Gas harsatna chungchangah ngaihdan dang

Consumer te i harh ang u - VII

    Tunlai hian Serchhip khawpuiah Gas a harsa hle mai a, kan Gas Agent neihchhun MIZOFED ten ngawrh takin a thleng ang ang an sem chur chur chung pawhin mipui lam hian kan duh khawp kan hmu thei meuh lo niin a lang. Dan in a phallo tih hrereng chungin Bur 1 Rs 1000 te, chu aia sang te pawhin mi hralhruk kan lei deuh fo ta mai a, a zialo hle mai.
    He kan Gas harsatna hi chinfel hret hret zel ni mahse, tun hma ang kha chuan kan hnianghnar tawh dawnlo niin a lang a, a chhan hrang hrang te chu -
1) Tunhma chuan Serchhip in thla khatah Trip 13 vel average in kan dawng thin a, mahse tunah chuan thla khatah trip 6 vel chauh kan dawng tawh. Hei hi a chhan sawi theih fak a ni lova, agent lam ten theih tawp an chhuah a, khawtlang hruaitu lam ten theihtawp chhuah a ni bawk a, mahse hmasawn a har hle. Pu Hawla meuh pawhin tihngaihna a awm loh thu kan khawtlang hruaitute a lo hrilh thin bawk. Hman deuha CYMA in Gas hralhruk a man chiam avang khan driver te an lungawi lova thingtlang lam hi an phur tha duh meuh lo ni a sawi a ni, Serchhip hi Consumer lam an chak a, dan lova thiltite kan man nghal zel avangin driver tam tak hian supply rawn dah hi an chak vaklo bawk.

2) Central-in supsidy kalphung a thlak a, Bank AC-ah subsidy a luh vek tawh avangin leh Aadhaar card neilo tan Gas subsidy a dawn theihloh avangin tunhma angin Gas an rawn phur teuh teuh tawh ngai lova, Subsidy dawng thei tura in report a zir te, Aadhaar card neih tam dan a zir tein supply hi a lo thleng tawh.
3) Gas kan hman tam ber hi Domestic(Subsidy) Cylinder a ni a, chuvang chuan hetiang hi mimal inah bak pawl ho emaw, Kohhran emaw, sumdawnna leh dawr angah te hman phal a ni lo. Hetiang dan lova hmang kan tam hian a mamawhtu chhungkua a thleng phaklo thin a, harsatna kan tawh phah thin. Tunah hian Legal Metrology lam chuan Serchhip a dawrkai Gas hmangho leh pawl leh Kohhran Domestic Connection hmang te check tumin hma an la mek bawk.
    Hetiang hi kan dinhmun leh hun kal zela thil awmdan tur anih avangin chhungkaw rual deuh tan phei chuan Domestic Cylinder hi kan hmang zo hma hle thin a, chuvang chuan Gas tel lo chuan eirawngbawl a tih hleihtheih tawh si lohva, ngaihdan dang kan dap a tul ta hle a ni.
    Tuna a nawlpuia kan hman mek Domestic Cylinder hi KG 14.2 a rit a ni a, tunah(22.9.2016) hian a a rate hi Rs 620/- a ni. Hetih lai hian Bazar vela mimal hralhruk kan lei chuan Rs 1050/- velin kan lei thin. Kan gas lei thin hi MIZOFED sem pangngai kan lak hian Kg khat Rs 43.66 in kan lei thin tihna anih chu. Commercial Cylinder hi Gas Kg 19 a awm a, a man hi Rs 1120(as on 22.9.2016) a ni a, Kg khat Rs 58.94 in kan lei thin tihna. Domestic Gas hi Subsidy hi duh hun huna lak tur kan neih thinloh avang hian hralhruk hi kan lei fo thin a, hralhruk kan lei hian Kg khat Rs 74/- a lei ang kan ni a, chutih lai chuan Commercial Gas kan lak hian Kg khat Rs 58.94 chauh a ni thung. Hemi awmzia chu Domestic Connection ah hnianghnara Gas lak tur kan neih thinloh avang hian midang hralhruk to deuh deuha lei ai chuan Commercial Connection neih mai hi a hlawk zawk daih tihna anih chu. Tin tunah hian Gas Connection nei pawh Aadhaar Card neilo chu Subsidy hi a lut thei tawhlo a, chuvang chuan chhungkaw member tam deuh leh sum leh pai harsa lo zawk, Gas connection tel lova khawsak harsa tan chuan Commercial Connection Book mai hi a finthlak hle a ni.
    Commercial Gas te hi chu non-subsidy anih avangin englai pawhin lei tur a awm deuh reng thung a, a awlsam em em a ni. Chuvang chuan pawl ho, YMA, Kohhran leh Zirna inah, sawrkar leh private office-ah, mimal chhungkaw rual deuh sawrkar hnathawk awmna chhungkuaah te hian Commercial Connection hi nei theuh ila, Serchhip ina Gas a kan harsatna hi a kiam sawt ngei ang. Mipui nawlpui harsa tak tak ten Gas kan hnianghnar theih nan pawlho leh Kohhran, YMA, NGO etc te chuan dan ang thlapin Commercial connection hi i hmang theuh ang u. Mizo Kristian te hi BIBLE ina min zirtir Kristian nundan tur hian nung theuh ila, kan harsatna tam tak hi chu a fel duak mai ang.

- Laldinpuia
Secretary
Serchhip District Consumer Association