Pawisa thi chungchang leh a chhehvel

            Ni 8.11.2016 zan zanlaiah India ram Prime Minister Narendra Modi-a chuan India tangka Rs 500 leh Rs 1000 note chu sawilawk awm miah lovin a ti thi thut mai a, India ram a barakhaih nasa hle. Zan dar 8:00-ah National Channel a ram mipui te hmaah thusawiin zanlai dar 12 hnu lamah chuan Rs 500 leh Rs 1000 note chu paper chhia mai anih tur thu a sawi a, hetih rual hian India mipui te chu chiai lo tur leh an pawisa dik taka an thawhchhuahsa te chu Bank leh Post Office kaltlangin pawisa tharin an thleng theih tur thu a sawi bawk.

            Modi-a’n a pawisa note a tih thih chungchangah hian thurawn petu mi pakhat inrawlh a awm a, a hming chu Mr Anil Bokil a ni. He mithiam, thluak tha tak mai hian kumin kumtir lamah khan India PM hnenah a ruahmanna te sawichhuah a dil a, a dilna chu pawmsak a niin India PM nena an inkawmna hun atan minute 9 pek a ni a. Mahse Anil Bokil-a chuan India ram corruption umbona tura a ruahmanna chu a han sawi tak tak a, minute 9 chhungin felfai takin corrupt do na tura a ruahmanna te chu Modi-a a hrilh a, mahse PM Modi-a chuan a la ngaithla tui si a, a chelh zel a darkar 2 dawnlai an inkawm ta nghe nghe a! Chu Anil Bokil-a rawtna ang chuan Modi-a chuan a rukin mithiam te nen thla 6 vel zet an inbuatsaih hnuah he thutlukna dengkhawng tak mai hi a siam chhuak ta a ni. Anil Bokil-a’n PM hnena a sawi dan chuan India ramah hian nitin 2.7 lakh crore vel hi sum chevel a ni a, chung zingah chuan 20% vel hi Banking transaction a ni a, a bak zawng 80% chu pawisa faia inhlan(chhuichhuah hleihtheihloh) a ni. India rama mipui 78% vel hian nikhatah Rs 20 chiah kan mamawh a, chuvang chuan heng pawisa note lian ho Rs 1000, Rs 500 leh Rs 100 te hi nuaibo vat a tul a ni, a ti.

            He thuthlukna a siam tur hi thuruk theihtawp a ni a, midang hria an tlem hle. A cabinet member te leh India President pawhin Nov 8 tlaiah an hre chauh! Nov 8 tlaiah Cabinet Meeting neih a ni a, he meeting neih hma hian Minister te chu Meeting naah an Mobile phone kenglo tura hriattir an ni. Zan dar 7:30-ah Meeting neih zawh a ni a, meeing neih zawh anih hian Minister te chu pawnchhuah phal a ni lova, Modi-a’n dar 8 a Television address a neih a pawisa note thih tur puan zawh anih hma chu pawn lam mite biak emaw room chhuahsan emaw an phallo bur. Hetiang chiah hian RBI Governor pawh Modi-a thusawi zawh hma chu chelh khawtlai a ni. Modi-an a thutlukna a siam hi sawiseltu an awm a, faktu an awm bawk. He thutlukna siam anih chhan ber chu kan rama corruption tam lutuk leh Bank a deposit duh si lova mi hausa leh eiru ho ten sum tam tham tak tak an chheprelh vang hi a ni.

            Hetia pawisa a thih avang hian buaina tur a awm chuang lova, kan pawisa thi te kha Bank ah emaw Post Office-ah emaw a thlengna form fill up a ID kengin thleng mai theih a ni. Kumin Dec 30 thleng Bank leh Post Office-ah thleng theih a ni a, Dec 30 hnu lamah chuan RBI Office-ah chauh thleng theih a ni tawh ang. Rs 1000 leh Rs 500 note hian sawrkar hlutna a nei tawh lova, Modi-a sawidan takin ‘paper chhia mai mai’ a ni tawh. Chuvang chuan Rs 500 leh Rs 1000 note hi a lem lengvak a tam hle tura ngaih a ni a, hemi kawngah hian mipui te fimkhur a ngai hle. Pawisa lem hi a kawltu ten Bank-a an thleng ngam dawnloh avangin kumin chhung hian a thehthangna an zawng nasa dawn tih a hriat a, chuvang chuan kan fimkhur a tul takzet a ni.

            Hetianga sawrkar laipuiin a hmalakna te hi kan ram thatna tur te, kan economy dinhmun a that chhoh a thilman a hniam theihna tur te a ni tih hria ila mipui te hian sawrkar dan siam te hi zawm ila, harsatna kan lo tawk ta deuh anih pawhin nakin lawka kan ram pumpui nawmsakna tur ani tih i hre theuh ang u.

-          Laldinpuia

11/11/2016