My tribute to Pu Thuama

Proloque:

            Ni 3.9.2015 ka zing thawhin zan lama ka Whatsapp message mut hnua ka dawn ho ka enkual niap niap a, message pakhat thinthawng deuh mai ka hmuh chu, "Pu Thuama chanchin i hria em?" tih a ni, ka bangbo hle mai. Thil awmzia ka han zawh chian chuan a hma ni tlaia ka thianpa Pu Thuama MZY Campus-a a chetsual thu chu ka hre ta a.  MZU Campus a ka hmelhriat dangte ho ka han phone kual a, Pu Thuama chu Aizawl Hospital ICU ah dah a ni a, a dinhmun a tha lo hle tih chu ka thuhriat awmchhun a ni. Ni 3.9.2015 nileng khan chu chanchin ringawt chu ka ngaihtuah a, ka ngaih a tha thei lo.

MZU Hostel

            Kum 2006-2008 MZU Hostel a kan awmlai kha ka hrechhuak chuai chuai mai, MZU Campus Quarter a awmho zingah khan Hosteller te chuan Pu Thuama kha kan nel ber leh biakrawn ber a ni. A chhan chu a fel a, biak a nuam a, a inngaitlawm a, a intithu thiam bawk a, a bak chhan dang pakhat a la awm; MZU Office chahbi kawltu a ni tlat! A tawp ber hi kan tan a pawimawh zia chu a ziaha ziah zawh sen chi a nilo. Amah avanga kan chhungte thingtlanga awm kan biak theih phah te, kan zirna kawnga sum kan save hnem zia te kha sawilan ngam loh sawilan loh theihloh si a ni. Hostel a kan roomah a lo leng a, a inah kan leng bawk a. Kan tan khan a hlu em a ni, a bik takin kei ka tan.

MZUCCF

            Mizoram University Campus-ah khan Kohhran baihvai takin kan ding ve a, Hostel kan awm lai kha kan din tirh lai vel anih avangin a khawhar thlak thin hle a. Kum 2007-2008 ah khan MZUCCF Secretary ah ka awm a, Pu Thuama kha engkimah kan rawn a, zirlai te leh Quarter te inkara inhmuhthiam lohna a awm pawhin thubuai remtu berah kan hmang a, MZUCCF hming a rik tawhin mimal hming kan lamrik hmasak ber chu Pu Thuama a ni reng thin. Kha tih hunlai khan Hostel Dining Hall ah kan inkhawm thin a, mi 10 lek hmaah te khan thahnem ngai takin sermon kan sawi a, Pu Thuama a inkhawm loh tum chuan Quarter lam an rawn tel tha duh thin lova chuvang chuan ruah sur hnuaiah pawh taima takin a rawn inkhawm thin. MZU kan chhuahsan tak hnuah MZUCCF chuan hma a asawn zela tunah chuan Chairman kumhlun a lo ni ta a. Pawn lam atangin MZUCCF chanchin kan hriat duh pawhin Pu Thuama hi kan phone mai thin.

Father and a son

            Kum 2008-ah MZU ka chhuahsan hnuin kum 2009-ah Mphil ka zir leh a Hostel a awm ka peihloh avangin mi inah ka awm lawr a. Aizawl atanga langa MZU kal chu sum leh pai a lo hautak khawp mai a, tihngaihna dang a awm ta lo ama min sawmna pawh ni lovin kan inkawm nel em avangin ka insawilut a, an inah ka awm ta a! Thla khat vel zetzawt chu an inah ka awm a, pa angin ka en a, aniin fa leh thian angin min en bawk a, chhungkaw pangngai ang maiin kan awmho anih kha. A office kal tur leh ka chhuah duh hun a inrual chuan ka bike ah kan chuang dun mai a, tlaiah nise a fanu school bang hruai angaih chuan nau te hruai ang maiin ka va hruai mai bawk thin. MZU kan chhuahsan hnua ka tlawh lehin, an ina lut lova MZU Quarter kal hi ka la nei ngailo. 

The last word

            Kum 2014 December thlaah nupui ka nei a, a bik takin ka sawm a, fapa thin kan nih ang ngeiin buai tak chungin hmun hla takah kan inneih hmang turin a lokal tang tang a, ka va lawm em. Inneih banah thla kan lak te chuan thianho thlalak naah a lang duh lova, keichu a malin ka lakpui duh a ti tlat a, a malin kan nupa chu thla min lakpui ta nghe nghe a. Khami hnu atang khan a reh vang vang a, kumin kumtir lam khan MZUCCF chu sana lian ka present a, Pu Thuama hnena hlan turin ka thiante ka thawn a. August thla tir lam khan Aizawl a ka zinin Vaivakawnah kan inhmu a, a lakah ka vui der a, "Ngatinge i va reh ve, MZUCCF sana lian ka present che u a lawmthu pawh rawn sawi i tum lo" ka ti fiamthu a. Ani chuan, "I hming tarlan i duh si lova, lawm takin kan lo dawnga kan duhtawk mai asin" a ti a a nui hawk hawk a. Kei ta pek chuan, "I induh riau mai, ka lungawi miahlo a nia, September thla velah naute Aizawlah kan rawn nei dawn a, Damdawi inah min rawn tlawh ngei a ngai ang" ka ti a, a ni chuan "Tehreng mai, i nau neih hun min rawn hrilh la, ka rawn kal ang" a ti a, chu chu a tawng ka hriat hnuhnun ber a ni ta! Hei karleh(Sept 11) hian naute chu nei turin kan inruahman a, Pu Thuama hi a lokal thei angem le??!!

End of the Road

            Phone chu ka hmang deuh reng a, "Enge Pu Thuama chanchin" tih chu ka zawhna awmchhun a ni. Zanah ka mutui thei lo, ka thianpa chu thih nghakin Damdawiinah a mu reng tih ka hriat chuan ka rilru a luah a, engdang mah ka ngaihtuah theilo. Ka rilru a chawmawlh a, a hmel hmuh ka duh a ni. Ni 4.9.2015 zing sumo ah Aizawl panin ka thlan thla nghal a, dar 10:30 velah Aizawl ka thleng a. Aizawl Hospital awmna chu ka pan phei nghal a. Hospital kawtah chuan MZU lama hmelhriat thenkhat ka hmu a, a chhung a luh theih loh avangin pawnah kan thu a. Ka thu hle hle thei lova, khual khua atangin ka thianpa thichhawnga let reng chu a hmel hmuh duhin hei leh chen ka lo kal a, hetianga damdawiin pawna thut reng te chu a hreawm em mai ka ti rilru a. Ka tihngaihna hrelo chuan Hospital Counter-ah zah pawh dawn lovin ka lut thla a, ka hmelhriat Maruati a lo duty hlauh a, 'Hei khual khua atangin ka thianpa hmuh tumin ka lokal a ni a, an dahna room a a luh theihloh pawhin darthlalang chhanah tal thlir ka duh, min hruai rawh" ka ti ta tawl mai a. Ani chuan tunah chuan tumah luh an phal lova, inkan a hun bawk si lova, dar 12 velah ka luhpui ang che a ti a, tichuan pawnah ka chhuak leh ta a. A hnu rei vak lovah chuan a chatthla an rawn ti ta mai a. Ka bing mup mup a, zah pawh dawn lovin Counter ah ka tlan thla leh a, Maruati hnenah chuan, "A chatthla an ti a nia, tunah ka hmu duh, mawh... min hruai rawh" ka ti chul a, ani pawh chuan min hrethiam a, duty te chu a dil a luh min phalsak ta a.

Epiloque

            ICU room kawtah rei ngial kan nghah leh hnuah ICU room a luh chu min phalsak ta a, kil khata ka thianpa khuma ngawi renga lo mu chu ka va pan a. Han biak mai ka tum a, min chhang dawnlo tih ka hre thut a, awrawl chhuaha han tah vak ka tum a, min hnem turin a kut a rawn phar dawnlo tih ka hre leh a. Ngawi rengin a bulah chuan ka ding reng a, sawi tur ka hre lova, ka zawhna min chhang thei hek lo. A chetsual dan zawh ka tum a, a ngawi reng a, ka lo thleng tawh asin ka ti a, engtin mah a che eih lo. A hmel chu a ngai reng, ngawi rengin che lovin a mu tlat a, min hre awm pawhin a lang lo, rawn harh se chu tunhma angin min nuih leh vur vur dawn si a. A chal chu dim tein ka vuan a, a vawt vek mai, Nunna a awm tawh lo. A kut ka vuan a, a la vawt tho mai, thlarau takngial pawhin a taksa chu a chhuahsan tawh a ni. A thlarau chu ka la kokir thei mahna ti rilru chungin ka mittui karah chuan ka hawi chhuak a, engmah ka hmulo. A pum chu a che tlat hian ka hria a, beisei nei tak chungin ka han zut a, nunna ka hmu chuang lo. A ke ka zut a, ka tihngngaihna hrelo lutuk chuan a khum tlang chu ka hmer ngawt ngawt a. Muang changin ICU room chu ka chhuahsan a... "Pu Thuama tan chuan chatuan a intan ta...." ka ti a.     

- Laldinpuia

4.9.2015