Rorelna dik

Serchhip Bial KTP chanchinbu Thalai Arsi Oct 2012 editorial

    Tunlai hian kan ram chhungah eirukna leh kuttling lova sum lakluh huatna leh hetiang hmanga inti milian te demna thu a tam hle mai a. Kan ram rorelna felloh zia te, mirethei leh hausa inkar a zau zia te kan sawi chamchi thin a, chutih rual chuan sual a zalen thu te, sual ni si sual nilo anga ngaih tam tak lo awm ta te pawh kan sawi fo thin. Hetiang karah hian keini KTP member te hian enge kan dinhmun ve tih hi keimahni leh keimahni kan inzawhfiah a fiah kan dawl takzet em tih hi kan inen fo a tul awm e.

    Kan ram rorelna dikloh zia leh sual ngampat tawh zia kan sawi mek lai hian KTP member te hian sual hi kan haw tak tak em, sual khawingamtu kan lo ni ru reng em? tih hi i inzawt fo thin ang u. Kan rama rorelna dikloh zia sawia rorelna dik duha hma kan lak mek naah hian keimahniah hian rorelna dik hi a awm em? tih hi inchhut fo ila. Pathianin min phut angin ringtuten dik takin kan ti em? Eiruk do inti si hian diklo takin thil kan lo tiin kan lo eiru tawh thin em? Mirethei leh hausa inkar a zau kan ti thin a, mirethei leh hausa inkar zau tirtuah kan lo tang em? tih te hi inchhut fo ila. Thil tha ber kan duh rual hian keimahni lam hi a theih chen chenah a tha thei ang ber leh sawisel kai lova kan awm phawt hi a pawimawh a ni.


    Keimahni lama fiah tlak, Pathian tihna leh Pathian thu zawmna a awm anih phawt chuan ka nghahhlelh em em rorelna dik hi he kan ramah hian a la thleng em em ang.