deuh a thlalak dah a rawt thin a, Vanglaini chanchinbuah te pawh a chhuah thin. Entirnan: September thla velah chuan Favang lam lantirna te, tin December thlaah chuan Isua pian lampang emaw, Krismas lam hawi thlalak dah thin se a inhmehrem zawka a hriat thu hi a sawi fo thin.

            SEDAL ah hian kan Vice President leh a khaipa ber zing ami a ni a, a thu leh hla hi kan ngaichang thap thin. Amah kha pa inngaitlawm a ni a, fak a phu a mahse fakna awka kha a dawng duhlo fo thin. SEDAL in kum 2015 a Award kan hlan pawh khan signature tel lova kan pek kha nuam ati thei ngang lova, “nakinah miten an hmu ang a, engemaw tia mahni inchawimawi tuma inseam chawp mai mai emaw min ti palh ang” a tih avangin signature awmin min siamthattir leh nghe nghe.

            Pu KL Chhuanvawra hi Serchhip tan channa nasa tak a ni a, a hnathawh hi kan la hlut deuh deuh ang a, thil chikmi anihna leh Serchhip khawtlang tana a thahnem ngaihna te hi amah awm tawhlo mahse a sulhnu atang hian thangthar ten kan la hre chho zel dawn a ni. A lehkhabu ziah ‘Mizo Union Kha’ tih leh ‘Thamral Theilo Nunhlui” tih te hian Pu Vawra mi bik zia a tarlang.

            Heng mi 2 te hi Serchhip tihmingthatu, Serchhip tihmingmawitu te an lo ni tawh thin a, kuminah hian mual min lo liamsan ta a, a hnathawh te chhunzawma Serchhip tana ke pen zel turin thangthar ten hma i la zel ang u.

-Laldinpuia

Secretary SEDAL