Ka pu, min lo hrethiam lawk...

Ka pu,

            YMA in 'Mau tuai/Raw tuai khawrh loh tur' tih thuchhuah an siamin, 'Ho mai mai, tunhma zawng pawhin kan khawrh a a rem tak tak chuang lo' tiin thiam thu i sawi thin tiraw?

            Sawrkarin tuihna humhalh a tul thu a sawi a, chumi atan chuan ramngaw kan vah chereu thin te hi kan tihtawp a tul thu a sawiin, 'Heng te chu kan pi leh pute atanga kan eizawnna kumhlun a ni a, tun hma zawng pawhin chul ram kan nei nawn ngailo, kum 2/3 velah a ngaw leh mai alawm, ramngaw te chu kan ngah a vah senloh kan la neih hi' tiin i insawifiah thin em?

Ka pu, min lo hrethiam lawk la, he thu hi ka han sawi ve teh ang:

            Mau tuai/Raw tuai khawrh khap te, ramngaw leh tuihna humhalh te hi sawrkar ina khua leh tui, nang leh kei hma a ngaih vanga a rawtchhuah asin. Mi thiam te chuan tuna kan ram hausakna chentu mai nilo, nakina thangthar chhuan lo la awm lehzel turte thlenga kan ram leilung hausakna kan chhawr tangkai theih dan tur ngun takin an ngaihtuah a, chuvang chuan kan tu leh fate thlenga he kan ram hi chenna tlak, kan Zotlang ramnuam ti a kan chhal zui zel theih nan Mau tuai khawrh khap a tul tak thu te, ramngaw humhalh a tul thu te, luidung leh ramhnuaia nungcha humhalh a tul thu te, tuihna humhalh a tul thu te hi a lo auchhuahpui ta a ni.

            Heng ang dan te hi kan sawrkar hian siam lo se chu keimahni hi kan damlai ngeiin kan la inchhir dawn a ni, mahse chutih hunah chuan phengphehlepa khua a tlai zo tawh si ang. Kan rama lui tui tam tak hi kan boruak lum zel avangin an kangchat zo tawh a, a kangchat mek zel bawk a. Chumi avang chuan kan lui tuite hi humhalh a tul ta em em a ni. Tunhma chuan PHE tui lak te hi kan la mamawh lova, kan kawtkai lawk lawkah tuikhur tui tha tak hmun tinah hmuh tur a awm thin a. Mahse thing leh mau kan tih chereu zel avangin khang te kha tunah chuan hmuh tur a awm ta lo! PHE lam ten theihtawpin luitui min hipchhuahsak chung pawhin a kum a telin tui harsat thu kan sawi ta mai zawng anih hi. Tunah chuan hmun tinah tuikhur kangchat hmuh tur a awm a, kan lui tui thenkhat te pawh fur lai lo chuan hmuh thamin an luang ta meuh lo.

            Tui hna a tlem tak em em nachhan hi kan rama thing leh mau te kan tih chereu nasat em vang a ni. Tun hma chuan sik leh sa a la thianghlim a, boruak a la tha a, chuvang chuan Ramngaw kan vah chereu te pawh, kum 2/3 hnuah chuan a ngaw hman leh khup tawh thin. Chul ram pawh kum 3 a liam meuh chuan a lei a hang tha leh hman a, a neih leh tlak tawh, tih kha kan thu inrochun dan a ni a. Mahse, tunah erawh chuan hun a danglam zo ta, ramngaw kan vah chereu te chu ngai awh leh tur chuan kum tam tak nghah a ngai a, chul ram pawh neih leh tlak tur chuan a lo berah kum 5/6 hial te nghah a ngai ta, a hrechiangtute chu ram lama hnathawk te vek bawk kan nih hi. Tun hmaa Mau put awlsam zia leh tuna Mau pu khawp ngah tura ramhnuaia kal thui a ngaihzia te, lui dunga sangha lenkhang leh len hmanga man tur awm mumal ta lo khawpa lo rem zo ta te hi kan mitin kan hmu a, kan ti ti ber anih tak hi. Mahse he kan harsatna chingfel tura sawrkar hmalakna erawh kan thlawp hlei thei silo hi chu keimahni leh keimahni inbum mai kan ni.

            Hawh u, thingtlanga mite hi i harh thar teh ang u, kan ram ngaw, kan thing leh mau, kan luidung a cheng nungcha, kan eizawnna min siamsaktu leh kan sum hnar ber te hi kan eizawnna leh kan sum hnar annih zui zel theih nan i humhalh ang u. Kan humhalh chuan nakinah kan tu leh fate tan eizawnna tur kan siamsak tihna a ni. Tuna a ruk a rala Mautuai/Rawtuai kan khawrh a tui ti taka kan ei hi nakinah kan tu leh fate thlantui tizualtu a la ni dawn. Chuvang chuan mit ngeia kan hmuh kan ram ngaw lo chereu ta te, kan luitui lo bawlhhlawh ta leh tui hna lo kang mek te hi kei nin kan humhalh loh chuan tunge min humhalhsak teh lul ang ni? 'Hei hi ka ram, kan tu leh fate thlenga kan inrochun tur anih hi' ti a chhuang taka kan la sawi theih nan kan ram thing leh mau te hi i humhalh tlat ang u.

-          Laldinpuia, Serchhip