Kohhranin ruahmanna fel a neih a ngai

 Tunlai kan ram titi ber chu India sawrkar ina Rs 500 leh Rs 1000 note a tih thih chungchang hi a ni. Hei hi a tirah chuan mipui ten kan hlauthawng viau a, amaherawh chu Kohhran leh sumdawng tam takin an dawn duh zel tho avangin eng teh ualah kan ngai lem lo niin a lang. Mizoram Synod pawhin Dec 30 thleng a dawn theih tur thu a chhuah a, mahse sawrkar lamin a thuchhuah a siam tha chho zel a, tunah chuan Mizoram Synod pawhin thawhlawmah pawisa thi tawh hi a dawn theih tawhloh thu a chhuah a ngai ta hial mai. Bank-ah a thleng theih tho tih kha innghahna a tling ta lova, Income Tax Dept-in sawrkar in dawng tura a ruatte chauh lo chuan an dawn theihloh thu an tlangau pui mek avangin kan Synod pawh hian a thu a sut leh ta niin a lang.
    Kan India ramin khawl thil leh thiamna lamah hma a sawn zel a, kan kalphung pangngai renga kal a rem loh hun a awm thin a, chutiang chuan Kohhran te pawh hi tuna kan kalphung ang dul dula kan kal loh hun hi a la awm thuai dawn niin a lang. Sum leh paiah ngat phei chuan tuna Demonetization atang hian thil a khirh chho tial tial dawn niin a lang ta a, hemi lo hmachhawn a buaina leh harsatna nei lova Kohhran a kal zel theih nan ruahmanna felfai tualchhung Kohhran tin ten kan neih a tul hle tawh a ni.

    “Pathianin mi thiam leh zir sang kher a mamawh lo, a inpe leh taima apiang a mamawh” tih changchawia Kohhran kan inawih dul dul thin piah lamah hian Kohhran hian kan khawthlir kan tihzauh ve deuh hlek a, mithiam leh kalhmang hria, Pathian tihmi te Kohhran tena kan chhawr tangkai a, an thiamna leh finna te Kohhran hmasawn zelna atana an thawh theih nana hman tangkai leh an thurawn kan ngaih pawimawh te hi a tul tan ta hle mai. Tin, kan khawvel a changkang chho zela Kohhran thawhlawm kan tih te hi thawhlawm ipa khung kher lova Card Transaction emaw, Swipe Machine hmanga kan thawh hun te pawh hi a la awm mai thei a ni, tunah pawh Aizawl khawpuiah chuan Pathian ram thawhlawmah a Cash(pawisa fai) a pe lova a Cheque a pe an awm ta nual tih hriat a ni ta.
    Sum leh pai hi a pawimawh a, mihring min siamthatu leh min hruaisualtu a ni fova. Kohhran te hi sum leh pai khawih nasa tak leh tiche reng kan nih avangin sum leh pai tihchetvel dan leh tunlai khawvel thang zelah thawhlawm te a pawisa fai a Kohhran Treasurer ten kawl vak vak lova Bank AC kaltlang emaw ATM Card kaltlang emawa kan chetvel tir hi a tul hle tawh a ni. Tin, kan Synod ina Financial System mumal tak a nei ang hian tualchhung Kohhran tin te pawh hian Financial System mumal tak kan neih a, Kohhran mipui thawhlawm tlingkhawm te hi awlsam taka siamrem a, a dahna tur hmuna dah nghal zung zung thei tura ruahmanna kan siam te hi a tul hle tawh a ni.
    Kohhran thawhlawm awlsam zawka kan thawh dan tur te, mipui tena thawhlawm tam tham tak an thawh duh a Cash a thawh kher lova Cashless Transaction hmanga an thawh theih mai na tura ruahmanna lo siamsak te, awlsam taka pawisa tih virvel dan Kohhran mipui te zirtir te hi a tul hle tawh a, hetiang lamah hian hmasawn leh changkang chho zel tura Tualchhung Kohhran te hian hma kan lak a tul hle a ni. He khawvelah hian Kohhran a awm chhung chuan Kohhran a thawhlawm thawh hi a awm zel dawn si a, chuvang chuan Kohhran te hian hmathlir mumal tak neiin kan mite tana awlsam siamsak chung zelin tunlai khawvel changkannain min chim mek naah hian Kristian changkang tak ni turin kan mite hi zirtir ila, Kohhran hmasawn leh changkang ni turin hmalam i pan zel ang u.
- Laldinpuia  (28.11.2016)