Earth Hour (60 minutes) hi enge ni?

Kan awmna lei hi a kum telin chhiat lam a pan zel a, tun hmaa boruak thianghlim nuam tak kan neih thin te pawh a kum a telin a tlem telh telh zel bawk a. Mihring te kan lo changkang a, khawvel thiamna leh finna te a pung zel a , chuvang chuan kan awmna lei leh sik leh sa hian heng kan thiamna leh khawl thil kan hman uar lutuk avang hian a tuar mek zel a ni. Hetianga kan awmna lei hi kan suasam zel chuan tun atanga hun reilo teah chuan thangthar te tan hreawm leh awmna tlakloh khawpin kan chhehvel boruak hi a la awm thuai dawn a ni tih hriain khawvel a mithiam te chuan he kan chenna khawvel(Planet) humhim hna hi theihtawpin thawk turin thu an thlung a. Kum 2007 March 31 zan dar 7:30 khan Australia khawpui Sydney-ah kan chenna khawvel humhim nan darkar khat chhung eng(light) zawng zawng off vekin khaw hmanga hnathawhna zawng zawng chawlhtir a ni a, chu chu ‘Earth Hour’ an tih chu a ni.

He Earth Hour programme hi a buatsaihtu te chu World Wide Fund for Nature (WWF) te an ni a, kum 2007 a Sydney-a an neih atang khan khawvel hmun hrang hrangah intihhmuh chho zelin tunah phei chuan khawvel zawng zawng deuhthaw huapin he hun hi kumtin March thla tawp lamah hian hman thin a ni. Hetia darkar khat chhung eng zawng zawng tihthim anih chhan hi he khawvel boral mek chhan tura inhlanna entirna ni a ngaih a ni, kum 2013 khan March 23 ah Earth hour hi hman a ni a , kum 2014-ah hi chuan March 29 zan dar 8:30-9:30 inkarah he hun hi hman tura ruahman a ni.

Earth Hour hian a tum ber chu kan khawvel chhanhim nan leh kan boruak lo bawlhhlawh chho zel ven nana mitin theih kan tih ve theih tawk, kan eng chhit tullo zual te off a, khawl chakna kan hman te a theih ang anga titlem a kan sik leh sa humhim nana darkar khat(minute 60) chhung hunk an pek ve kha a ni. Hei hi khawvel hmun hrang hrangah hman a ni a, khawvel a pawl hrang hrang leh ram hruaitu hrang hrang Nelson Mandela, Cricket star Sachin Tendulkar, UN Secy General Ban Ki-moon, Us Vice President hlui AL Gore leh mi dang te pawhin he hmalakna hi an thlawp a ni.