Hun kal tawh ka thlir kir a…

(Recalling some memories with KL Chhuanvawra)

Kum 2016 April thla laihawl vel kha ni tain ka hria phone call ka dawng a, ka han pick up chuan Pu Vawra call a lo ni a, Aizawl atanga an inentir an lo haw tawh thu leh min hmuh duh thu hi a rawn sawi a, “enge ni a va pawimawh awm ve” ka ti a. “Phone maia sawi chi a nilo, I hman hunah lo leng la inkawm teh ang” a ti a, tichuan ka hman remchan hunah chuan ka han leng chho ta a. An ina ka lut chu roomah a lut a, lehkha phek hnih vel chhut hi a rawn lek chhuak a, “hei hi lo kawl tha teh, ka chanchin anih hi” a ti a. Engtitiha chutia kei mi pe ringawt chu nge ni ang, a hun tawp a hnai tihna te hi a ni thei angem, ti a ka inngaihtuah buai lai chuan amah vek chuan, “Serchhip-ah chuan ka mi rin ber leh rawn tlak bera ka ngaih i ni a, chuvang chuan hei hi lo kawl tha la, lo chhiar la, edit duh i neih te a awm chuan lo chhinchhiah ang che, hei Vengchung KTP in ka chanchin min dil a, chuta pekah chuan ka ti deuh a” a ti a.

           

“Article hi i ziak i ziak tho si a, lehkhabu te hi chhuah ve teh” ka ti thin a, ani chuan mi inngaitlawm tak mai anih avangin “keini ang thuziah te chu tumahin an chhiar ve duh lovang” a ti satliah mai thin a. Mahse a rilruah a luah ve deuh ni tur a ni, tumkhat chu lehkhabu buatsaih a duh thu min hrilh ta a, tichuan a lehkhabu buatsaih duh chu ama typrewriter ah a chhu char char a, chu chu keiin Computer ah ka lo chhut chhawn sak leh char char a, rei ngial kan beih hnuah a lehkhabu chu kan puitlin thei ta a, chu a lehkhabu a tarlan tur chu document hlui tak tak hi a rawn keng teuh thin a, “engtin nge maw i dahthat theih zawk le” ti chungin ka lo chhut chhawnsak thin a, tichuan a lehkhabu ‘MIZO UNION KHA’ tih chu kan chhuah thei ta a, lehkhabu hlu tak mai a ni a, chhut nawn hial te pawh a ni ta a ni

Lehkhabu dang buaipui leh turin ka nawr thin a, a article ziah ho thenkhat te chu a bu a siam tumin hma kan la a, tichuan kei chuan ka lo chhutluh sak leh char char a. Tichuan chhah vaklo tein lehkhabu pakhat chu kan peih leh ta a, a bu hming turah kan buai deuh a, enge a bu hmingah inhmeh be rang tih ka ngaihtuah chuan a article lar ve tak, tunhma a lehkhabu angrenga a lo tihchhuah tawh ‘Mandalay Rose Par’ tih chu a bu hminga hman ka rawt a, a remti hman trep a, a kawm tur te pawh hmeichhe hmeltha tak lem chuang turin uluk takin ka duang tawh a. A hnuah press a kan dah hmain amah chu ka entir leh a, mahse Mandalay Rose Par tih chu a duh ta hauh lo mai a, ‘a nalh alawm’ ka tih pawhin ‘a zahthlak’ a titlat mai a. Enge Mandalay Rosepar tih hi sawi nikhuaa a nuih tut tut zel a, a hming lamrik a zah viau nachhan hi hriat ka chak ta riau mai a, mahse amah ka zawh reng reng hian a sawi tha duh lova, ti ti dangah a pakai daih zel a. A article/story ziah ‘Mandalay Rosepar’ tih kha atan a hlu viau anih ka ring ta ringawt a. Tichuan a lehkhabu hming tur chu Thamrallo nunhlui tih hman kan tum a, mahse lehkhabu hmingah a lo awm tawh si avangin ‘THAMRAL THEILO NUNHLUI’ kan ti ta zawk a, a published tu atan pawh amah ni lovin a fapa naupang ber K. Remruatfela hmingin  a hmang a, a chhan pawh keimahnin kan chhuah chuan min an chhiar tha peih lovang, a bakah mahni thuziah mahni ina tihchhuah leh chu a zahthlak em mai a tih vang a ni.

Amah kha poltitics lamah a tui a, Mizoram politics bul lam kha a hre hle. Tin Serchhip (Kawnpui) Jubilee lawm rawt chhuaktu a ni a, Serchhip (Kawnpui) a kan awm theih nana phalna min petu Pu Lalbuaia District Council-a EM kha a ngaisang hle a, Serchhip ah hian a hming chawia Hall emaw kawtthler emaw hi vuah ve a chak thu min hrilh fo thin. Chumi atana hmala tur chuan min beisei a, a damsam loh lai pawh hian a that chuah deuh a kan in phone hian hma ka lak tawh leh tawhloh te, hemi chungchang hi article ah ka ziak tawh em, thuneitute ka sawipui tawh em? Tih te hi min zawt awllo thin.

Kum 2009 khan tum khat chu phone in min rawn bia a, “SEDAL a kan secretary Pu Lalhmingmawia Ralte kha Aizawl ah an sawn dawn ta si a, a aiawh turin nangni i tlin ber ang SEDAL Secretary turin ka rawt che a nia” minrawn ti tawp mai a, SEDAL chu enge ni a enge an hmalakna mumal pawh ka hre bawk si lova ka tih pawhin “ka rawt fel tawh che” a ti mai si a. Tichuan ka hriatloh hlanin SEDAL Secretary chu ka lo nita reng mai a, ama thlazar hnuaiah tun thlengin Secretary ah ka la awm ta a ni.

Amah kha khawtlang tana mi thahnemngai tak a ni a, Serchhip khawtlang hi a vei em em thin a. Ama tel tawhna chinah chuan khawtlang leh Kohhranah thil tha duh mi a ni a. Thil chikmi tak a ni bawk a, khawtlang leh Kohhranah midang tihdan te entawnin kal dan phung tha zawk ni a a hriat te pawh a rawt fo thin a, chung a thil rawtchhuah te chu kan inkawm chang hian min hrilh thin a, ka beng hriat ngeia a sawi Kohhran leh khawtlang inrebawlnaa a thil rawt chhuah te chu :

1) Tuna Central KTP Chanchinbu 'Kristian Thalai' hi a rawt chhuaktu bul berte zing ami a ni a. Ama agenda rawt atangin Serchhip Bial in KTP General Conf ah an rawt a, chumi avang chuan kum 1970 atangin chhuah tan a ni.

2) Tun hma atang tawhin Biakinah hian hmeichhe lam leh mipa lam thutna bakah Khuang hnung tlar laiah hian thuthleng tlar khat rem ve a ni thin a. Chutah chuan tlangval te, naupang te, naupawm te leh a duh duh an thu mai thin a. Pu Vawra hian kum 1962 khan Aizawl Kohhran pakhata an tihdan chu a hmuhin tha a ti hle a. Serchhip Kawnpui Kohhranah tih ve a rawt a, a rawt ang chuan tlar laiah chuan nula leh tlangval thuttir an ni ve ta a. Hei hian Pathian biak inkhawm zai boruak pawh a tinuam hle a, Bial chhung Kohhran dang te pawhin an ti ve ta zel a ni.

3) Kumhlui thlahzana zanlai inkhawm pawh hi a tir chuan Serchhip lam Kohhran hian an la ti ngai lova, Pu Vawra hian Kohhran Pathian Biak Inkhawm kaihhruaina kum 1953-a tihchhuah bu a chhiar atangin tha ti hle a, serchhip Kawnpui Kohhran KTP-ah tih ve a rawt a, an han hmang chhin a, nuam an ti hle mai a, Bial chhung Kohhran dangte pawhin an entawn chho ta zel a ni.

4) Serchhip(Kawnpui) din tan anih chhuichhuaktu a ni a, Serchhip Kawnpui Golden Jubilee leh Diamond Jubilee lawm te rawt chhuaktu a ni.

5) Serchhip District hming vuahtu a ni. Serchhip District hi a tirah chuan 'Aizawl South District' tia vuah a ni a. Hei hi Pu Vawra hian a duhlo nasa mai a,a duhloh thu hi tualchhung chanchinbu hrang hrangah ziakin 'Serchhip District' ti a vuah a duh thu a sawi thin a. Chu chu hriain Bialtu MLA Pu Lal Thanhawla chuan, "In duh zawng hming thlang ula, chu chu kan hmang dawn nia" a rawn ti a. Tichuan Chhiahtlang leh Serchhip khawtlang hruaitute Serchhip Town Hall-ah an inhmukhawm a, District hming atan rawtna dang, ‘Ramlai District’ tih te pawh a awm a, mahse chanchinbu vela a lo chhuah thin tawh Pu Vawra rawtna 'Serchhip District' tih chu lungrual takin an thlang ta a ni.

6) Tun thlenga Zoram puma kan hman mek, chhiat tawh chhinchhiahna puan them dum zar/tar thin hi YMA General Conference-ah a rawt chhuah a ni bawk.

7) Tun hma khan Zoram pum huap Primary Sikul English Zirlaibu-a mihring hmingte hi Vai hming, Sharma,Rama,Sita etc tih hlirin an rawn dah thin a. Hei hi va sawiselin Mizo hming - Liana, Rova,Thanga etc tih veka rawn thlak turin Text Book Committee-ah a va thlen a. Lo pawmin an siamtha nghal vek bawk.

8) Mizoram Calendar ah hian thlalak hrang hrang an tarlang thin a, hetah hian a thla mil deuh a thlalak dah a rawt thin a, Vanglaini chanchinbuah te pawh a chhuah thin. Entirnan: September thla velah chuan Favang lam lantirna te, tin December thlaah chuan Isua pian lampang emaw, Krismas lam hawi thlalak dah thin se a inhmehrem zawka a hriat thu hi a sawi fo thin.

Serchhip tana hmathlir ziahna VISION SERCHHIP ka tihchhuahna kawngah khan a kul a taia min fuihtu leh thurawn min petu a ni a, contribution tam tak a nei nghe nghe. Amah pawh kha Serchhip khawtlang hmasawnna tur hian Vision tha tak tak a nei a, mahse tar chaklo an nih tawh avangin chet zung zung a harsa tawh a, a aiawha khawtlang hriata thu leh hla hmanga puangzar tur hian min fuih fo thin.

SEDAL ah kan khaipa ber zing ami a ni a, a thu leh hla hi kan ngaichang thap thin. Amah kha pa inngaitlawm a ni a, fak a phu a mahse fakna awka kha a dawng duhlo fo thin. SEDAL in kum 2015 a Award kan hlan pawh khan signature tel lova kan pek kha nuam ati thei ngang lova, “nakinah miten an hmu ang a, engemaw tia mahni inchawimawi tuma inseam chawp mai mai emaw min ti pal hang” a tih avangin signature awmin min siamthattir leh nghe nghe.

Pu KL Chhuanvawra hi Serchhip tan channa nasa tak a ni a, a hnathawh hi kan la hlut deuh deuh ang a, thil chikmi anihna leh Serchhip khawtlang tana a thahnem ngaihna te hi amah awm tawhlo mahse a sulhnu atang hian thangthar ten kan la hre chho zel dawn a nih hi.

Ka pu, ka ngai dawn hle mai che….

I thianpa,

Laldina