GOOD BYE, PEOPLE’S PRESIDENT Dr APJ Abdul Kalam (1931-2015)
Kum
1931 October 15-ah Tamil Nadu-a Rameshwaram khuaah chhungkaw rethei tak atangin
a lo piang a, a pa chu Lawngleng enkawltu a ni. An chhungkua an harsat avangin
naupangte a nih lai atangin an chhungkaw mamawh thawkchhuakin a inhlawh thin.
Zirna
lamah a tluang hle a, St Joseph's College, Tiruchirapalli atanga a zir chhuah
hnuin Aeronautical Engineering Madras-ah a zir leh a. India in Satellite hmasa
ber a kahchhuah SLV-III ah pawh khan a buaipuitute zingah a tel a ni. Kum
2002-2007 chhung India President a ni a. President a nih hnuah hian a hna
ngainat ber Scientist lamah let lehin University leh hmun hrang hrangah
thusawiin a kal kual thin.
Dogtorate
Degree hi University 40 chuangin an pe tawh a, Doctor of Science ringawt pawh University/Institution 28 in an
pe tawh bawk. India rama chawimawina awm thei zawng zawng deuhthaw hi a dawng
vek tawh bawk. India ram hi a vei em em a, India hi ram hmasawn anih theih nan
theihtawp a chhuah a. India hmalam hun atan suangtuahna nasa tak a hmang a, chu
a suangtuahna chu a taka chantir turin ruahmanna fel tak a nei thlap bawk.
India ram tana a hmathlir a ziahna Vision 2020 phei chu a larin India sawrkar
pawhin a hmang tangkai hle.
A huntawn thenkhat leh sawizui hlawh a
chanchin tlangpui te chu:
* India President anih a Rashtrapati
Bhavan a luh khan a thawmhnaw leh bungrua zawng zawng kha Suitcase 5 ah a leng
vek a. India President atanga a chawlh a Rashtrapati Bhavan a chhuahsan khan a
thil neih zawng zawng chu Suitcase 7 an a khai chhuak a, Security Guard hnenah
chuan inthlahrung takin India president a nih chhungin lehkhabu a lei tam deuh
a, a bungraw kenluh aiin a lakchhuah a tam ta zawk a ni tih a hrilh a.
* Abdul Kalam-a khan a lehkha zir laia a
nih chak ber chu pilot a ni a. Tum khat chu Indian Airforce-ah Pilot hna post 8
a ruak a, a dil ve a. Midang 24 nen chuan Interview an hmachhawn a, an
interview result a lo chhuah chuan 9 na a ni a, a tling lo chiah chiah a ni.
* India president anih lai khan Andra
Pradesh-a Visakhapatnam khawpuiah Naval base a tlawh a, chutah chuan hmun hran
hran atangin School naupang thlanchhuah te chu a thusawi ngaithla turin an lo
kalkhawm a. Chutah chuan School 300 atangin zirlai 600 leh anmahni hruaitu
zirtirtute an kalkhawm a. Thu a sawi zawh chuan, zirlai te hnen atangin zawhna
a khawnkhawm a, chutah zirtirtu te zinga inti bengvar deuh pakhat chuan zawhna
a rawn zawt a. Abdul Kalam-a chuan, "Zirtirtu chuan zawt rih love,
naupangin zawt hmasa rawh se, an tan a pawimawh a ni. Hun kan neih chuan zirtirtute
tan kan hawng chauh ang" tiin a lo hnial a.
* Defence Research and Developemnt
Organisation(DRDO) a a thawh lai khan an thawhna Building chu misual luh
theihloh nan Building hungna tlangah chuan darthlalang keh them dah a hote
chuan an rawt a, Abdul Kalam-a chuan a lo hnial a, "Darthlalang keh them
bang hungnaa kan dah chuan Sava te an fu tha thei lo ang a, Sava te a hliam
palh ange" a ti a.
* India President a ni dawn a ni tih an
puan tawh hnuah khan tumkhat chu zirlai naupang 400 rual hmaah Hall ah thu a
sawi a. A thusawi lai chuan current a rawn thim ta thut mai a, Abdul Kalam-a
chuan current thim avanga a thusawi tihbuai chu a duhlova, mipui zingah chuan
kal pheiin a laiah a va ding a, school naupang ho chuan an dinhual a, tichuan a
thusawi chu a chhunzawm leh ta a ni.
* A sum neih leh President a nih laia a
hlawh zawng zawng kha India thingtlang mite chawikanna atana a pawl din
PURA(Providing Urban Amenities for Rural Areas) atan a hlan vek a. "Tunah
chuan India President ka ni tawh a, ka damchhung chu sawrkarin min chawm tawh
dawn a, chuvang chuan ka sum khawl leh ka hlawh te hi ka mamawh love" a
ti.
* Tumkhat chu President anih hma sawrkar
mi pawimawh tak anih lai khan College pakhatah an hun hmannaah khuallian turin
an sawm a. Abdul Kalam-a chuan midang hrilhlawk lovin Security tumah hruai
lovin zanah Jeep in a hun hmanna tur chu a va tlawh thut mai a,chu hmuna zirlai
hah taka lo hnatlang te hnenah chuan thu a sawi a, mi hmuhloh lai pawha rim
taka thawktute hi a hmu duh ani tih a hrilh a.
* Varanasi-a IIT Convocation-ah Dr
Kalam-a chu khuallian a ni a. Stage-ah chuan chair panga an hung a, a laia mi
chu Dr Kalam-a thutna tur a ni a, a dang pali chu University Official ho thutna
tur a ni a. Midang thutna tur aiin a thutna tur chair chu a lianin a danglam
bik a ni tih a hmuh chuan a thu duh ta tlat lo mai a, Vice Chancellor chu thu
turin a ti a. Vice Chancellor pawh a thu duh bik lova, tichuan chair dang
milpui tur chu chawpchilh takin an la leh ta ringawt a ni.
* DRDO a project pawimawh tak an khawih
laiin Scientist ho chu an hnaah an buai thin hle mai a. Scientist pakhat chuan
an hotu ber Dr Kalam-a chu hmuin, a fate nen tlai dar 5:30 ah intihhlim nan
Carnival-ah kal an tum avangin haw hma a dil a. Dr Kalam-a chuan awlsam takin a
lo phalsak a. Mahse an hna chu an thawh laklawh em avangin chu Scientist chuan
a haw hma tur chu a lo theihnghilh pek a, dar 8:30 ah inah a haw thei chauh a.
In a thlen chuan a nupui hnenah chuan ngaihdam a dil a, mahse a rinloh tak
maiin a nupui chuan, "In manager chuan dar 5:15 khan kan ina lokalin i
fate chu a lenchhuahpui tawh alawm" tiin a lo chhang a.
Dr
Kalam-a chuan Scientist te chu an hnaah an tui tawh laklawh chuan thildang an
ngaihtuah theilo ani tih a hria a, dar 5 a pelh khan Scientist haw hma duh kha
a hnaah a la tui em avangin a fate hnena a thutiam a bawhpelh tur kha a ngai
ngam lova, amah ngei va kalin a fate chu Carnival-ah a lo va hruai sak a lo ni
a!
* India President chu mi pawimawh tak
takin an hmu thin a, anmahni pawh hian mi pawimawh tak tak in lengah te an sawm
bawk thin. Dr APj Abdul Kalam-a erawh chuan Kerala a tlawh tumin Raj Bhavan-ah
Kerala a kawng kama pheikhawk chhe siamtu leh thingpui dawr te tak te nei chu
Kerala a a awm laia a hmelhriat leh thian te annih avangin official in leng turin
a sawm.
* Madras Institute of Technology(MIT) a
zir dawn tumin admission fee atan Rs 1000 a ngai a, chu chu a pa thawhchhuahin
a daih loh avangin pek tur an nei lova. Tihngaihna dang a awm tak si lovah
chuan a farnu chuan a tlereuh neih te chu a dahkham a, chu a dahkhamna pawisa
chuan a admission fee chu a pe ve thei ta a ni.
*A hnathawh duh ber chu midangte zirtirna
pek a ni a, India President atanga a chhuah dawn khan a Security Guard chuan,
“Ka pu, President i nih loh hnuah enge i thawh ang?” tiin a zawt a. Kalam-a
chuan, “University-ah ka let leh ang a, ka hnathawh chak ber zirtir hna ka
thawk ang” tiin a chhang. A hnathawh chak ber zirtir hna IIM Shillong a ni
27.7.2015 tlaia ‘Livable Planet’ chungchang lecture pek mek laiin a chau thut
a, a tlu a. India rama mi ropui ber te zing ami chuan he khawvel hi a lo
chhuahsan ta a ni.
-
Laldinpuia
28.7.2015
GOOD BYE, PEOPLE’S PRESIDENT Dr APJ Abdul Kalam (1931-2015)
Reviewed by Laldinpuia
on
July 30, 2015
Rating:
Reviewed by Laldinpuia
on
July 30, 2015
Rating:
No comments: