Ngaihtuah chiang leh teh u

Kumtin hian December thla a lo det tawh hi chuan Mizo te thinlungah chuan kan hma lawka Lal Pianchampha lo thleng tur bak hi rilruah kan ngaihtuah tawh meuh lo. Mitin thinlungah Krismas a lian ber tawh a, Bethlehem dai a nghawr vel e, an lawm hla ri thangvel te chuan ti a Pu Rokunga hla nena khaw vawt hnuaia zan rei tak tak thleng kan inawi chung pawhin thlasik khawvawt hreawm reng reng kan hre tawh lo. Hetiang khawp hian Mizo te rilruah chuan Krismas vuakvet hian hmun a la chang tam a ni. Chutih lai chuan kumin December ni 15 lo thleng tur erawh hi chu Mizoram a thingtlang mite hian kumdang zawng aiin kan huphurh hle a ni. A chhan chu Aizawla thingtlang sumo dinna thin chu khaw hmawra sawn tura hmalak mek anih avangin a ni.

Aizawl a thingtlang sumo ding thin te chu khaw hmawra sawn vek a Sumo Stand tih danglam tum anih thu leh he thupek hi December ni 15 atanga hman tan anih tur thu chanchinbu leh chanchintharah te kan chhiarin kan ngaithla a, he thu kan hriat hian thingtlang mite, Krismas dawna chakkhai lam tura Aizawla zin ve hram tuma lo inkhawl ve tang tang te leh Aizawl leh mahni khua a mamawh hrang hrang inthawn tawn reng thin te chu min barakhaihin kan ngaihtuahna a tibuai ta hle mai.

Hemi chungchangah hian keini thingtlang mite chuan tihian kan ngaihtuah….

Aizawl hi Mizoram khawpui ber a ni a, khawi hmun atang pawhin kan chhuang em em a, zin kan chak a, kan zin leh nuam kan ti thin hle. Vai ram leh Foreign vela zin ve ngailo thingtlang mite tan chuan kan chakkhai lakna ber leh tlawh pawh ber a ni. Mahse chutih lai chuan Aizawl khawpuiah hian thingtlang mite chu kan chep ta tial tial mai zawng anih hi. Kan ramah sawrkar in ram neih dan mumal tak a siam siloh avangin Aizawl atangin pa hausa kan veng/khuaah an rawn kal a, inhmun tha tha, leilet tha tha, ram nuam lai lai an rawn lei zung zung a, pawisa a min rawn thlem tlat thin avangin kan hnar thei silo. Chutah khawpuiah kan rawn zin ve a, awmhmun benvel ve kan han tum a. Mi in kan han luah ve a, mihausa ho ten an duh zah zah inluahman min tuk a, keimahni khuaa kan hawna ber tur motor dinna lah an duhna hmun hmunah min sawn sak a, ‘khawpui in tichep’ min ti thul. Vau leh hauh tawk reng rengin kan khawpui berah kan rawn zin fo ta mai anih hi!

Aizawl Traffic titawttu chu thingtlang motor tlem te, nikhata darkar khat vel lek khawpui chhung a tlan ve chauh niin min puh a, hei hi chu kan va phu lo em! He thilah hi chuan nitina private motor dan leh dun awm si lova vak vel sang tam tak te khuahkhirh tum si lovin a rethei zawk hlir khuahkhirh min tum niin kan hre ve tlat asin keini thingtlang te chuan.

Tuna thingtlang sumo dinna thar an siamah hian han ding ta vek se, thingtlang mite kan buai tur zia hi kan lo suangtuah ve mai mai thin. Khawpui laili atanga khaw hmawra sumo counter pan tura kalna hautak zia hi kan chhut a, kan lung a awi thei lo. Khawpui chhungah Traffic a zam nasa thin si a, hetiang anih chuan mahni chuanna motor chhuah hun nan loh mai pawh a awl viau ta ve ang. Tin, kan harsatna pakhat leh chu thingtlang mi rethei tam zawk hian khawpui chhunga veivah nan Taxi kan hmang lo tlangpui a, City Bus hi kan veivahna ber a ni. Chutih laiin City Bus tawt tak kara kan Sumo Counter pan tura keimahni bungraw neih ang ang nena kan han chuang tur hi rilru a na lawk a ni, a chhan chu City Bus conductor tam tak hian bungraw kan ah bawr viau hi chuan min hauh thin bakah min phur tha duh tlatlo! Hetiang anih chuan mi tam tak hi chuan Aizawl atanga kan khaw thlenna khawp sumo fare aia tam hi Counter kan panna lamah hian khawpui chhungah hian kan seng dawn a ni. Thingtlang a mite tan Aizawl khawpuia zin man a va to dawn ta em! Chuvang chuan thingtlanga mi rethei ve tak tak Aizawla chakkhai lama kal ve thin tena kan harsatna hi min hriatsakin Aizawl khawpui enkawltute u, nangmahni timawia tiropuitu thingtlang mite min enkawl dan hi ngaihtuah chiang leh teh u.

- Laldinpuia, Serchhip