I thiltihin lawmman a nei dawn e

 Pathian rawng kan bawl thin a, he khawvela kan awm chhung hian theihtawpin rawng kan bawl a, Pathian ram tan thahnem kan ngai em em a, mahse engatinge khawvel mite an hlim em em lai a, keini Pathian ram beiseitute hi kan chauh a, kan hnungtawlh fo thin le? Kan eizawnnaah harsatna tam tak kan tawk thin a, Pathian hminga enzawnna thulh thak thak a kan vahchhuah chang a tam a, kan sum bawm muk lam aiin kan sum hloh te chu hlepah kan chhiar a kan lungawi hram hram a, chutih laiin kan thenawm lawk te kan mitsir ru a, anni zawng an vannei bik em em a, an sum bawm a muk tual tual a, Kohhrana a inhman pawh kan hriatloh laiin thawhlawm an thawh hnem em em a, lei malsawmna an dawng bik ruih ruih a, chutih laiin keini chatuan nunna neitute hian kan pawisa ip mawng kan hai kan hai ta bik hi engemaw a awmzia le? Anni aiin kan fel a, anni aiin thlarau bo kan man hnem tawh a, anni aiin Biakin kan hnaih a, chuti si engatinge Lalpa hian mal min sawm loha, hreawm leh harsa tak chunga a rawng kan bawlna hi lawmman min siamsak loh?

Heng zawhna te hi i inzawt ve thin em? Kei pawhin heng zawhna hi keimah leh keimah ka inzawhna tam ber a ni.

Pathian rawng kan bawlna kawngah hian harsatna paltlang tur hi a va tam tak em! Hla siamtuin'Harsatna tawk lo rawngbawltu awm maw?' a lo tih hi a dik thlawt a ni. Pathian rawngbawl hi a chang chuan a nawm viau lai a awm, mahse a tam zawk hi chu harsa tak chunga rinna nena tih chi a ni. Kei ngei pawh hi Pathian tana theihtawp ka chhuah chang hian vawi tam tak ka beidawng a, ka tlu a, ka hnungtawlh fo thin. Kan rawngbawlpuite an hlim em em laiin a rukah kan na ru tlat a, inkhawma biakin chhunga kan thut reng laiin kan ringhlel a, Pathian hnena kan tawngtai laiin kan beidawng ru tlat a. Hetiang hi ringtu tam tak awmdan a ni.



Hetianga beidawng taka ka awm thin lai hian hlaphuahtu pakhatina a hla phuah hian ka rilru ah beisseina nung min siamin min hnem thin,
"Tap lo turin i aw chu sum la,
I mittui hul rawh se.
I thiltihin lawmman a nei dawn e".

Ringtute hian he leia kan hreawmna leh tawrhna zawng zawngah hian lawmman kan hmu dawn a ni tih hi kan theihnghilh fova hei vang hian kan beidawng thin a, kan tlu a, kan hnungtawlh thin a lo ni. He thu hi ringtu kemah anga beidawng a, hnungtawlh a, ringhlel thin te hian hria ila ka va ti em! Kan thiltihin lawmman a la nei dawn e.

Lal Isua chuan Thupuan 2:10 ah chuan, "Thih thlengin rinawmin lo awm rawh, tichuan NUNNA LALLUKHUM ka pe ang che" tiin min tiam a, he thutiam hi a la pangngai reng. Lal Isua zuitute hian he khawvelah hian tuar mah ila, he khawvelah hian hreawmin khawvel mite aiin harsatnain min tlakbuak ngun mahse, beidawng tur kan ni lo. A chhan chu nakinah chatuan khua a var hunah kan thiltih lawmman kan la nei dawn a ni. Hreawm taka Lalpa rawng kan bawla, kohhrana midangte tih ve hman loh kan phak ang tawka rawng kan bawl a, peihlo chung chung pawha Pathian Biakbuka kan inkhawmna te hian lawmman a la nei dawn e. Chu lawmman chu thih thlenga rinawm te chan tur  ani, chuvang chuan lawmman hmu tlakin Lalpa rawng bawl ila thih thlengin a tan i rinawm zel ang u. Kan thiltih hian lawmman a la nei ngei dawn si a.

Nakinah chatuan khua a var ang a,
Khitah khian kan lei hringnun ngai lova,
Lallukhum dawng tura ka hming an lam hun chuan
Kalvari hnehna hlamawi ka sa ang.

- elldy 8.3.2012 |7:00AM