Kan harsatna te hi

One view of Serchhip Town

Serchhip tih hming a rik tawh apianga thin phu ve dat thin, khawi hmunah pawh awm mah ila Serchhip khaw chanchin ngaihven leh Serchhip khaw nih chawilar tum ve ngar ngar tan chuan Serchhip hmasawnna tur hi rilruin a vei ber pakhat a ni ve a, chuvang chuan Serchhip tana hmathlir leh rawtna neih ve ang ang pawh hi inthlahrung hauh lova puanchhuah ve pawp pawp hian thenkhat te pawi kan sawi palh anih pawhin kan khawtlang thatna tur anih chuan thupha chawi hauh lova a mawh phurh ngam mai hi a finthlak zawka hriat chang a tam ta mai.

 

Serchhip nge Chhiahtlang?:

            Serchhip Town kan tih hian Chhiahtlang hi kan chhiar tel ve thin a, mahse Chhiahtlang lam hi engemaw chang chuan anmahni leh anmahni an inla ralbang deuh tlat thin ni hian a hriat. Hei hi tunhnai a thil thleng a ni lova, tunhma atang tawha boruak awm a ni. Chhiahtlang daiah sawn Serchhip a lokal khualzin te Serchhip khuain kan lo lawmna thuziak hrang hrang te kan tar thin a, sawrkar ngaihah pawh Serchhip Town vek kan ni. Mahse Chhiahtlang lam rilruah erawh chuan chutiang chu kan lo ni chiahlo a ni mai thei e. Chhiahtlang lam rilruah Serchhip chu an khaw thenawm anga ngaih theihna deuh a awm a, Serchhip lampangah pawh mi thenkhat rilruah chuan Chhiahtlang chu khaw hran deuh, Serchhip khaw bul maia khaw awm pakhat anga ngaih theih zawnga rilru put a awm leh zauh thin.

            Serchhip-ah hian Serchhip Teachers Association a ding a, hei hi Serchhip khaw chhunga zirtirtu zawng zawng huap anih laiin Chhiahtlangah chuan Chhiahtlang Teachers Association a hranpain a ding ve tlat bawk a. Zirlai pawl lian tak MZP chu Serchhip-ah Headquarters lian tak a awm laiin Chhiahtlang-ah chuan Sub-Headquarters a hranin a awm leh tlat bawk. Hetiang ang thil awmdan han thlir hian kan rilru hi a la inpawh chiahlo niin a ngaih theih.

            Hei hian a nghawng tur hi thu a chhia a thaa inlungrual lohna leh intihhranna a ni. Chuvang chuan Serchhip Town huamchhunga rinluh chin zawng zawng hi chu thukhat vuain rilru hmunkhat puin awm thei ila a va tha em! Mitin te hian kan rilru a in enhranna awm te hi dahbovin khaw khat veka cheng kan ni tih hi i dah pawimawh thiam ang u.

Kan tui a hal e... :

            Serchhip khuain a tuna kan tui tlan ber hi Tuikum lui a ni a, hei vang hian tunhnai thal chhoah Serchhip khua chuan harsatna kan tawk mek a ni. Tuikum lui ringawt hi chuan Serchhip hi min chawm zo lo deuh tawh niin a hriat a, chuvang chuan kawng dang dap a hun ta hle mai. Mihring kan pung chho zel a, tun atanga kum 5 a ral leh meuh chuan Serchhip khua hi tuihalin kan au kan au mai dawn niin a lang ta. Chuvang chuan kan sawrkar hotute leh kan khawtlang hruaitute hian hemi chingfel tur hian hma kan lak tan a hun hle a ni. Chuvang chuan tun dinhmunah hian nakin lawka Serchhip in manganna kan tawh tur awm hi pumpelh thei tura kan inbuatsaih a hun hle a ni, Tuikum lui hian englai pawhin kan duhkhawp min phuhruk zo dawn lo niin a lang tawh a, Tuikum lui chauh lo hi kawng dang kan dap a tul ta hle mai.

Tuihna humhalh a tul e:

            Kum 2014 thal chhoah Serchhip ram nasa takin a kang a, kang thelh tur hian Serchhip a sawrkar hnathawk zawng zawng te pawh ni 2 office thulhin an thawkchhuak nghe nghe. Khati khawpa kan ram a kan nasat lai khan mi thenkhat chuan thelh tumna an nei miah lo, a chhan ni a an sawi chu, an thelh dawnin miin 'ka ram, ka ram' an ti zel a, vantlang ram tak tak a awm hleinem' an ti. An vuina awka hian ngaihtuah a ti thui khawp mai. Vantlang ram pawh zuah hleithei lovin mi neinung leh thiltithei ten kan ram kan in pata siak a, hei hian a nghawng chu kan ram ngaw riral leh chereu zel hi a ni. Loan lak nan ram a hmun rem leh remlo pawh sawi lovin kan pata hmiah hmiah a, a hmingin kan humhalh a. A tuartu chu mi rethei leh nitin eichawp zawng ram lama ni sensa hnuaia kal thin te hi an ni.

            Tin kumtin Serchhip ram hi a kang nasa thin hle a, chutih laiin a tikangtu chungah hremna lekkawh anih awm hriat a ni ngailo hian mi tam tak rilru a tithlep a ni. Tun tum ram kangah pawh khan YMA chuan FIR a thehlut tawh a, mahse rinhlelh man tur pawh an awmlo a ni mai thei. Kan sawrkar lam hotute leh Forest Dept lam hotute hi an insiamthat ve deuh chu a ngai niin a lang.

            Tin, tuihna humhalh lamah hian awareness hi kan nei tam tawklo niin alang. PHE lamin theihtawp chhuahin khawpui lamah sawrkar official te nen tuihna humhalh an puang dum dum a, mahse a mamawhtu tak tak chu thingtlang kilkhawrah engmah hre lovin an awm mai mai a. Awareness kan inpek dan pawh hi enfiah a ngai. Tuihna humhalh hi tihmakmawh a ni, kan ram ngaw kan tih chereu avangin kan tui hna a tlem zel a, luipui phai te leilet leh chuktuah huan atana kan vah chereu nasat lutuk avangin kumtin kan luitui chim chin hi a hniam chho zel a ni tih kan hriat a hun khawp mai.

Serchhip thlai thar:

            Aizawl Bazar thlai zawrhnaah khuan kal ila, Aizawl nu hovin a, an thlai zawrh an fakmawina tawngkam lar tak chu, 'Serchhip zawlpui nul, serchhip zikhlum' tih a ni. Hetianga Aizawl nu hovin an tih tawh ngat chu a leitu tan inngaihtuah buai ngai miah lova a man pek nghal pawp kha a hlawk ber!

            Serchhip hian zikhlum leh antam kan Zawlpui phaiah khuan kan thar tam hle a, tin Serchhip hi Mizoram ah chuan Zikhlum leh antam that duhna ber hmun pakhat a ni. Chuvang chuan Serchhip hian zikhlum leh antam kan thar tam hle a ni. Mahse kan thar tam anga kan hriat hi a rampum thlir chuan kan lo tharlam lem lo. Kum 2011 khan zir chianna neih a ni a, heta tanga a lan dan chuan Serchhip Zawlpui phaia zikhlum kan thar khu Mizoram puma kum khata zikhlum kan tharchhuah atanga chhutin 3% vel chauh a ni! Hetiang lek kan thar chunga Mizoram pum chawm thei nia inngaia Silchar  lam atanga lakluh tur dan kan lo tum ve ngawt kha chu kan thlir zau tawklo deuh niin a lang. Tan lakna tur kan la ngah mai. Kan Zawlpui phai lah chu zikhlum leh thlai dang chinna tur ram a la thain ram ruak a la awm tam si a, kan loneitute hian tun ai hian tan lain theihtawp han chhuah leh deuh se chuan khawdanga thawnchhuah tham fe kan neih a rinawm. Kan loneitute hian Serchhip Bazar a hralh tur leh bag 4/5 Aizawla phurhthlak tur chauh hi ngaihtuah lovin a tam thei ang ber thar tumin theihtawp chhuah sela chu hma an sawn ngei ang. Tuna NLUP hmanga sawrkarin 'One Village One Crop' system kalpui a tum te hi a takin hmang ngam ila, hma kan sawn phah ngei ang.

Zin mite harsatna:

            Khawdang atanga Serchhip a khualzin rawn kal thin tena an harsatna an sawi zinga langsar tak chu riahna(Hotel) awm thalo leh, Bazar leh a vela vantlang inthiarna awm thalo ltk hi a ni. A khuaa awm te hi chuan ngaiah kan neih pawh a ni mai thei, mahse khualzin te tan chuan harsatna siamsaktu a tling. Serchhip Bazar leh a velah hian inthiarna a tam lo hle a, zunin chu a awm zeuh zeuh a, ekin phei chu tunah hian vantlang tana hman tur chu a awm lo niin a lang. Hei hi laklawh thila mamawh thut khualzin te tan a hreawm thin hle awm e.

            Serchhip hi kan khua a lian ve tawhin mihring veivak te pawh kan tam hle a, nitin hian khualzin te pawh hi a mawi tawk chu kan bazar velah hmuh tur an awm ve reng ta mai a, hetiang anih lai hian kan bazar vel inrelbawlna felfai lo deuh leh zin mitena an sawisel fo thin hi a chinfel dan kawng kan dap a hun hle. Chuvang chuan Serchhip Bazar bul velah hian Vantlang inthiarna (man chawi chi pawh nise) siam theih nise a mamawh te tan thil tangkai tak a ni ngei ang.

I tangrual ang u:

            Serchhip hmasawnna tur kan sawiho thin a, rawtna kan siam thin a, kan harsa lian tak awm chu kan tangrual leh theilo thin hi a ni. Chuvang chuan tanrual hi kan mamawh hmasa ber a ni. Kan khawtlang hmasawnna hrang hrang te hi kan tanrual loh chuan nakin lawkah chuan a la tlabal rem rum ang a, mi dem kan hlawh phah leh nge nge ang. Chuvang chuan Serchhipin hma a sawn zel theih nan a khaw mipui te hian tanrual i zir thar leh ang u. Serchhip, New Serchhip, Chhiahtlang ti a sawi hrang duah lovin Serchhip mi leh sa kan nihna ang hian tangrual ila heng kan harsatna te hi chingfel turin hma i la ho teh ang u.

            Chief Minister bial kan ni tih vanga lungawi ringawt tur kan ni lo. Chief Minister bial nih ringawt hi hmasawnna a ni lo tih chu kum 20 chhung hian kan zir chhuak hman tawh a ni. Chuvang chuan chief minister bial kan nihna hi kan khaw hmasawnna atan kan hmang tangkai thiam zawk tur a ni, mimal hamthat nan leh hlawkna atan chauh nilo hian.

Kan hliam hluite dam tawh se:

            Hliam hlui dam thei tlat lo thin hian harsatna thuah hnih min siam sak thin. Kan khaw hmasawna theihloh nachhana kan khawtlang hruaitute kan mawhpuhna te, kan party hruaitute kan mawhpuhna te kha tunah chuan theihnghilh tawh ila, midang kutah nghat lovin KEIMAHNI hian he khua hi siamtha tawh zawk ang u. Kan khawtlang hruaitute kutah dah lovin, kan party leh sawrkar hotute kutah dah lovin keimahni penchhuak ila, keimahnin kan khawtlang hruaitute thawhpui ila, kan khaw hmasawnna tur atan hian a sawitu ni lovin a thawktu nih i tum theuh teh ang u. Refferal Hospital kan chan thu te, Sainik School kan chan thu te kha tunah chuan mual liam tawh se la, kan khawtlang hruaitu hmasate thil lotih dikloh kan hria anih pawhin thiehnghilh tawh ila, keimahni ngei hian kan thlen chin atanga hma sawn zel turin Serchhip tan theih tawp i chhuah zel ang u.

- Laldinpuia, Asst professor

Dept of Economics