Kan tan nau a lo piang a (The story of our struggle for our first new born baby)

Beidawnna

            Aizawl Civil Hospital bul a Aizawl a Doctor thiam ber pawla an sawi Private Clinic atanga ni 8.9.2015 zan dar 6:00 vela kan chhuak chu beisei a bo hle mai. A hma lawka Doctor nena kan inbiak dan zawng zawng te kha haw kawngah chuan ka ngaihtuah let leh neuh neuh a. Kan nu raipuar luah tawh mai chu a nau neih la hun lo mahse chu kan Doctor rawn chuan neih pangngaia a neih theihloh tur thu leh zai chhuah a ngaih thu min hrilh avangin leh zai chu a hmanhmawh thlak thu a sawi avangin rilru hmanhmawh tak chungin kan pan kha a ni a. A chhan chu kan nu raipuar hi a vung nasa em em mai a, a thisen a sang bawk a, chuvang chuan atan pawh a hlauhawm theih thu doctor chuan a sawi a chumi anih avang chuan a rang lama naute zaichhuah chu a damdawi awmchhun a ni. 'Ni 8.9.2015 ah lokal ula, ni 11 ah Civil Hospital-ah zai hram kan tum anga seat kan chan loh chuan ni 9 or 10 ah Private Clinic ah kan zai mai dawn nia' ti a kar hmasa lama Doctor thurawn chu bawhzuiin hemi ni pawh hian in entir turin Civil Hospital-ah kan kal a ni a, Doctor hi Hospital-ah a thut loh avangin hmanhmawh tak chungin a Clinic-ah kan pan leh kha a ni a.

            Doctor chuan test report kan ken ang ang te chu a han en nawn leh a, "Zai vat che u chu ka duh mawle, mahse Civil ah khum ruak a awm rih tlat lova a buaithlak ka ti khawp mai" a ti a, kei chuan, "Ka pi, kan dinhmun hi a tha vaklo niin i sawi si a, emergency in  min zai thei mai lawm ni" tiin ka zawt a. Ani chuan, "Emergency in tihluihnain tidawn ila chu khum chan dan chu a awm mai thei, mahse midang pawh nangmahni ang thova nau neih hun an ni ve a, midang seat luahlan kha in tan a nuam bik dawn em ni?" a ti a.

Kei chuan, "Ka pi, midang luahlan chu kan duh bik miah lo mai, chuti anih chuan Private Hospital-ah min zai mai la," ka ti a, ani chuan, "In indinhmun ka hria a, Private ah chuan a to lutuk, in tlin lovang, chu bakah chutia tih mai theih a ni lo, book lawk ve a ngai ve a, aaa.... ni 10(Thursday) ah OPD ah lokal leh phawt ula Zirtawpah zai ngei ngei dan kan zawng ang a, chuta khum kan chan loh chuan kar leh lamah chuan zai ngei ngei ka tum ang " a ti a. Kei chuan, "Ka pi i sawi hmanhmawh em avangin Private ah pawh min zai mai rawh ka ti kha a ni a, chutia kar leh lamah pawh a theih dawn chuan kan nghak thei tho alawm, kan dinhmun hi a serious lutuk lo tihna a ni maw?" ka ti a. Ani chuan, "Chu tak chu ka buaina a ni, in dinhmun ka en hian zai vat che u ka duh a, mahse khum kan chang thei si lova tihngaihna a awm ngang lo a ni, ka rilru in tihah khawp mai" a ti a, chhan dan tur ka hre tawh lo. Tichuan a Clinic chu kan chhuahsan ta a. Pawn kan thleng chiah chu kan nu chu a rilru na leh hlauthawng chu a insut hlap hlap a, ka han hnem ngial thin a, mahse kei pawh ka ngaih a tha chuang lo.

            Naute tluang taka nei tura kan inngaih laia, zai chhuah a ngai nghal ringawt tur te, kan duh ang hunah pawh a zai chhuah theih dawnloh tih thu ka hriat khan ka hlauthawng a. Kan nu dinhmun hi a thatloh phah ang tih ka hlau bawk a, a ruk tak chuan ka beidawng a ni.

Beiseina

            Zanah inah kan haw thla a, kan nu chu a rilru a beidawng tih ka hria a, chaw aei thei lova, ka be tawng hleithei lo. Chhungkaw ho chuan kan han hnem liam liam hlawm a, mahse kan hlauhthawn ber lai chu Doctor ina zai vat a that thu min hrilh chu a ni. Rilru baihvai leh beidawng taka ka awm reng lai chuan beiseina pakhat ka nei, a hma a kan duh loh hnu Synod Hospital Durtlang chuan ka rilru a la ta tlat mai. Zan Dar 8:30 velah Hospital casualty ka phone a, kan harsatna te ka han hrilh hnu chuan Damdawiinah chuan chho turin min ti a, tichuan zan dar 9 velah chuan Durtlang Hospital pan chuan Taxi in kan inphur chho ta a. Hospital kan thlen chuan ka thian nurse duty te chuan min lo buaipui a, kannu chu a BP an han check a, a lo sang nasa hle mai a, tichuan min admit nghal ta der mai a. Civil Hospital-a khum chanloh avanga lungngai a indawmkun reng khan Durtlang Hospital-ah chuan khum nuam tak kan chang ta der mai a, eng ang pawhin nau chu nei pawh ni ila tunah chuan rilru a thlamuang a, beiseina eng tak kan nei thei ta.

Doctor inanglo

            Aizawl a Doctor thiam ber pawla an chhal kan rawn khan kan test report leh ultra sound film chu a han en vang vang a, "In nau hi a lian lo, rai lian viau anga i inngaih hi i vun nasat vang mai mai anih hi. I nau hi kg 2 500g vel bak a ni lovang.... I vun nasat avang hian neih pangngaiin i nei thei lovang, zai chhuah ngei ngei i ngai anih hi. I dinhmun hi tha viau anga a lan lai hian hlauhthawnawm rukna lai riau a awm" min ti a, a tawngkam chu a nelawm hranlo hle. Mahse Doctor an ni a, an thu leh hla kha ihe lovin kan lem duak duak lo thei si lo. Rilru chu a buai duh map map hle.

            Durtlang Damdawiin inah kan han indah lut a, a hmaa Doctor kan inentirna leh test report te kha engahmah an ngai lova, an hran vekin test min neihtir a. Durtlang Doctor Pu Remmawia chuan kan test report te, ultra sound report te chu a han en vang vang a, "Engmah hlauhthawn awm a awm lo. Thatlohna i nei lo, i nau pai hi a tha lutuk tlat, nang pawh i pangngai vek. I vung pawh hi i rai vang mai mai a nih hi. Zai i ngailo reng reng, neih pangngaiin i nei thei ang. Tin, i naute pawh hi a te lo, a lian tha lutuk Kg 3 700g vel anih dawn hi. Naktuk(10.9.2015) ah i nei nghal mai dawn nia," tiin awlsam takin min chhang a. A tawngkam chu a thlamuanthlak hle mai. A tawngkam tha lutuk chu zep ruk a nei emawni chu aw, Doctor hmasa nen an sawidan a va inanglo em em, ka ti rilru a, ka rilru chhungril takah chuan ngaihthatlohna engemaw takin min mawlh tlat mai.

Nau a piang ta

            Ni 10.9.2015 a nau nei tura min tih avangin hemi ni hi chuan naute changin damdawiin kawtah kan thu nileng a. A ninawm duh hle mai. Tih tur a awm silo. Tihtur nei lova awm mai mai hreawmzia ka chhar chhuak a. Ka ril arah fa lo piang tur chu eng angin nge a lo pian ang? Mipa nge Hmeichhia ni ang? Neih pangngaiin a nei thei ngei angem? ka rilruah zawhna tam tak a lo lut zung zung a. Beisei nei tak, mahse hlauthawng tak chung chuan darkar tin chu kan chhiar liam zel a.

            Zing dar 8:00 velah nau neihna room-a an dah lut kha a reh vang vang a, bul lawk khum ami te chuan naute an rawn nei chhuak sup sup a, keini erawh nau nei thawm hriat tur a la awm lo. Dar 3:00 a rik velah chuan naute kan neih thu chu nurse te chuan an rawn sawi ta, mipa ngat a ni! Hemi ni(10.9.2015) hian Durtlang Hospital-ah hian nau 23 an piang a, chutah chuan mipa 2 chauh awmin mipa pakhatzawk chu ka fapa ani tih ka hriat chuan ka lawm hle mai. Tin a hmaa Doctor kan rawnin zai a ngaih thu a sawi uar viau laia, Durtlang Hospital-a zai ngai miah lova awlsam taka kan han nei mai te hi a mak hle mai.

            Kan nuin nau a hring ta tih ka hriat tirh chuan sawi tur ber pawh ka hrelo, ngawi rengin kawtah ka tlanchhuak a, zuninah ka lut a, zun hing rim nam rum rum karah chuan Van Pathian ka ko a, lawmthu ka hrilh a, "Lalpa ka lawm e" ka ti a, tichuan inchhungah ka lut a, naute leh a nu chu hlim tak mai hian ka va hmu a.

"A hma lawka kan hreawmna leh beidawnna zawng zawng te kha Pathian chuan a hrereng a, a hnathawh ropui tak kan hmuh theih nan harsatna paltlang tur min lo siamsak leh a ni reng mai tih ka hrechhuak ta a. Amah a innghah hi chuan engkim hi a rel fel mai thin a lo ni".

- Laldinpuia

10.09.2015