Lalpa rawng kan bawl tlat dawn

 "Lalpa rawng kan bawl tlat zawk dawn a ni" Josua 24:21
Israel fate kha Josua hun laiah khan hel hmang leh Pathian duh loh zawnga awmthin an ni a, chuti chung chuan Lalpa chuan dawh thei takin a enkawl zel a, Lalpa'n an chungah thil ropui tak te a tihsak thin a. Josua'n Israel mipui te hnenah tu rawng nge in bawl dawn, ti a a zawhna chu Israel fate chuan, "Lalpa rawng kan bawl tlat dawn" tiin an chhang a, Pathian dangte rawng bawl aiin Lalpa rawngbawl tlat an duh zia thu an sawi a ni.

Keini ringtute hi Pathian rawng kan bawlna kawngah hian ngun taka kan in enfiah a tul hle mai. Lalpa rawng bawl emaw kan intih lai hian hruaitu dang, thuhretu dang nei chungin rawng kan lo bawl ru reng lo maw tih hi ngun takin i inchhut ang u. Bible chuan hun hnuhnungah chuan zawlnei der te, sawichhetu te an lo la chhuak dawn a ni tih min hrilh a, heng hi tunlai khawvelah hian kan tawng chho mek zel a, Pathian Kohhran thianghlim pawhin beitu leh sawichhetu kan tawng mek zel anih hi.
Khawvela kan awm chhung hian ringtutena inpawlhona leh inlungrual taka Pathian kan fak ho theihna chu Kohhranah a ni a. Lal Isua chuan Kohhran a din a, chu chu khawvel awmchhung a awm tur a ni. He Kohhran hi Lal Isua din, vanram chabi kawltu leh mitthi khawkulh kawngkhar meuh pawhin a ngamloh tur a ni. Chuvang chuan ringtute tan chuan Kohhran hi he khawvel a himna awmchhun min venghimtu pawimawh tak mai a ni. Lal Isua chuan a Kohhran te kaltlangin mite thinlungah hna a thawk a, a Kohhran kaltlangin rawngbawlna leh thlarau bo sengkhawm hna ropui takin a thawk mek reng a ni. Hetih lai hian tunlai khawvelah hian ringtu inti te zingah Kohhran a leng ta lo riau ni a inhriatna te, Kohhran aia mahni duh dana rawngbawl tum ta tlat mai te. Kohhran inrelbawlna hi hnawk ta riau ni a hria te an lo awm chho mek zel a, heng mite hian Kohhran hi a a chhung atangin an kher an kher a, tihnghin an tum a, mahni inti ropui tak chunga Kohhran atanga inlakhran tumin ho an dap a, thurualpui an zawng mek zel a ni. Heng lakah hian Kohhran mite kan fimkhur a tul hle a ni.

Mizoramah sakawlh hlauhna thlarau a rawn lut a, India ram chhiarpui a hming ziahluh hlau ta tlat te, khua leh tui tina kan neih vek tur ID nei duh tlat lo te, thil engkim hmu sakawlha Kohhran member a awm hial pawh hlau ta tlat te tam tak an awm ta. Heng mite hian Kohhran an chhuahsan a, Kohhran hi mangang takin anmahni avang hian awm ila, inlungrual lo ila tih rilru puin Kohhran pawn atangin Kohhran hi min thlir reng a ni. Heng hian Pathian hmangaihin a rawng an bawl emaw an intih laiin anmahni lawmna mai an hmangaih reng a lo ni(II Tim 3:4). An ngaih ang hian Kohhran hi kan buai der si lova, keini zawngin Lalpa rawng kan bawl tlat dawn si a.

Chuvang chuan Kohhran mite hi heng mi tlemte avang hian buai lo ila, an thu leh hla hi engahmah ngaihsak lo ila, chung zawng aiin Pathian rawng kan bawlna hi ngai pawimawh zawk ila, rinawm takin Pathian tan rawng i bawl zel zawk ang u. Kohhran hi Pathian din, Vanram chabi kawltu kan nih hrerengin sakawlh hlauhna avanga buai ve mai mai lovin Lapa tan thahnem ngai takin Vana kan lawmman hmuh tur chu thlir reng chungin i kal zel ang u.

Min chimbuai tumtu leh Kohhran sawisela phatsantu awm mahse keini Kohhran hote zawngin Lalpa rawng kan bawl tlat dawn.

elldy : 31.3.2012 /6:00AM