Mizo zirlai ten chhan an ngai e!

Education is all round development tih a ni thin a. Hei hian zirna pawimawh zia a tarlang chiang hle awm e. He ti khawpa pawimawh si hi kan ramin kan kalpui dan leh kan sawngbawl dan erawh hi chuan ngaihtuahna a tibuai thin khawp mai.

CCE

Continuous and Comprehensive Evaluation (CCE) kan tih mai chu kum 2011 atangin kan sawrkarin rem leh rem lovin Mizoram zirna system-ah a telh ta thut mai a. Mitvai chungin bul kan tan a, kan zirtirtute kan training tir tlut tlut a, chutih hnuah pawh a nihna tur ang taka hmang thei School leh zirtirtu kan la tam lo hle.

Tun hma zawng kha chuan Calendar System in kan kal thin a, kha tih hunlaia kumtawp exam leh School chawlh hun kan nghakhlelh zia kha ka ngaihtuah let fo thin. Kumtawp exam dawnah chuan Promotion exam anih avangin theihpalingkawhin kan tang a, fail kan hlau em em thin. Mahse kan sawrkar hotute chuan naupang fail a thalo/fail avanga rilru naa naupang siam a thalo tiin fail theilo turin CCE an rawn barh ta thut mai a. Naupang leh nu leh pa hmuhah sawi mar kan han tum viau thin na a, a nihna a bo chuang silo, ‘FAIL theihloh ngei a ni!’. Hei hian kan zirlai teah tumruhna leh rual elna awm thin kha a ti bova, kan thiam theih viau pawh a kan hnuai ami ten en kan Grade a inang tak vek avangin naupang rilruah a tha lo zawngin a nghawng a, zirna an ngaihnep phah a, kan tuar mek ta anih hi.

Tuna CCE avanga tuar nasa ber chu High School ho hi an ni tlat, a bikin Private School ten an tuar. Cl VIII ah a fail theihloh avangin Cl IX ah an lut chho huk a, RTE hnuaiah School Admission pek loh ngawt a thieh si loh a, chu chuan School quality a tichhe hle a ni. Cl IX ah chuan a lo fail theih tawh si avangin an insiamtha hman lova, High School rap ve uaih tawh si, Cl X zir thei miahlovin laklawh takin a tang ta thup mai a ni. Tunah hian CCE hi kan hmanna a la reilo nain School tin hian Cl IX zirlai tur hi admin senloh kan nei tan tawh! Chuvang chuan naupang tam tak chu Cl IX an passed theihloh avangin an beidawng a School an ban phah hial thin. Heta a pawi ta em em chu Cl-IX an kal chhung zawnga Promotion Exam vawi khatmah an hmachhawn ta lo hi a ni. Chuvang chuan CCE hi kan titawp dawnlo anih rau rau chuan Cl VIII hi Promotion Exam ni se, Cl IX an rah tawh chuan fail lovin Cl X an thu thei ta thung sela a tha zawkin a rinawm.

School kai hun sawn

North East in hunbi chhiarna hran kan mamawh tih sawi a awm a, a dik mai thei e. Mahse pawi ka tih em em mai chu chumi enchhinna(Experiment) atan chuan kan zirlai naupang te bawk hman tumna a awm hi a ni. Tunah kan sawrkarin zirlai nu leh pa leh zirtirtu zawng zawng ngaihdan a laknaah khan duhthlan tur a siamah zing dar 7:30 leh dar 8:00 a School tan hun thlan tur a ni a, mahse khami pahnih pawh thlang lova School tan hun sawnhma duhlo hrim hrim kha tam tak an awm. Chu chuan a tarlan chiang tak mai chu School tan hun sawn hi kan duhlo tlang vek tih a ni.

Tam tak chuan hemi chungchangah hian ‘thil thar tih kan ngam lo’, ‘change kan thlentir ngamlo’ tiin huai takin an tang thin. Mahse hei hi Change dan dik a ni lo. Kan zirlai naupang te te hnena keini pawhin a kan zawm theihloh kalphung thar thlentir thut chi Change a ni lo. Chuvang chuan ni eng chhawr tangkai kan duh anih chuan hnathawk thin, nitin office kai thin nu leh pa te hian enchhin hmasa ila, a lo tha viau anih leh kan fa te hi chumi kawngah chuan i kaltir chauh ang u hmiang. Kan zirlai te hi kan tikhawngaihthlak lutuk e!

Mizo zirlai te hi chhan an ngai a ni, nakina kan ram leh hnam hruaitu tur te an ni a, chuvang chuan ngaihsak ila, tha takin i enkawl ang u. Kan ram leh hnam hmasawnna tur ruahmanna leh kawng thar zawh tur kan hria anih pawhin keimah nin a kawng chin thlir hmasa zet ila, chumi hnuah kan zirlai te hi i zawh tir chauh tawh ang u.

- elldy