Social Media lakah thalaite i fimkhur ang u

Tunlai hian Social Media hi kan uar ta hle a, a thatna tam tak a awm laiin a thatlohna pawh tam tak a awm. A hmang thiam leh chhawr tangkai thiam ten hlawkthlak taka an hman laiin hna thawh thulh phahnan leh thatchhiatna atana lo hman phah te pawh an awm bawk a. A engapawh chu nise heng Social Media (Vantlang inbiakna) ang te hi Kristian Thalai te hian fimkhur takin, kan tih atana mawi leh mawilo te thliar chunga a hmandan tawk kan thiam a tul hle. Kristian Thalai member te chu mi rawn tlak, thudik hria leh dawtsawi ve ngailovah midang te hian min ngai tlangpui a, hei hi Social Media kan hmanna kawngah pawh hian a langchhuakin midang te zirtir leh a tha lam zawnga an entawn tur hnutchhiahtu kan nih a tul hle a ni.

· Social Media thenkhat Facebook, Whatsapp, Instagram etc vela kan thu post ah te kan fimkhur a ngai hle. Mi dang te pawi kan sawi em? Midangte tana chhiar nuamlo leh hmuh hreawm tur thlalak te kan pholang em? tih kan infiah fo a tul. KTP member te chu hengah hian kan fihlim tur a ni.

· Midang aia post hma hrim hrim duh vanga mi chanchin chianglo leh dikhlel taka post emaw, mi post lo copy paste vak vak hi tihsual palh a awl khawp mai. I fimkhur tlang ang u. Thu tha tak post emaw kan intih lai hian thu belhchian dawllo leh dawt thu hi kan lo thehdarh vak palh ange. Hetiang ang kan ching anih chuan sim vat chi a ni ang, chuti lo chu midang ten KTP member dawt thu thehdarh hmang tiin min hrereng palh ange. Kan thu post tur emaw midang post kan copy tur emaw chu a rintlak em? Ka post na tur hmun nen a inmil em? tih te hi ngaihtuah hmasak phawt a tha.

· Pathian Lehkhabu Thianghlim leh Kristian Hlabu hi kan sakhaw serh leh sang pawimawh tak a ni a, kan zah hle tur a ni. Hetih lai hian tunlaia intih changkan tumna nge ni kan thatchhiat vang zawk, Bible leh Hlabu pawh keng tha peih tawh lova Biak In chhungah hial Phone kengluta Bible leh Hlabu keng lova Phone application ami hmang ta mai kan awm ta hial hi chu a tha lo hle. Biak In chhung hi intihchangkan siakna hmun tur a ni lova, mirethei leh hausa ber pawhin man tlawm taka kan lei theih tur Bible, BSI in a buatsaih a, hei bakah man tlawm takin Kristian Hlabu lei tur a awm bawk a, hetiang ngei ken hi kan tih tur a ni.

· Mobile phone te hi a hman dan chintawk, a khawih chintawk thalaite chuan kan hriat a tha. Englai pawha online hman reng, social media kaltlanga biak theih reng a awm te hi kan hnathawhna nen a inzawm viau te anih siloh chuan thil zahthlak lam a ni. KTP member te hian kan hnathawh thulh phah nan, min tichhetu atan ni lovin min tanpuitu leh kan hunawla min tihlimtu leh information min petu atan te heng Social Media hi hman tangkai i tum zawk ang u.

· Social Media kan tih angchi te hi mi zawng zawng(a hmang duh apiang) tana siam a ni a, chuvang chuan lo intih neitu chiam emaw, mi thu post leh tawngkam hman vel lo sawisel zung zung emaw hi a tha ber lo. Vantlang inbiakna satliah mai a ni tih kan hriat reng a tul.

· Kan tangkam hman leh thu post reng reng hi midangin awlsam taka an hmuh mai theih a ni a, keimahnin paihbo tawh mah ila a hmu dang te tan lo la dahthat theih anih avangin mimal chanchin a chhe zawnga sawivak emaw, midang rel chiam emaw, nakinah la pawi thei tur ang chi a thinrim hrikthlakna atana hman te hi tih loh tur a ni. Heng te hi Kristian Thalai Pawl member te tan chuan a mawilo mai ni lovin kan Pathian thu nen a inmil thei lo a ni.

Heng Social Media hmang hian hmelma pa Setana chuan tunlai hian thalaite zingah ram a la duai duai a, Kohhran ngaihnepna, mahni indah chungnunna leh engkim ngaihzamnain thalaite rilru a hmin mek zel a ni. Mahse hetih lai hian Kristian Thalai Pawl member te erawh nghet takin ding ila, min tihbuaina hmanrua atana Setana’n a hman mek hi chanchintha hrilh darh nan leh Setana tihmualpho nan hmang hlauh zawk ang u. “Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh. (II Timothea 4:5).

-Laldinpuia, Secretary

Serchhip Pastor Bial KTP