Ka thiltawn...

[ Mahni chanchin sawi hi hreh viau thin mah ila a tulnain min nang tlat mai si a, chuvang chuan hreh tak chungin ka rilru a luah em avangin ka thiltawn hi ka han sawi ve teh ang... ]
Ni 18.1.2013 zan dar 8:30 vel chiah a ni, kan vengah Kohhran zaipawl hla zirnaah thingpui ka va lum sak a, ka intifel zo inlam pana ka haw chu kan in penna thlen hma deuh YMA Hall bulah hian pa pakhat hi a bike a bungraw phur bawr luk chung hian tlu lek lekin a bike hi a lo bawh a, amah chuan full face helmet a khum avangin tunge anih ka hre mai thei lova, ka rindan chuan a rui hle anih loh pawhin a chau tawngkhawng hle a ni ngei ang.

Tuemaw a nghak ang a a chawl anih dawn hi ti rilru chung chuan kal pelh ka tum a, chutah chuan thei leh theilo hian a rawn hawichhuak zawk a, zawite hian "Thianpa khawngaihin ka Bike hi main stand-ah min dahsak teh" a ti a. Kei chuan rang takin a Bike chu ka vawnsak a, amah chu Bike ah a la chuan avang leh Bike chu a bawh tlat avangin ka tan chuan a rit viau mai a, ka tisawn thei der lo mai a. Chutihlai chuan pa pakhat, amah pawh ka hriatchian tak mai hi chu kawngah chuan a lokal hlauh mai a, a hnenah chuan, "Ka pu hei min lo pui lawk teh, i tanpui lawk teh ang" ka ti a. Chupa chu a lokal hnai a, Bike a bawk reng chu a hriat ngai mi a nilo a, chutah Bike khalhtu chuan zu rim a lo nam bawk nen min pui duh ta der lo mai a. Thinrim tak chung hian, "Hetiang zu rui mai mai,hmelhriat pawh nilo lehnghal chu kalsan mai rawh. Duh leh ti khan mualpho rawh se" a ti a, a kalsawn ta daih mai a. Ka ngaihdan chu a ni chiahlo, mahse ka ngawi reng a.

Kei chuan harsa ti tak chungin thei leh thei lovin Bike chu ka la chelh reng a, Bike khalhtu chu tunge tih hriat chian tumin ka han thlek nawn leh a, a helmet kar atang chuan a mit meng chu ka hmu a, ka phu zawk mai a. Chu Bike khalhtu chu College ka kal laia kan zirtirtupa thin kha a lo ni reng a. Keimah zawk chuan nuamlo ka ti khawp mai a, a zah ka hlauh avangin ka hmel chu ka hmuh tha duh lova. Min tanpuitu tura ka sawm berin min kalsan tak hnu chuan chupa chu a lo hawi chhuak a, ka hmel chu a rawn hmu ta a. "Min hria em?" a ti a, kei chuan nuam ka tih chiahloh avangin ka hre lo der a, ka hriat ngailoh thuin ka chhang a. Chutah muang chang hian a helmet chu a phelh a, "Min hre tawh ang tiraw?" a ti a, kei chu ka lu ka bu ringawt a. "Khawngaih takin min ti mualpho suh aw, zu chu ka rui ngei mai. Mahse ka chan hi a chhe em a ni" a ti a. Kei chuan ka tih mualpho hauh loh tur thuin ka chhang a. Tichuan thei leh thei lovin amah chu ka vuan a, Bike atang chuan chhuk turin ka ti a, harsa ti tak chungin a chhuk a, leiah chuan a tlu nghal hnawk mai a. A hmel ka en a, a chau hle tih ka hria a, chutih rual chuan zu a rui hle mai a, chumi phenah chuan hreawm nasa tak a tuar mek a ni tih ka zuk hmu thei bawk a.

Bike chu ka hung fel a, lei a a mu chu ka tungtho a, ka thuttir a. Chutah chuan a chanchin chu min hrilh ta a.... a nupui nen thla 1 liamta velah khan an inthen tawh a. Tin tun thlakhat chhung hian a unau te 2 ngawt mai Aizawlah an boral bawk a, a nau chu accident avangin a boral a, a u chu kalna avangin a boral bawk a, chuvang chuan a rilru a hah hle ani tih thu min hrilh a. "Aw.... engvangin nge Pathian hian ka chungah hetiang em ema chhiatna a thlentir le aw?" a ti a, a rum vawng vawng a. Ka khawngaih em em a, hnem dan tur ka hrelo hle mai a. "E hlauthawng reng reng suh, Pathian chuan i hreawmna hi a hriatpui reng che alawm, a la tanpui em em ang che" ka ti a. A tuar nat zia ka hmuhin  ka khawngaih hle mai a, Aizawl atangin Serchhip thlengin engtinnge a rawn inkhalh thlen theih zawk le aw? ka ti a. A hmel chu ka en thin a, a beidawng hle tih ka hmu a, a lungngaihna leh a tawrhzat zia chu ka hriatthiampui ve chiah lo. Mahse a tuar na hle tih erawh a hmel atangin ka hmu thei.

Tichuan kan veng letliam a an chhungte nia a sawi te in lamah chuan a Bike chu ka va khalh phei sak a, chutih lai chuan YMA Hall kawtsirah chuan ka thuttir a. A thlenin te inah a bungrua vel ka daksak hnu chuan a Bike chuan amah chu ka va lam leh a, a chau hle mai a, Bike ah pawh a chuang tha hleithei lova. A thlen inah chuan ka thlenpui a, thungthlengah a mu nghal hnawk a, a rum leh ngawih ngawih thin a. Ka khawngaih lutuk chu han hnem ngaihna vak pawh ka hre si lova tichuan hreh tak chungin ka hawsan ta a.

He ka thil tawnah hian sawi zui tur tam tak a awm theiin ka hria... ka ngaihtuahna a ti kalthui khawp mai.