A Christmas Carol

Kumtin a thlasik a thlen ruala lo thleng ngei ngei thin, mitin tena kan nghahhlelh em em mai Lal pianhun lawmawm champha ‘Christmas’ chu kan lo thleng leh dawn ta. He hunpui kan nghah mek lai hian mi tam ber rilru a thu lo lut nghal chu ‘kumin chu engtin nge ka hman ang?, Tunge ka hmanpui ang?” tih a ni thin. A tlangpui a thlirin Christmas hi a sual rawng bawl zawnga hmangtute aiin a tha lam zawnga hmangtute hian Christmas hlutna hi an chharchhuak fo thin a, a hnu lehah an inchhir lo nge nge.

Thalai nih lai chuan a hlimawm thei ang bera hman a zu leh sa nena hman hi a nuam lai ber emaw tiin mi tam tak chuan hetiang lama hman ngei hi kan tum thin. Mahse hetianga hman a nuam emaw titute hian an ringsual chhiava a ni. Kohhran zaikhawmna leh Kohhran thalai te zinga hmangte hian hlimna tak tak an chharchhuakin sum leh pai hautaklo tak siin hlim takin he hun hi an hmang thin. Christmas kan hman danah hian hetiang a hman tur, ruai theh ngei ngei tur, midangte tana thiltha tih ngei ngei tur, zu leh sa nen hman ngei ngei tur tihah hian kaihhruaina engmah chiang taka ziak leh inzirtirna nghet a awm lova. He hun hi khawvel chhandamtu Isua Krista pianchampha(Birthday) a ni a, chuvang chuan he piancham hi mi hrang hrang ten mahni duhdan leh tha tih danin kan lawm mai a ni a, tu lawmdan mah hi han insawisel sak ngawt theih pawh a ni bik chuang lo. Amaherawhchu kum tina he hun hi thleng anih avangin a bikin Kristian te chuan kan chhandmatu piancham kan lawmnaah hian hlawk zawk leh midangte tana luangchhuak zawnga hmandan ruahmanna kan siam fo hi a tulin a tha hle a ni.

   
apianga lo thleng ve thin lehkhabu A Christmas Carol tih Charles Dickens-a ziah kha a lo lang thar leh thin. A Christmas Carol tih lehkhabu Charles Dickens- a ziah hi i chhiar ve tawh em? He lehkhabu hi i chhiar tawh chuan Christmas hmandan dik chu i hre mai ang. He lehkhabu hian Christmas hman dana tur diktak chhiartuteah a hnutchhiah a, Christmas hmandan dik hre duh tan chuan chhiar ngei chi niin ka hria. He lehkhabu atang hian mi uikawm lutuk leh mahni hmasial lutukte hi an hlim ngai lova, chu ai chuan midangte tana nung thin leh mite tanpui thinte hi an hlim zawk a ni tih chiang takin a lang a ni. He lehkhabu hi Charles Dickens-a hian kum 1843-a harsatna namenlo a tawh laia a ziak a ni a, a bu chhut chhuah hmasak ber bu 6000 chu Christmas Urlawk niin an hralh zo nghal vek !

He lehkhabuah hian a changtupa ber Ebenezer Scrooge-a chu sumdawng hausa tak mai, mahse mahni hmasial tak leh Christmas hlutna pawh hrelo a ni a. Atan chuan Christmas hian hlutna a nei lova, he hunpui lai hian a sumdawnnaah a tam thei ang ber sum hailuh tumin thahnem ngai takin a bei thin tih bak chu he hunpui hian amahah danglamna a thlen ngai lo. Midangte tanpui ai chuan mahni in vulhlen a duh avangin mi tam takin an haw em em a, mahse pawi a ti miah lo, miten eng ang pawhin lo huain sawichhe mahse a sumdawnna a tluan chhung chuan engmah a ngaihtuah lo. Midangte sawisel leh endawng mai mai te chu engtihnamah a ni lo, a sumbawm a khah phawt chuan a hlim tawk em em a ni. A sumdawnna ringawt a buaipui avang chuan kar tawpa Chawlhni (Sunday) lo awm te hi a hnawksak a ti em em a, kar tluan hian chawlh awm miah lovin hnathawh theih nise tih hi a duhthusam a ni. Christmas ni te hi awm hauh lo se la a duh a, Christmas vuakvet vela bungraw han hralh hi a nawm tehreng nen a Christmas ni taka chawlh a ngai tlat te hi atan chuan thil huatthlalahawm tak a ni. A uikawm uchuak em avang chuan kutdawh tak ngial pawhin pawisa dil enah an en ngai lova, dil mahse a pe ngai hek lo. Hetiang mi anih avang hian atan chuan Christmas pawh chu thil ho mai mai, hun chuangliam mai a ni.

Chutia mahni hna leh a sumdawnna chauh ngaihtuaha a hun a hman mek lai chuan Christmas Urlawk zanah chuan a thianpa, a sumdawn pui thin thi tawh, amah ang thova mahni hmasial leh duham Jakob Marley-a thlarau chuan a rawn be ta tlat mai ! Marley-a thlarau chuan a dam laia mite tana thiltha ti duh lova mahni hma a lo sial lutuk avanga a chunga phurrit a lo insiam chu rawn hnuklutin, Christmas hunlaia Bethlehema naupiang lam reng reng ngaihsak lova hun a lo hman avanga a thihhnu a a hrehawm tawrh tak dante chu hrilhin  Scrooge-a chu a thihhnua a tawrh ang a tawrh ve loh nan leh Christmas hmandan dik a hriat theih nan inlamletna hun a rawn siam sak ta!

A thihhnu a a hrehawm tawrhtur chu a pumpelh theih nan Scrooge-a chu thlarau pathum, Christmas kal tawh, Christmas awmmek leh Christmas lo la awm tur thlarau ten an rawn tlawh a, a hma lam hun tur leh mahni hma a sial lutuk avanga nakin huna a chan tur a han hmuh lawk meuh chuan pa rilru sak leh tihmawh Scrooge-a meuh pawh a tang zo ta lo, chuta tang chuan Scrooge-a chuan Christmas hmandan dik a hre ta. A hun lo hman tawh dan thatloh zia hre chhuakin tunhmaa a nunchang chu paih bovin tunah chuan mithar a lo ni ta, mite tanpui duh ngailo kha tunah chuan mite hnena Christmas thilpek petuah a tang ta. Mite thil neih laksaktu ngawt ni lova, mitena hlim taka Christmas an hman theih nana thilpek petua a han tan meuh chuan hrehawm a lo tih thin em em Christmas chu hlimawm leh hlawk takin a hman theih phah ta a ni.

He thawnthu hian kan hma lawka Christmas hlimawm taka hman tum zawng zawngte hnenah hian thuchah ropui tak min hnutchhiah a ni. Chuvang chuan rintgute hian kan hma lawka Lal pianhun champha lawmawm tak kan hman tur hi mahni hmasial leh midangte ngaihtuah lo leka mahni duh dana hlimhlawp bawlna leh zu leh sa nena hmang mai lovin, Remna Lal piancham anih ang ngeiin kan chhehvelah remna thlentir tumin hma la ila. Mitin ten kan thinlung leh kan robawmte hawngin mite tana malsawmna ni turin he Christmas lo thleng tur hi i hmang theuh ang u.

- Laldinpuia | dinpuia@yahoo.com