Kumin Chapchar Kut chu ZO takin aw….

Khua a ro in a thal leh tan ta a, rilru in a nghahhlelh em em Chapchar Kut kan lo thleng leh dawn ta reng mai. Chapchar Kut hi Mizo tena kan Kut neih zingah chuan kan ngaihhlut ber a ni a, a khum zo engdang mah a awm lo. Chuvang chuan he kan Mizo Kut pawimawh tak mai hi Mizo tawh phawt chuan hlim takin kan hman a tul hle a ni.

Kan Pi leh Pute hun atang tawh khan he kut hian ngaihhlut a hlawh a, mahni hna tul zawng zawng pawh kalsanin awmni khamin hman thin a ni. An hna tul leh buaina dang zawng zawng pawh theihnghilhin hlim takin hemi ni na na na hi chu kan Pi leh Pute khan an lo hmang thin a, kha kha hrerengin tun tumah pawh hian he Chapchar Kut hi mipui ten hlim takin i hmang theuh ang u.

Tin, Chapchar Kut kan hmannaa kan hriat reng tur a pawimawh chu, he kut hi kan Pi leh Pute tihdan chhawm nun zelna Kut pawimawh tak mai a ni a, chuvang chuan lo her danglam(modified) vak a tul lo, a nih na angina hman tawp mai tur a ni. Vai kawr nalh ber ber ha a Kut hman hian kan hnam nun a tiboral mek a ni, chuvang chuan thangthar te hian he Kut hlutna hi a Mizo takin i ngaihtuah tha leh ang u. Chapchar Kut kan hman naah Field a hun kan hman naah thu puangtu(announcer) in sap tawng aw mawi taka puan dum dum a tul lo, vai tawng a nal taka sawifiah kher a tul lo. Mizo te kut a ni a, Mizo tawnga engkim kan tih kha kan hnam nun chawisanna a ni. Kan Kut hmanaa lo tel ve hnamdang te chuan an duh leh tawng lettu ruai mai rawh se.

Tin Chapchar Kut te hi hnamdang te mithmuha kan Tourism promote nan a that teh lul nen mahse kan hmandan phung han en hian kan sawrkar hian hetiang lam zawng hian rilru a nei rihlo niin a lang bawk si a(tuna kan hmandan phung hi chu hnamlai zia tarlang ve zeuh zeuh chung si a tunlai khawvel changkanna mila a changkang leh tha thei ang bera hman anih miau tawh avangin hnamdang tan chuan a hmuhnawm vakin a rinawm loh), chuvang chuan hnamdang tawnga sawifiah kher hi a la tul ber rihlo niin a lang.

Hetiang karah hian Mizo kan nih chhung chuan kan kut hi hlut thiam ila, Kan incheina kawngah pawh Kut hmangtute hian kan Mizo thuam leh Mizo zia lang thei tur ang chi thawmhnaw kan inbel hram hram a tha awm e. Marco Polo Kamis nalh leh manto tak hak ai chuan thangchhuah kawr hake maw, puan bah emaw kha mipa tan chuan a mawi zawk em em a, pheikhawk sang nalh tak leh jeans kekawr nalh tak tak ha a, tarmit dum tle zar mai bun ai chuan puanchei emaw ngotekherh emaw bih a, kawr chei emaw Mizo kawr hak mai kha nula/hmeichhia te tan pawh he niah hi chuan a mawi zawk tlat.

Thangthar te hian kan hnam hi hrechiang ila, kan culture leh kan hnam tihdan phung hi hria ila, kan Chapchar Kut hi ngai hlu i la, Mizo kan ni tih hrerengin ZO takin Chapchar Kut hi i hmang theuh ang u.

- Laldinpui

Serchhip 3.3.2015