Speech on KHALHKHAWMNA RURA BOOK PREVIEW

By Laldinpuia | Ni 6.6.2016 Hmar Veng YMA Hall

Vawiinah Pi Muani’n a lehkhabu buatsaih released naa preview neihsak tura min sawm hi induhsakna ropui tak niin ka hria a, mi hmaa thusawi hi ka thiam vaklo nachungin hetianga hun tha min siamsak hi bawhpelh ka duh bik lova, ka lawm hle a ni tih hi ka sawi hmasa duh a ni. Lehkhabu chhuah hi a har a, tunlai khawvelah ngat phei chuan a bikin Mizo te zingah chuan enzawnna leh sum siamna tur zawnga lehkhabu siam hi chu sumdawnna hlawk lo ber pawl anih hial ka ring. A hralh tha pawl pawh hian a chhut man bakah tlem azawng hlep an nei thei deuh chauh a ni a, lehkhabu buatsaih tura an tha leh zung, an ngaihtuahna an senna zawng zawng te kha a pawisa zawnga hlawkna tura chantir tur hi Mizotawnga lehkhabu hralhna atang hi chuan a awm thei meuh lo a ni. Heti chunga Mizo tawng ngeia lehkhabu chhuah thei kan la awm thei reng hi chu chawimawi an phu a an lehkhabu te hi chhiar peih vaklo chung pawha tlawmngaia leisak hrim hrim pawh hi an phu hlein ka hria.

Kan lehkhabu preview tur ‘Khalhkhawmna Rura’ tih hi ngun takin ka chhiar chhuak a. Ka chhiarchhuah meuh chuan a ngaihnawm zia sawi hi ka chak ta zek zek a. A letlingtu Pastor L. Hmingliana hi la damin tunah hian kan zingah awm ve se ka ti hle mai a, mahse chatuan chawlhnaah a lokal ta si a (May his soul rest in peace). A nupui Mrs L. Hmingliana kan zingah a tel thei hi chu a lawmawm hlein ka hria. (I respect Mrs L.Hmingliana while i preview about her late husband book).

He lehkhabu hian rin aiin chanchin thui tak mai a lo nei reng mai tih ka hrechhuak a, a ngaihnawm ka ti hle a, nakinah a chhiartu ten a ngaihnawm zia chu kan la hria ang a. A buatsaihtu hian remti se chu he hmuna lokal khawm te hi he lehkhabu hi a thlawnin a enchhin nan min hawn tir vek sela, zan inah chhiar chhuak vek ila, chuta a ngaihnawm loh kan tih viau chuan naktukah a thlawnin return leh  phal ta se, a ngaihnawm kan ti a kan hlut hle anih chuan naktukah a man pek min phalsak ta se, naktukah hian a lehkhabu return lova a man pe tura kal tur vek kan nih ka ring. Chu chuan he lehkhabu ngaihnawm zia hi a hril chiang mai awm e, ka chhiar chhuah vek tawh avangin huai takin ka sawi ngam a ni.

Turkey miten Armenian hnam an tihduhdah dan chanchin ziahna, tun thlenga khawvelin a ngaihven, chutih laia Turkey ramah phei chuan tun thlenga he hunlaia thilthleng hi sawichhuah an la khap hial na chhan hi a history tlem azawng han tarlan a tulin ka hria a, hei hian he lehkhabu hi a tihhlut lehzual phah ngei ka beisei.

Turkey ram leh a chhehvel khu lalram ropui tak Ottoman Empire tih thin a ni a, he lal ram huamchhungah hian kum 3000 vel kalta atang khan Eurasia hmuna Caucasus region-ah Armenian ho hi an cheng a. Kum zabi 4 na velah khan Armenian lal ram hi lian takin a ding tawh a, Armenian hnam ho hi Kristian deuh vek an nih avangin khawvel hnam hrang hrang zinga Kristian Sakhaw zuitu a inchhal hmasa ber hnam an ni nghe nghe. Zawi zawiin lal ram dang ten an rawn hnehchhuh zel a, kum zabi 15 naah hian Armenia hnam pumpui chu Ottoman Empire hnuaiah an awm ta hial a. Hetih lai hian Turkey ram hi Islam sakhaw zuitute awm tamna ber anih avangin Kristian awmchhun te hi an chep hle a, Muslim sakhua atanga Kristiana inleh chu khap anih bakah mipui aiawha thawk zawng zawng(Public Office) te chu Islam sakhuaa inlet ngei ngei tura tih an ni bawk a. Tin Christian te chu Muslim aiin chhiah an pek tam tir bakah kawng engkimah chanvo an pe tlem zawk bawk.  Hetianga nekchep an nih lai hian Armenian ho hian Ottoman lal ramah hian dinchhuah tumin theihtawp an chhuah a, Turkish mi te aiin zirna leh sum leh pai lamah neih nun zawk tumin tan an khawh let ve nasa hle. 

Kum 1908-ah khan Turkey ah sawrkar thar a piang a, he sawrkar tharah hian a hma aia chanvo tha zawk an chan beiseina Armenian ho hian an nei lian hle a, mahse chung an beiseina chu an hnam mi leh sa tam tak boralna chuan a zui ta zawk a ni.

Kum 1915 chho bawr velah khan Turkey sawrkar chuan an lalna ram Ottoman Empire huamchhunga Armenians ho te chu Kristian an nih avangin rawt chimih vek tumin hma an la tan a, he an hmalakna hi April 24, 1915 khan a taka bul tan a lo ni ta a. Hemi ni hian Armenian miffing leh remhre chin deuh mi 200 chu manin tihhlum nghal an ni a. Hemi hnu hian Armenian hnam ho zawng te chu an awmna atanga khalh chhuakin Mesopotamian thlalerah tui leh eitur tel hauh lovin hruaichhuah an ni a. Kawng lakah mi sang tam tak an tlu hlum a, kal zel thei lo te chu sipai ten an kaphlum nghal zel bawk a. He an in khalhkhawmna rura tak leh an tawrhna nasat dan hi he lehkhabuah hian chipchiar taka ziak a ni.

Ottoman Empire huam chhungah hian Armenian mi maktaduai 2 vel an awm a, kum 1922-a intihduhdahna a tawp meuh chuan Ottoman Empire hnuaiah hian Armenian mi 3,88,000 chauh an awm tawh a, mi maktaduai khat leh nuai 5 vel chu thi anga chhut a ni. 

He lehkhabu letlingtu Pastor L. Hmingliana hian a original lam hi a sawilang hauh lo mai a, khawi atanga a lehlin nge tih a hriat mai theih loh avangin internet lamah ka pawngpaw zawn ta ringawt a. Internet lama online book store atanga a lan dan chuan he lehkhabu ‘Khalhkhawmna Rura’ tih hi Serpouhi Tavoukdjian lehkhabu ‘Exiled:Story of an Armenian Girl’ tih atanga lehlin niin a lang. A hmasa ber atan kum 1933 khan chhut a ni a, Serpouhi hian fa a nei lova, kum 70 a pelh hnuah pasal a nei a, amah hi Seventh Day Adventist niin Avon Park, Florida-ah a cheng a, he hmunah hian a boral thlengin a cheng a ni. A lehkhabu Exiled an hralhna atanga hlawkna awm zawng zawng chu amah anga hnam leh hnam innghaisakna avanga harsatna tawk te tanpuina tura pawl din End Genocide-ah a hlan vek a ni.  Hemi chungchang ka chhuina vekah hian he lehkhabu lo tuipuia Serpouhi chanchin lo chhui zuitu Pamela Zirakian Day nen kan inbe pawp hlauh mai a, Zirakian-a sawi dan chuan Serpouhi chanchin hi tarlang belhin a lehkhabu kha tihlen a chhuah that leh an tum mek thu min hrilh a, amaherawh chu a copyright lamah a la tifel thei lova Serpouhi khan a thih khan a rokhawmtu tur tumah hnutchhiah a nei bawk si lova chuvang chuan kum 2021 hma chuan an tihchhuah theih hmel loh thu min hrilh nghe nghe.

A tawp nan preview kan ni bawk a, he lehkhabu hi han sel hlek ka duh a, Side A lampang kan sawi tawh a tunah chuan Sibe B lampang sawi pawh a rem turah ngai ila. 

A hmasa berin lehkhabu reng reng chu a chhut kum, copy zat, chhuahtu, chhutu press etc. te tarlanna fel fai tak a phek tir lamah awm tura ngaih a ni a, he lehkhabuah hian tarlan a ni lova, a pawi hlein ka hria a, nakinah reprint leh te anih chuan tarlan theih tawh nise a tha khawpin ka ring.

Tin, a kawm hmalamah leh hnung lamah hian he lehkhabu letlingtu Pastor L. Hmingliana thlalak hlir a lang a, a tira review tura min hmuh hmasak ber khan Pastor L.Hmingliana chanchin ziahna, a nunkawng bumboh tak a zawh tarlanna emaw ka ti hman a, mahse chutiang ni lovin he lehkhabu letlingtu hi a lo ni zawk a. Serpouhi thlalak te hi a kawmah hi chuan tarlan ni zawk se, a letlingtu hi chu a kawm hnungah emaw lian vak lova tarlan ni zawk fe en a nuam zawk angem aw te chu ka ti deuh.

He lehkhabu buatsaihtu Pi Muani hi rilru senna tur hi a ngah em em mai a, sumdawnna lamah leh inchhung relbawlna kawngah a thluak a hmang nasa hle a, chuvang chuan he lehkhabu chhut hi duh ang takin a enpui hmanlo niin a lang a, a layout hi hei aia inrem nalh deuh zawk nise, a bung then hrang hrang te pawh hi felfai deuh zawka siamrem nise a that ka ring a, tin phek 36 na hi laklawh deuhin a tawp a, chhut hmaih palh tlar 2/1 a awm a ni mai thei.

Tin he lehkhabu hi lehkhabu ngaihnawm leh khawvel pum huap pawha chanchin nei anih avang hian a bu hming hi ‘Khalhkhawmna Rura’ han tih ringawt lo deuh hian sentence 2/1 velin a story hi a bu kawmah hian han highlight theih nise chu a kawm atanga lei chakawm tak a nih nghal ka ring. Entirnan: Turkish miten Armenian hnam an suatna rapthlak tih emaw Armenian hnam ten an Kristianna avanga tihduhdahna an tawrh dan rapthlak’ etc. tih ang chi te hi a bu hming hnuaiah tarlan tel nita sela.

Heng kan sawi te hi tuna tihthat theih a ni tawh lova, amaherawh chu chhut nawn leh a awm anih chuan tarlan theih chu nise tun ai hian a felfaiin a leitu tur tan a itawm zawk ngeiin ka ring.

He lehkhabu famkimlohna lai kan sawi te khan a ngaihnawmna a tikiam chuang lo tih erawh hrereng ila, chuvang chuan a ngaihnawmna aia a chhut fuhlo avanga kan leiloh phah anih chuan lehkhabu ngaihnawm leh tha tam tak hi kan chan fovin ka ring. He lehkhabu hi a chhuahtu chhuah chhan leh inpekna a ropui a, chhiar tlak, dahthat tlat, awihawmloh khawpa ngaihnawm leh chanchin mak, mahse a tak taka thilthleng ngei nisi hian he lehkhabu hi a tihlu a. Chumi piah lamah keinin awmhmuna zalen taka Pathian kan fak laia Armenian miten Pathian an rinna(Kristian an nih) avanga an tawrh nasat zia han chhiar hian keini ringtu tena Pathian hremna/kan tawrhna kan tih ve hi a lo nep hle tih min hmuhchhuah tir a, chu chuan engpawh kan chungah thleng se Pathian kuta inawltir a lungawi taka amah be mai tur kan nih zia hi a tarlang chiang hlein ka hria. He lehkhabu chhiartu zawng zawng ten Pathianin amah ringtute a kalsan ngailo tih hi an hriat thar phah ngei ka beisei a, duhsakna ka hlan bawk e. Ka lawm e.