TV en dan thar tur leh a nghawng

(Digitalization of Cable TV Network)

India ram hi khawvela ram zau tak mai a ni a, kum 2015 kum tawpah India ramah hian mihring tluklehdingawn 1.29 (1,292,896,847) zet kan awm a, China dawtah khawvel a mihring tamna ber kan ni. India ramah hian mihring hi kan pung chak hle a, kum 2030 ah chuan Khawvela mihring tamna ber kan ni dawn niin mithiam te chuan an chhut lawk hial a ni. Hetiang khawpa mihring tam enkawl hi thil hautak tak mai a ni a, chuvang chuan India khua leh tui zawng zawng chhinchhiahna National Population Register pawh a lo duang chhuak tawh nghe nghe.

            Sawrkar chuan tunlai khawvel changkanna mil zelin mipui te hamthatna leh awlsam zawk nan kawng hrang hrangin hma a la chho zel a, computer thiamna leh tunlai khawvel changkanna leh hmasawnna te pawh ram inrelbawl nan leh mipui leh sawrkar inkara indawr tawnna kawnga a awlsam zawk nan a hmang chho ta zel bawk a. Chutianga ruahmanna a siam zelna karah chuan India ram danpui siamtu Parliament chuan kum 2011 December thlaah khan India ram puma Cable TV te Analog atanga Digital System a thlakna tur dan The Cable Television Networks (Regulation) Amendment Act chu passed in hei hi Digitalization of Cable TV kan tih tak lo intanna chu a ni.

            Cable TV Digitalization-ah hian thil kalphung tam tak a inthlak dawn a, tun hmaa kan TV lo endan phung pawh engemawti kawng tak chuan a inthlak dawn anih hmel. Tunhma chuan Local Cable Operator te hian Direct in Company te dawrin Cable TV hi khaw hrang hrangah eizawn nan an kalpui mai thin a; tunah Digitalisation hnuaiah erawh chuan thil kalphung a danglam vek dawn a. Mizoramah tunah hian (as on Dec 2015) Laldailova Pachuau & Sons(LPS) te chauh hi official license lei an la ni a, ZONET hi license nei mai tura ngaih a ni bawk a, chuvang chuan anni thuhnuaiah hian Mizoram puma TV nei Cable TV zawm duh zawng zawng te chu kan inthlung khawm vek tawh dawn a. An ni hi MSO(Multi System Operator) tih an ni ang a, an ni hian khaw hrang hrangah agent neiin chung an agent LCO(Local Cable Operator) te chuan LPS leh ZONET hnuaiah Digitalization TV chu an lo enkawl ve leh chhawng tawh dawn a ni.

            Tuna Cable TV atana an hman hrui hi la hman a nitho ang a, mahse hrui hmawrah hian Set Top Box vuah a ngai tawh dawn a, Set Top Box tello chuan Cable inzam ringawt mahse, a nung thei dawnlo a ni. Tin Set Top Box chuan Viewer Card a keng tel ang a, chu viewer card hmang chuan LCO emaw MSO emaw te hnenah kan channel en duh ang kha a man kan pe ang a, a man kan pek hnuah chauh kan en thei tawh ang.

            India ram puma TV Digitalization tur atan hian Central sawrkar chuan ruahmanna fel taka siam a, a thawh khatna atan India rama khawpui lian 4 – Delhi, Mumbai, Chennai leh Kolkata te chu Oct 31, 2012 atang khan Digitalize tan a ni. A thawh hnihna chu March 31, 2013 khan State 15-a khawpui 38-ah neih leh a ni a, a thawh thumna chu Urban area zawng zawngah December 31, 2015 ah neih a ni leh a. A thawh lina leh a tawp ber tur chu December 31, 2016 ah India ram pumah tih a ni ang. (Mizorama Dec 31, 2015 zanlai a Cable TV Analog signal tihtawp tura tih chu LPS leh ZONET ngenna angina Mizoram Chief Minister in Central-ah January 2016 thla thleng hun a dilbelh avangin pawhsei a ni).

Cable TV Digitalization chungchanga hriattur tul te:

1)      SET TOP BOX hi neih ngei ngei tur a ni a, Set Top Box tello chuan TV en theih a ni tawh dawnlo a ni.

2)      Cable TV Analog System hnuaiah khan channel 200 chin bak a pek theih loh a, chung zingah chuan channel 60-100 vel bak fiah takin pek theih a nilo. Mahse Digital Cable TV system-ah hi chuan channel 500 atanga 700 thleng fiah faitakin pek theih a ni thung dawn a ni.

3)      TV signal fiahlo thin lutuk hi Digital Cable TV ah chuan a awm tawh lo ang a, ruah sur maw, tek tla emaw, chhum zing emaw avanga signal man fiahlo hi awm lovin channel zawng zawng a fiahfai vek tawh dawn a ni.

4)      Digital Calbe TV hnuaiah chuan mi tu pawhin kan en duhzawng channel kan thlang thei taw hang a, kan en duh loh channel chu paih bovin kan en duh channel en man chiah kan chawi tawh ang.

5)      Digital Cable TV hnuaiah hian Basic Tier Service an tih Free To Air channel 100 bawr vel a awm dawn a, hemi ah hian Doordarshan channel 18 leh news, sports, infotainment, music, lifestyle, movies and general entertainment atangin channel 5 theuh a awm ang. Hemi FTA channel 100 man hi Rs 100-150 a ni ang.

6)      FTA bak zawng hi chu mimal in kan channel en duh zawng(MSO in package an siam dan a zirin) kan thlang thei ang a, a en duh tam deuh chuan kan chawi tam tawh mai dawn a ni.

TV Digitalisation in a nghawng tur te:

Sawrkar (Central leh State sawrkar):

1)      Service Tax leh Entertainment Tax ah 60%-70% in sum hmuh a pung tura ngaih a ni.

2)      Cable TV atanga sawrkar revenue hi nasa takin a pung dawn a. Tunah hian TV awmna in hi 14 crore vel India ramah a awm a, heng zinga 80% te hian Cable TV an ring a. Tuna TV Digitalization hnuaia en man tlawm ber Rs 100/- anga chhut pawhin thla khatah TV bill atanga revenue awm hi 1200 crore zet a ni ang!

3)      TV Channel zawng zawng hi an thuhnuaiah a awm tawh ang.

4)      Sawrkar in a duh phawt chuan TV channel leh an thilchhuah te hi 100% in a thunun thei ang.

5)      TV Advertisement tihchhuah chungchangah thu a nei ang a, a thunun vek bawk ang.

6)      MSO leh LCO atangin registration fee ah sum a lalut teuh teuh ang.

Broadcaster (TV Channel neitu):

1)      An channel pekchhuah atanga sum lakluh 60% - 70% in a pung ang.

2)      An channel pekchhuah chungchangah MSO, LCO leh consumer te an thuhnuaiah an dah thei tawh ang.

3)      Advertisement pekchhuah danah thuneihna a nei ang.

4)      An channel pekchhuah kawngah sum senbelhna dang a awm tawh loving(enkawl zui, survey, tih lar.etc angchi te)

5)      TV Channel thenkhat dang te nena inkara inelna awm thin a bo tawh ang.

6)      LCO tena anmahni atanga advertisement an lo lak ve mai ang chi kha a awm tawh lo ang a, advertisement tenau ber thlengin an thuhnuaiah a awm vek tawh ang.

Multi System Operator (MSO):

1)      Sunscriber atanga an sum lakluh 60%-70% in a pung ang.

2)      LSO leh Consumer te an thuhnuaiah an dah vek tawh ang.

3)      Local Channel dangte nena inelna an neih thin (show/competition) ang chi te kha a bo tawh ang. (Consumer ten an channel en duh chauh a man an pek dawn tawh avangin).

4)      He TV Digitalisation kengkawh tur hian khawl vuah belhna atan sum an sen belh teuh a tul ang.

5)      An subscriber te hnenah Set Top Box an supply ang.

6)      Consumer te enkawlna kawngah ruahmanna thar, felfai leh kimchang tak an neih a tul.

7)      An hnuaia an agent LCO te an enkawl ang.

Local Cable Operator (LCO)

1)      Anni hi MSO hnuaia awm an ni ang a, MSO nena an inrem siamna angin Digital Cable TV an enkawl ang.

2)      Channel pekchhuah chungchangah anmahniin thuneihna an nei lovang a, MSO in Channel package a siam ang ang chu an lo commission ang.

3)      MSO in direct a a thlen phak lohnaah mipuite hnena connection petu leh a fee collect-tu ber an ni ang.

Consumer (mipui te):

1)      TV channel fiahfai tha takin an en thei tawh ang.

2)      A hmaa channel 100 bawr vel chauh en thin khan channel 400 vel an enin duh an thlang thei tawh ang.

3)      Set Top Box man pawisa an sen belh a ngai ang.

4)      TV Channel Package en na man an en tlem leh tam dan zelin an chawi tawh ang.

5)      Local Advertisement, local channel atanga man tlawm te te a tih thin te kha a tih theih tawh lovang.

6)      TV Channel an en duh an thlang ang a, an enduh loh chu a man an pek a ngai lovang.

7)      TB Bill a bat theih tawh loh vang a, Set Top Box an neih loh chuan TV an en thei lovang.

………………………….

-          Laldinpuia

Secretary, Serchip District Consumer Association