THLARAU NAZAWNG RING SUH U

    Mizo te hi Pathian thu duh tak mai, hriat apiang leh hriat bak piahlam thlenga ngaihruatna nena sawi vak mai thin, a taka nunpui lam erawh tum vak lo, mi zawm tura thusawi teuh ching kan ni a, chuvang chuan Pathian thu kan kalpui danah leh kan kenkawh danah te pawh hian fimkhur a tulna tur tam tak a awm thei awm e. Pathian thu ni si, Pathian lak atanga chhuak ni lemlo, mi tamzawk hlawkpui na tur aia midang ti chiai tawk leka lo vahvaihpui ve chiam te pawh awm theih a ni, chuvang chuan hetiang kawngah hian Pathian mite leh Kohhran mite hi kan fimkhur a tul khawp mai.
    Lal Isua khan he khawvel a chhuahsan hnu khan a aiawh turin he khawvelah Kohhran a din a, chu a Kohhran din chu tun thlengin rinna kawnga ban pawimawh tak a ni. Chuvang chuan Kohhran hian mite thlarau nun hruai kawngah mawhphurhna lian tak a nei bawk. Tunlaiah thlarau changsang inti deuhho zingah Kohhran duhkhawp lohna a thleng thin a, Kohhran inkhawm aia mimal ina inpawlkhawm let let chak zawkna te leh Kohhran hruaitute hmuh ro na te, anmahni zinga tel ve lo chu inhmuh hran riauna te a thleng thin. Hetiang ang hi Pathian thlarau dik tak atanga chhuak anni em tih hi Pathian thu atanga kan zir ve fo a tul khawp mai.

    Tin tunlai kan Zoramah Harhna a thleng mek a, hei hian mihlim te pawh hmun hran hranah a rawn hringchhuak leh tan a, chutih lai chuan mihlim thenkhat mak sak tak takah che te pawh hmuh tur an awm, midang te chan aia chang sang ni a inhria a ram pum huapa zawlnei ni a inngai ta mai, mak sak tak tak a che, ram leh khawtlang dan palzut zawnga Pathian chettir tum kan awm ta zeuh zeuh mai. Heng hian mipui tam tak a tithlabar a, Pathianin kan ram a hrem tur thu te an insawithaih a, thil lo thleng apiang an hmu makin an insawithaih a, mak danglam tak taka inthuama min vau ta chiam chiam te pawh an awm, hei hian Pathian thutak aiin hlauhna leh thlabarna chiah mipuiteah min thlen zawk awm e. Hetiang ang dawnsawnna kawngah pawh hian Kohhran hi kan fimkhur a tul hle, Kohhran atanga peng bo leh kalsual, pawl hran neia awm ta ho hi an lo chhuahna bul ber chu tun ang hun atang hian a ni thin. Chuvang chuan he khawvela Pathian aiawha awm, vanram chahbi meuh kawltu kan nih avangin Kohhran te hi kan fimkhur tur a ni. Heng harhna lo thleng thin te hi Pathian lak atanga chhuak annih rual rual hian a dawngsawngtute lam hian an dawnsawn dan a inan tawh thinloh avang hian a kalsual fova, helai tak hi fimkhur a tulna chu a ni.
    Hetiang lam hi Kohhran hian khap leh enkawl dan kan thiam tawkloh avang hian Kohhran atanga chhuak leh pawl hran din kan awm phah hial thin a, a pawi hle. Heng sawisel hi tam tak chuan Pathian thu sawichhia/Pathian pawisawi angah kan inngai a kan hreh deuh thin niin a lang. Mahse hemi avang hian Kohhran tam tak an kalsual tawh a, mi tam takin Sakawlh hlauvin Kohhran an chhuahsan a, India khua leh tuiah an inziaklut duh lova. Pathian thu tak hria inti siin Pathian thu zawm si lovin an awm mek anih hi.
    Kohhran mite hi i fimkhur ang u, Setana pawh eng tirhkohvah a insiam thin tih thu Bible a kan hmuh ang khan, Thlarau nazawng hi Pathian laka chhuak an ni vek si lova chuvang chuan Pathian hminga lokal nazawng hi Pathian hriatpui anni vek lo. Pathian thutak hre thei turin tawngtaiin Pathian i rawn tam ang u. Pathian thu te hi buaipui lutuk tur a ni lo, chu ai chuan amah rina a thu zawm mai hi kan tih tur a ni. Engpawh nise la kan awmdan leh nungchang hi Krista chanchintha nen inmawi phawt mai rawh se.

Duh takte u, thlarau nazawng ring suh u; amaherawhchu, thlaraute chu Pathian laka mi an ni nge ni lo fiah rawh u;thuhriltu der tam tak khawvelah an lo chhuah tak avangin. (I Johana 4:1)


- Laldinpuia 21.11.2014