Kan Hall sak hi enge a hming kan phuah ang?

Serchhip khawpui lun lai tak leh hmun rem takah hmana Serchhip Town Hall kan lo tih thin chu thiatin a aia lian leh thain Hall lian tak mai tunah khian sak a ni a, hawn theih mai turin peih thawkhat a ni tawh nghe nghe. Serchhip khawpui laili taka hetiang ang Hall lian tak awm hi Serchhip mipui te hian tangkai taka kan hman a tha hle mai. Hetih lai hian Hall hming sak chungchangah hian sawi neuh neuh leh titi lengvel a tam a, sawrkar lam leh khawtlang huapin official-a a Hall hming phuah a la ni lo bawk a rawtna neih hun laitak niin a lang:

Pastor Chhawna Hall: Serchhip Kawnpui North Branch ten Serchhip(Kawnpui) Diamond Jubilee an lawm(2015) khan a lawmna bannerah Pastor Chhawna Hall tiin an dah a, chu banner chu tuna Hall sak mek bangah khian tar a ni a. Serchhip Kawnpui North Branch YMA te hian an Branch huamchhunga awm anih avangin inti neitu takin he Hall sak thar hi ‘Pastor Chhawna Hall’ tiin an lo phuah mai niin a lang.

            Pastor Chhawna hi Presbyterian Tirhkoh, a hnua Pastor a nemngheh tak a ni a. Kum 1934 chho bawr velah khan Serchhipah Tirhkohvin a awm thin a. Serchhip khaw hmunhlui a awm laiin thlarau pawlna changin zel angin a awm thin a, tuna Serchhip Damdawiin sakna hmunah te hian zuk kalin, Damdawi In a la din tur thu te, kawngpui a la kaltlang tur thu te hi a zuk sawi thin a(kha tih lai khana tuna Serchhip hi ramhnuai mai a la ni). Hetianga Serchhip tuna kan awmna lo hmu lawktu leh lo sawi lawktu anih avang hian ama hming chawiin Pastor Chhawna Hall tih hi an phuah ta niin a lang.

            A lehlam zawngin han thlir ta ila, Pastor Chhawna Hall tih ni ta se, tuna kan Hall hi a sak dan phungah Sport item hrang hrang khelh theihna tura duan a ni a, a Hall hming phuah nen hian sawi zawm a rem tehchiam lo. Engtik hunah emaw chuan Concert te emaw, khawvel thil deuhva punkhawm a tul hun a awm mai thei a, chutih hunah chuan Pastor Chhawna Hall tia han lamrik kha a la inthlahrunawm rum rum hun a la awm mai thei e. Ngaihtuah chian deuh chu a tha ang.

Serchhip Town Hall: Kan Hall hmasa zawk hming Serchhip Town Hall tih kha put chhunzawm tir leh mai tura rawtna te pawh social media lamah te chuan ari chhuak bawk a. Hei hi a awm viau mai. Amaherawhchu tuna kan sak dan phungah khi chuan Town Hall anga duh hun huna mipui vantlang punkhawmna atana hman chu a rem loh chen a awm mai thei e, Sport lampang hian an intih neitu viau hmel a, tin a chhung khi inkhelhna (Badminton leh Table Tennis) tur atana duanlawk deuh sa a ni hrim hrim bawk a. A piah lawkah Auditorium lian leh changkang tak tur rel ut a ni bawk nen, Serchhip Town Hall han tih tawp atan chuan a rem zanlo deuh a ang.

Serchhip Indoor Stadium: Social Media kaltlangin mi thenkhat chuan Serchhip Indoor Stadium tih a inhmeh ber ang tiin rawtna a awm bawk a. Stadium ang tak tak chu ni lemlo mahse, rawtna dang awm zingah chuan a inhmeh ber awm mang e a tih theih. Sport item tan bika siam a ni deuh a, chuvang chuan Serchhip Hall emaw Serchhip Indoor Stadium emaw tih mai kha chu thil remchang tak niin a lang. Khi Hall khi Badminton leh Table Tennis khelh nan bak kan hman tam vakloh hmel a, engemaw laklawh thilah mipui punkhawm nan emaw function eng eng emaw hman nan emaw chuan a rem viau mai thei. A hall hnuai lam khi Rifle Association hovin an luah dawn ni a sawi a ni bawk a. Chuvang chuan Sport Discipline hrang hrang awmna anih avangin a hmingah pawh Serchhip Indoor Stadium tih mai khi a inhmeh ber niin a lang.

            Heng tarlan baka a hming tur tha deuh hria kan awm anih pawhin zalen taka duh duh rawt hun lai a ni a, chuvang chuan a rawt tur hria chuan rawt zel ila, kan thuneitu leh khawtlang hruaitu lam ten a Hall hming tur chu tha tak an rawn phuah/vuah turah ngai ila. Engapawh nise a Hall hming chu mipui tam zawk ina kan pawmtlan theih nise a tha hle ang.

-          Laldinpuia 24.2.2016