My Memories of Dr APJ Abdul Kalam at Mizoram University

    July ni 27, 2015 zan kha India mipui te tan chuan zan lungchhiatthlak tak a ni ang. India ramin a fa hrin tawha danglam leh mi bik, hma lam hun atana India ram khalh kaltute zinga a fawng pawimawh tak mai chelhtu Dr APJ ABdul Kalam-a'n Shillong IIM hmuna zirlai tam tak te hmaa he khawvel a chhuahsanna khan India ram hi a barakhaih takzet a ni.
    India ram President 11-na a ni a, kum 2002-2007 chhung zawng kha chu India rama hotulu ber a ni. India president anih chhung zawng khan India ram mipui ten an ngainain an fak em em a, a bik takin zirlai naupang te a ngaih pawimawh ang bawkin zirlai ten an fak hle. Mipui ten an duh em avangin ‘People’s President’ tih hial a koh a ni a, India President te zinga mipui President ti a an koh awmchhun a ni. A thiamna leh theihna zawng zawng India ram hmasawnna atan a hlan vek a, sum leh pai hlawkna ai chuan ram hmasawnna tur a ngaihtuah zawk a. Chuvang chuan India President a nih chhunga a hlawh zawng zawng kha ama tan cheng khatmah a hmang lova, India thingtlang mite hmasawnna tur atana a pawl din PURA(Providing Urban Amenities for Rural Areas) ah a hlan vek a, "Tunah chuan India President ka ni tawh a, ka damchhung chu sawrkarin min chawm tawh dawn a, chuvang chuan ka sum khawl leh ka hlawh te hi ka mamawh love" a ti.

    Doctorate Degree hi University 40 chuang in an pe tawh a, India rama chawimawina awm thei zawng zawng deuhthaw hi a dawng vek tawh bawk. Padma bushan, Padma Vibhushan, Bharat Ratna etc te a dawng tawh a, amah ang a chawimawina dawng tam hi midang an la awm lo!
    Hetiang khawpa pa ropui leh ngaihsanawm hi a damlai hmel ngei ka hmu hman kha ka lawm hle a ni. Kum 2006 a ni a, Mizoram University-ah MA kan zir laiin October 16 a Convocation neih naah India President Dr APJ ABdul Kalam-a chu khuallian a ni a. Kha Convocation-a Dr APJ ABdul Kalam-a  thuneihna hnuai ngeia BA Degree kan nei thei te kha a ropui hle a ni. October 16, 2006-a sipai tha bik thuahthip venhimna kara a hlim hmel nui sang mai ka hmuh kha ka theihnghilh thei lo. MZU Campus a kan awmlai a ni a, India President kha a hnai thei ang bera hmuh kan duh avangin a kalna tur nia kan hriat hnaih thei ang berin kan lo chang anih kha. A hmel tlawm tak, a nundan simple tak, intihotu lo leh inngaitlawm tak hmel kha India mipui ten an ngaihzawn rawn em em kha a awmlo chuanglo e. 
    Khami tum khan tun thlenga a chanchin ka hriat apianga ka hriatchhuah tel ziah leh ka sawi nin theihloh thil thleng a awm a, chu chu hei hi a ni : Mizoram University khan tuna Examination Dept ep a Academic Block a sak thar tur thu a la sa lova, ram hnuai vek a la ni a. India President  lokal kha remchangah la in a hmun khu hawntir an tum a, Monument nalh takin an siam a, inaugurated by APJ Abdul kalam tih te pawh nalh takin an ker bawk a (Convocation hma zanah kan zuk kalin lungphun chu thla te kan lakpui vel a, security ten min hauh phah lehnghal). Mahse Convocation kan neih tuka kan zuk kal leh chuan, chu lungphun chu hnathawk hovin an lo chhuchhe mawlh mawlh mai a. Mak ka ti hle, President khan a hawng lo emawni chu aw? ka ti rilru a. MZU a thawktu thenkhat ka zawh chuan tihian min chhang a, “President kha hawntir kan tum a, mahse ani chuan ‘Building pakhat pawh a la ding si lova, a hmun ringawt hi chu ka hawng duh lo’ a ti a, Vice Chancellor in a chhutchhiattir leh ta anih khu” tiin min chhang a, kan lo zak ru hle. Kha thilthleng avang khan APJ ABdul Kalam-a hi mi dik anih zia ka hria a, ka ngaihsan phah ta sawt zawk a.

“Thangthar lola awm lehzel tur te tan India hi  ram him leh hmuingila kan hnutchhiah anih chuan hriatreng kan ni ang”. - APJ Abdul Kalam


- Laldinpuia