Kum 2016 chhunga Serchhip nih tinuamtu te

-Laldinpuia

Kum 2016 chhung hian Serchhip in huntawng tam tak kan nei a, khawtlangin kawng hrang hrangin hmasawnna rahbi thar a kai a, tin chumi bakah Serchhip khaw mi, hmun hrang hranga miten an ngaihven leh kan khaw tihmingthatute kan awm nual bawk a. Heng kan khaw tihmingthatute hi an chanchin a zavaia sawi vek sen nilo mahse, a lar zual leh a tlangpui te chauh hi lo tarlang ila, anni avang hian hmun hran hran atangin Serchhip khua a thang mawi a, Serchhip khaw chhuak leh Serchhip khua a cheng nih hi a nuam hle a ni. Tin Serchhip khaw tihmingthatu te hi kum dangah pawh mi an lo awm tawh thin a, tunah erawh hi chuan kum 2016 chhung ami a larzual te chauh kan tarlang ang:

Daniel Lalhlimpuia, Footballer

            Khawvela internet search engine lian Google ah Daniel Lalhlimpuia tiin search la a chanchin leh national media vela a lanna a lo lang tuar ang a, Wikipaedia-ah pawh a career leh achievement a lo lang teuh ang. Hetianga khawvela mite hriat hlawh ni mek Footballer duhawm leh nelawm tak hi Daniel Lalhlimpuia, Serchhip Field Veng tlangval a ni. Kum 19 chauh a la ni a, India rama Football Club tha ber zing ami Bengaluru FC ah an rinrawl leh an innghahna a ni chho der, tunah hian Striker position ah a khel mek. Tunah hian 2016 Indian Super Leaque Season-ah Chennaiyin FC-ah Loan in a awm mek bawk.

            He Serchhip tlangval hian chanchin a ngah chho zel a, national media te pawhin an ngaihven chho tan hle a, a chanchin ziah an inchuh sup sup tan ta mai. India Footballer ropui te zinga chhiar tel a la ni thuaiin a rinawm. Media hmaa a interview leh a chanchin sawinaah Serchhip nih a zahpui ngai lova, Serchhip mi a nih hi uar takin a sawi zawk thin. Hetiang mi Serchhipin kan nei hi kan vannei hle a ni.

Vanlalbiakdiki, Wrestler

            November thlaah khan Aizawl lammual-ah Mizo Inchaipui-Nute Title Fight 2016 neih a ni a, chuta title inchuhte chu Serchhip nula ve ve an ni a, champion chu Nl Vanlalbiakdiki Serchhip Chhim Veng nula a ni. Mizoram Champion Serchhip in kan nei hi a chhuanawm hle a ni.

            Nl Biakdiki hian kum 2011 atang khan SAI Aizawl ah awmin Mizo Inchai(Wrestling) hi a luhchilh tan a, Mizo Inchai ah hian State Level-ah Title tum hnih a la tawh a, tin inchaiah hian Gold 16, Silver 5 leh Bronze 2 a la tawh bawk. State pawn lamah National Level-ah Silver leh Bronze medal 1 ve ve a lo la tawh bawk a ni.

Chawnghlunchhungi, NSS Volunteer

            Serchhip Bazar Veng nula Chawnghlunchhungi hian kum 2016 khan NSS Volunteer National Award a dawng nawlh mai a, Serchhip atanga dawng hmasa ber anih mai bakah North East India atanga hetiang award dawng hmasa ber a ni a, Serchhip khua a ti hmingthain a chawimawi hle a ni.

            A Award dawn hi Indira Gandhi National Service Scheme (IGNSS) Volunteer National Award a ni a, ani hi Pachhunga University College atangin BA Psychology a zir chhuak chiah a, PUC vela an zir laiin NSS activities hrang hrangah te a chet that avangin hetiang award hi dawng thei a ni a, November 19 khan India President Pranab Mukherjee-a hnen atangin he award hi a zuk dawng a ni. A lawmawmin Serchhip khua hian kan chawimawi a phu hle a ni.

            Kum 2016 chhung zawng hiaan heng kan mi tarlan te avang hian Serchhip khua nih a nuam a, khawi hmunah pawh kan khaw hming hi sawi an tinuam hle a ni. Anmahni avang hian Zoram khawvelah Serchhip hian mi hriat kan hlawh a, mite ngaihven kan hlawh phah a ni. Chuvang chuan heng kan khaw tihmingthatu te hi kan chawimawi a, an nihna leh an hming chherna te hi kan ngaihhlut thiam a tul hle a ni.

…….