Keini leh Anni: Kerala State leh ZU

         

  Pathian zawnchhuah Kristian ram ti a inchhal Mizoramah chuan hun reitak chhung Zu khap bur na dan MLTP Act hi kan lo hmang tawh a, engtik lai mahin zu hi kan khap rem thei reng reng si lova, chuvang chuan Kohhran te hian duhlo viau mahse, Zu hi phalrai ila, zu tel lova awm theilo te hnenah hian zu intur tha i pe ang u, ti a kan sakhaw rawngbawltute meuhvin kan ram rorelna sang Assembly House a hnuk ulh teuh chunga an au chhuahpui takah chuan kan ram hruaituten rilru chu hminin a awm a, zu chu kan ramah kum 2015 atangin kan lo zuar ta a. Tunah hian Serchhip khawpuiah pawh mi 2 te chuan zawrh phalna permit an nei tawh a, an zuar thuai dawn bawk.

            Hetih lai hian India ram chhim lama Kristian tamna State ve tho mahse Kristian rama inchhal ve lo Kerala te chuan zu hian kan ram min eichhe nasa ta em mai, hun rei tak chhung kan lo phalrai tawh hi a tawk tawh e. Kan mipui te nun chhan nan hian Zu hi i khap tawh ang u, tiin kum 2015 atang hian Zu khapna dan an lo lekkawh ve tan mek bawk a.

             Kerala State hi India ram State te zinga 13-na a ni a, Nov 1, 1956 khan State puitlinga hlankai a ni a, a capital chu Thiruvanthapuram a ni. Mihring 33,387,677 awmin Leiteracy % chu 93.91 a ni. Kerala State hi lehkhathiam thei leh India ramah chuan Mizoram tih lohah chuan Kristian tamna state a ni a, an ram mipui 19% khu Kristian an ni.

            Kerala State a sawrkarna siam mektu Congress kaihhruai United Democratic Front te chuan kum 10 chhunga an State chu zu awmlohna Dry area-a puan tumin kum 2014 atang khan hma an la tan a. Hemi hna hmasa atan hian mimal zu dawr 700 chuang zet chu khar tura hmalak nghal a ni. Zu dawr tam tak an zu zawrh te a that tawkloh avanga an license an lo cancelled sak tawh te chu an licensed renew sak an tum lo bawk.

            Kerala State hian Sunday chu Zu inloh ni atan puangin, thla thar ni hmasa berah hian zu dawr khar vek a ni bawk. Kum 2015 April 1 atangin Zu dawr te chu Five Star Hotel ah chauh hawn phal a ni tawh ang. Kumtin an State a zu siamna te chu 10% tihtawp zel a ni ang a, kum 2025 ah chuan an rama Zu dawr leh zu siamna zawng zawng chu tihtawp vek a ni tawh ang.

            Kerala State hian Zu an khap avang hian sum leh pai lamah an hloh hi a nasa fe dawn a, zu avanga chhiah an hmuh cheng vaibelchhe 1811 hi a tawp nghal dawn a, Zu an siamchhuah avanga an sum lakluh cheng vaibelchhe 1100 hi a kiam ang a, kumtin zu siamna za zela sawm an tihtawp zel avang hian cheng vaibelchhe 375 vel hi kumtin an hloh bawk dawn a ni.

            Engvangin nge Kerala chuan khuti khawpa Zu avanga chhiah an lak nasat laia an khap rikngawt mai tih hi zawhna lian tak awm thei a ni. Kristian State tia chhal an ni bawk si lova, an ram sawrkar hmalakna dodal khawpin Kristian leh Kohhran an awm bawk si lova, chuti chunga Zu khap tura an State an lungrual thei khu thilmak tak a ni. Kerala State in a zu an khap chhan ni a lang chu hetiang hi a ni : Kerala State ah khuan zu in an tam em em mai a, chawhrualin mihring pakhat zel chuan kum khatah zu litre 8.3 in ang zel an ni a, India rama zu in nasa ber an ni. Zu in nasa deuh phei khu chuan an sum lakluh atanga 44% lai mai hi zu manah an hmangral thin ni a chhut a ni nghe nghe. An rama motor accident thleng a zela 40 khu Zu vang a ni. An rama sualna hrang hrang awmte khu a bul ber chu Zu atanga intan a ni deuh vek ni a sawi a ni. Hetiang khawpa an State in an lo tawrh tawh avang hian Zu hi a Bible chang tlawhchhan sawi ve duah lo mahse an khap ta tawp mai a ni.

            Hetianga kum tam tawk experience lo nei tawh State puitling zawk ten an khap mek lai hian keini Kristian State a awm Zofate chuan Kohhranin theihtawpa a do chungin Zu kan han phalrai ta chu a ni a. Kan hnam hian a thatpui dawn nge a chhiatpui dawn tih chu tun atanga kum 5 a ral meuh chuan a chiang uar tawh mai ang.

-         Laldinpuia

17.6.2015