Sudan Tampui mitthi 1993 thlalak leh Retheihna

He thlalak hi khawvel a thlalak hmingthang ber pawl a ni. Khawvela thlalak hmingthang leh mite rilru khawih anih avangin kum 1994 khan Pulitzer Prize a dawng nghe nghe. He thlalak hi Kevin Carter-a’n kum 1994 kuma Sudan rama tampui mitthi a thlen laia a lak a ni.

He thlalak hi tam avanga thih mai hmabak Sudan naupangin humhimna zawnga he hmun atanga Kilometre khat vela hlaa awm United Nation Food Camp a pan lai a ni a, a hnungah hian mulukawlh chuan he naupang hi a thih huna a sa ei tumin a lo chang reng thung.

He thla a lak hnu chuan Kevin Carter-a hi a kalsawn leh nghal a, he naupang chungah hian enge thleng tih tumahin an hre zui ta lo! He thlalatu Kevin Cater-a ngei pawh hi he thlalak a hmuh hian a shock nasa lutuk a, he thla a lak atanga thla 3 hnuah rilru hah avangin amah leh amah a intihlum nghe nghe.

A hnuah Kevin Carter-a Diary an haichhuah leh naah chuan he thlalak a lak ni hian a Diary-ah tihian a lo inziak a – Aw Pathian, ka chaw chu eng anga tuilo pawh niin eng anga puar leh tlai pawh ni ila a lothlawnin ka thehthang mai mai loving. He naupang a venhim a a retheihna ata a chhanhim theih nan ka tawngtai a. He khawvela mite hian kan chhehvela mite hi kan ngaihsak a mahni hma kan sial thinna zawng zawng hi a bo theih nan ka tawngtai a. He thlalak hian kan vanneih zia min hriatchhuahtir fo ngei ka beisei – tiin.

He thlalak thlirtu zawng zawng te hian kan vanneih zia hi kan hriatthar leh a va tha em! Kan ram a rethei, kan chhungkua kan harsa, NLUP kan dawng velo tih vang mai maia vui thin mihring te hian khawvel ram hrang hranga retheihna avanga midangte tawrhna han hmuhpui ngat ila chu Pathian laka vui thei kan ni lova, nunna hlu tak kan la neih avang ringawt pawh hian lawmthu sawi mai tur kan nih zia hi kan hre thar leh ngei ang le! BPL a luh duh avang ringawta party leh sawrkar hotute tlawna kan inretheih siak luai luai lai hian hausak nawmna pawh hre lo, rethei an ti tih pawh hre lo khawpa rethei he khawvelah hian mi maktaduai 925 lai an awm asin.

Hlawh tam tak nei chung pawha lungawi thei tlat lo kan sawrkar hnathawk te leh bum theih apiang buma an chanpual pawh haithen sak thin kan ram hruaituten dawhkan atanga thil engkim chinfel an tum a, mipui nawmsakna tur aia an tu leh fate thlenga nawmchenna tur khawl tuma an hmanhlel em em lai hian second 3.6 dan zelah hian retheihna avangin he khawvelah hian naupang ten an nunna an lo chan zel thung a ni.

Tuisik in tur i nei em?, Chenna tur in i nei em?, Chaw ei tur i nei em? Bank accout a pawisa i neih tam leh tamloh lam a ni lo. Concrete building i neih leh neihloh lam a nilo. Nunna i nei a rethei mahla riltamin i awmlo anih chuan khawvel mihring tluklehdingdawn 7,057,075,000 vel awmnaah hian a vannei zual mi maktaduai 6132 te zingah i tel tihna a ni! I vanneih zia chhut la Pathian hnenah lawmthu sawi ringawt mai rawh.

- Laldinpuia 1.12.2012

dinpuia@yahoo.com