A hmingah chuan LALRELFELA (The story of our struggle for our first new born baby-II)

Harsatna thuah hnih

            Nau kan neih atanga ni 2-naah chuan chhuak tura kan inngaih laiin Doctor te chuan kan chhuah theih loh thu min hrilh leh ta thut mai a. Kan naute chu a hma zanah a khawsik an hmuh leh avangin, "Ni 5 dang in awm leh a ngai" tiin kan naute chu min laksak a, NICU ah min dah sak ta daih mai a. Naute nu chu an chhuah tho avangin kan nau neihna Bill erawh chu kan pek theih thu min hrilh a. Nau nei e ti lovin naute tel lovin ward-ah chuan kan han riak leh ta rih a!

            Bill chu ka han en a, Rs 9440/- a ni a. Keini ang Sawrkar chhawr ni si, MR bill thei silo tan chuan a tam hma khawp mai. Mahse a tam tih lohna riau ka nei tlat! Kan Doctor rawn hmasa khan private a inzai a ngaih chuan Rs 40000/- vel a ngaih tur thu a sawi kha kan hrereng a,  nun hlutzia kan hria a, chuvang chuan neihthinglungkhawng tak meuh meuhvin Rs 40000/- chu kan intuak ngah ve hram a, khami mitthla chung khan Aizawl kan chhuk thla kha a ni a. Durtlang-a kan Bill chu ka han en thin a, ka thawveng huai mai, kan inrinlawkna nena thlir phei chuan a tlem hi ka ti em em mai a, sum kan neih ngah vang erawh a ni hauh si lo!

Mihausa leh rethei inkar

            Mihausa leh rethei inkar a zau an tih fo hi ka hre ve tawh thin a, 'kan ramah mi hausa leh rethei inkar a zau a ni' ti a chanchinbu a thahnemngaih thu auchhuahpuituah ka tang ve tawh thin a. Mahse a takin ka tawng ang tih reng reng ka ring pha ngailo. Mahse ngaihbel theih tur tingin ka tawng miau si.

            Khatia, Aizawl Private Clinic pakhat atanga kan beidawng kan chhuah dan leh thil kal vel dan te kha ka chhuikir mai mai a: Doctor khan kan nu kha a vun nasat avangin a kal(Kidney) tan a hlauhawm thu leh zai vat vat a ngaih thu a sawi kha a ni a. 'Karleh thawhlehah lokal ula Civil Hospital-ah khum kan chan dawnloh chuan Nilai-ah emaw Ninganiah emaw private-ah inzai mai a ngai ang' tih kha athu min chah kan chhungkaw timangangtu chu a ni. Tichuan Civil-a khum chanloh thut pawh a, nunna chhan nan chuan ti a Private a inzai thei mai tura pawisa pawh indapkhawm kha kan ni a. A sawi niah tak chuan Doctor chu kan hmu leh a, khatia Doctor kan hmuh leh hma khan thian ten kan chhungkaw dinhmun harsat thu leh Civil a khum kan chan hram theih nan an theih ang tawkin min lo sawipui tih ka hria a. Tichuan Doctor chu kan hmu leh ta ngei a, mahse Civil-ah khum kan la chang chuang lo, zai hmanhmawh a tul thu a sawi pah reng bawk si a. Kei chuan a kawtawp ah tangin, "Anih leh Civil a khum kan chanloh chuan nilaiah Private-ah chuan min zai mai rawh, pawisa chu kan indapkhawm ve a kan nei thei mai ang" ka ti a. Ani chuan, " Private chu a to lutuk, in chhungkaw dinhmun ka hria a, intlin lovang" min ti ta tlat kha a ni a. Ka hrilh nimiah lovin kan chhungkaw dinhmun a lo hria a, emergency tawpkhawk ah pawh inzaina man pawisa kan pek theih dawnloh ai chuan min zai a duhlo(?) ni a hriatna ka nei a, ka thinrim thar leh ta thut mai. Mahse engkim mai chu Van Pathian chuan a lo rel fel zel a lo ni.

Pathian thil rel dan

            Kan dinhmun harsat leh retheihna avanga hlawkna ringawt uma eizawngtuten min tih beidawn lai khan Pathian chuan fel takin kan zawh tur kawng a lo ruahman a, mahse chumi kawng zawh tur chuan zan thim hnuaiah kan mittui a luantir phawt a lo ni. Kha harsatna leh manganna kha tawklo ila Pathian malsawmna kan dawn nasat zia hi tun ang em em hian ka sawi darh kher lovang tih te ka ngaihtuah a. Pathian thil rel dan hi mihring te tan chuan hriatfiah a lo har em a ni!

Malsawmna

            Kan nau neihna man Rs 9440/- chu lungawi takin ka pe a. A hnuah kan naute pawh chu tha chho zelin NICU a a awm atanga ni 4 na(15.9.2015) ah chuan Damdawiin atang chuan kan chhuak fel thei ta a. Kan chhuah dawn chuan naute enkawlna man chu Bill dang a lokal leh a Rs 6300/- a ni a. BPL ah ka awm lova, Sawrkarah MR ka bill theih bawkloh avangin ka dinhmun a laklawh hle a, mahse inven nan tiin APL Health Care ah Rs 500/- ka lo dahkham ve hlauh a, kha khan naute enkawlna Rs 6300/- chu a bill theih thu Damdawiin hotuten min hrilh chuan ka lawm hle mai, Van Pathian chuan kan harsatna te min chinfel sak hnuah malsawmna bonus min la pe lehzel anih hi ka ti a. Hlim takin ka bill chu ka pe a, Synod Hospital-a kan awmchhunga thawktuten min enkawlnaah sawisel tur ka nei lova, ka lawm em em a ni. Lawmthu sawi nan Bill ka pek fel vek hnuah Hospital tanpui nan Rs 1500/- ka pek belh leh nghe nghe a. Mahse sum leh pai chuangliam ka ngah vang a pe erawh ka nilo.

A hmingah chuan LALRELFELA

            Kan chunga thil thleng zawng zawng kha ka chhuikir a, ka mittui tla a reh thei lova. A malsawmna ka dawn zawng zawng te, manganna ka tawh zawng zawng te kha ka chhui let leh hian engkim mai kha Ani chuan a rel fel zel a, kan mangan viau lai te kha kan awmdan tur engkim kha a lo rel fel vek tawh a, chumiah chuan zawi muangin kan tawlhlut zel zawk a lo ni tih ka hria a. Min tibeidawngtu Doctor khan Pathian hmangaihna ropui zia min hrilh zawk reng a lo ni tih ka hria a. Chuvang chuan kan awmdan engkim kha mihring ruahmanna piahlam a Van Pathian ro rel ang zela awm kan nih tak avangin kan fapa lo piang pawh hi a hmingah LALRELFELA tiin kan phuah ta a ni.

Laldinpuia

19.9.2015