Consumer te i harh ang u-III

(Retailer atangin Buhfai lei dan thar)

India sawrkar hian a khua leh tui te hamthatna leh awlsam zawkna turin Dan hrang hrang a siam a, heng Dan te hi tam tak chu khua leh tui te tana thil buaithlak leh harsa tak awm a lang te a awm nual a, amaherawhchu mithiam ten uluk taka an duanchhuah leh chhuizui anih avang hian belhchian meuh chuan mipui te tan a lo tha hle zawk thin.  Hemi chungchangah hian mipui(consumer) te hian kan dan leh kan dikna chanvo kan hriat a, hemi chang thei tura kan auchhuah ve a tul chang pawh a awm thin. Sawrkar dan siam tha tak hi mipui leh sawrkar inkara palai hna thawktute hian an kenkawh that tawkloh vang te leh an inthlahdah avang tein mipui te hian harsatna tam tak kan nei fo thin.

Tunah pawh hian India ram pumah National Food Security Act 2013 chu a tak taka hman tan a nita a, hei hian India khua leh tui, a hausa ber atanga a rethei ber thleng a nghawng nghal a. Hemi chungchangah hian mipui ten kan chanvo humhalh tur leh kan hriat tur tam tak a awm a, chung zinga a pawimawh zual chu lo tarlang ila:

• FSA hnuaia PDS hmanga Buhfai sem reng rengah Buhfai hi thla bi hisapin(kartin hisap ni tawh lovin) pek zel tawh tur a ni.
• Fair Price Shop(Retailer) ten Buhfai a buk tling ngeiin an buk tur a ni a, bukna diklo hmang an awm chuan hrem tur a ni. Retailer te hi thla khat chhung Sunday tih lohah zing lamah dar 6:30-8:30 leh tlai lamah dar 3:30-5:30 inkarah an inhawng ngei ngei tur a ni.
• Retailer ten consumer te hnenah tihluihnain hun tiam bituk chawpin Buhfai an laktir tur a ni lova, an dawr hawn bi hun sawrkar dan awmsa bak an tidanglam tur a nilo.
• Thla khat chhung quota kha tum khata lak a ngaih tawh avangin mi rethei leh nitin inhlawhfa te tan thla tir lama Buhfai a hlawm a lak kha harsatna a awm thei a. Hetiang ang sum leh pai lama harsatna nei tan chuan thla tawp lamah pawh Buhfai hi a lak theih a ni(Retailer te hi thla khat chhung an inhawng tur a nih avangin thla tira pawisa kan remchang lo anih pawhin thla tawpah a lak theih tho anih chu).
• Mipui ten Buhfai lak nan thla khat chhung hunk an neih avangin kan quota kan lak hma chu retailer ten Buhfai an tiral/hralh thiang lo.

Heng sawrkar dan thar te hi mitin ten kan hriat a, kan zawm tlan a tha hle. Sum lama harsa deuh tan chuan thla khat buhfai lakna tur kha lo inkhawl lawk a tha hle a ni(Tun hma angin kartin quota ang a sem anih tawh loh avangin vawi khat lakah thla khat quota lak zel tur a ni).

Harsatna nei emaw zawhfiah duh nei emaw, complaint duh kan awm chuan Serchhip District Consumer Association hruaitute hnenah emaw, Legal Metrology Serchhip hnenah emaw englai pawhin complaint theih reng a ni e.

-          Laldinpuia

Secretary

Serchhip District Consumer Asscociation