Eirawngbawlna Gas chungchangah mipuite kan fimkhur a ngai

Consumer te i harh ang u XLVI

- Laldinpuia, Secy Serchhip District Consumers Association

Eirawngbawlna Gas (LPG) hi kan hmang tangkai ta hle mai a, in tam takah thing leh mau tuahna tur thuk kan neih tawhloh avangin Gas harsatna a awm phei chuan nunphung a khaihlak hial phah thin a ni. Chuvang chuan mipui te hian eirawngbawlna Gas chungchangah a kalphung kan hriat loh avanga harsatna kan tawh loh nan inremchem te, Gas book dan phung hriat chian te hi kan mawhphurhna a ni a. “Kei chu ka hrethiam ve chuang lovang” tih ngawt hi chhuanlam a tling tawh lova, chuvang chuan kalphung thar India ramin a hman chhoh mek hi a hmang tangkai thei tur tawk tala hre ve tura kan inzir hi a tul hle a ni. 

 

Gas book na

Gas hi tunah hian Online hmang vekin kan book ta a, a book dan chi hrang hrang misscall (Ph no. 8454955555 / 8927225667) te, whatsapp (Ph no 7588888824) te, Mobile apps (Indian Oil One) te, Portal kaltlangin https://cx.indianoil.in te leh IVRS (Ph no 7718955555 / 8391990070) kaltlanga book na te pawh hi hriat vek a tha khawp mai. Heng zinga emaw ber hmang hian Gas hi kan book thei a, chuvang chuan chi khat chauh thiam lovin chi hnih thum vel tal a book dan thiam hi a tha hle a ni.

Gas Book kaihhruaina

IOC hian eirawngbawlna Gas hi connection pakhatah subsidy in kum khatah bur 12 min pe thei a. A hma kha chuan book theih chin limit hi a hranpa awm lovin kum khata kan quota kan hman zawh hma kha chu a book mai theih thin a, kha vang khan Gas pawh kan hniang hnar hle thin a ni. Mahse tunhnaiah IOCL lam hian a book dan kalhmang hi an rawn ti danglam a, Domestic Cylinder kg 14.2 hi a buk dan chi hnihah thenin khawpui(Urban Area) a cheng te tan ni 25 danah chiah a book theih tawh a, Thingtlang(Rural Area) a cheng te tan chuan ni 45 kar danah chauh Booking hi a tih theih tawh a ni. Hei hi IOCL kalphung thar anih tawh avangin eirawngbawlna Gas hmangtute hian Gas a harsatna kan neih loh nan Gas kan hman danah inrenchem zawka kan kal a tul hle a ni.

Gas kan Book dan kan hriatchian a ngai

Tunah hian eirawngbawlna Gas kan lak danah hi online veka chinfel anih tawh avangin kan lak dan, kan lak hun leh kan lak leh lak loh kha mihring ni lovin computer(khawl thluak nei)in engkim a vawng tha vek tawh a, kan fimkhur a ngai a, dawt a sawi theih tawh loh a. Kan Gas book dan engkim kha awlsam taka thuneitu lamin an hmuh theih vek tawh avangin a mipui Gas latu lam hi kan chetfel hle a ngai a, Gas lak tum engah mah ila dan in a phal chin bak Booking a tih theih tawh loh avangin keimahni lam hian Eirawngbawlna Gas kan nghei mai loh nan kan Gas lak dan hi mumal taka kan chhinchhiah thlap thlap a tul hle a ni. Kan Gas book hun, a bur kan dawn hun, kan hman rei zawng te fimkhur taka kan lo chhut lawk ve thin a ngai a, chutiang ang ti lova duh ang anga kan hmang pawp pawp mai anih chuan laklawh deuha Gas nghei palh theih te a ni a, chuvang chuan mipui te kan Gas lak dan chin, kan book dan chin kan hriat a kan chhinchhiah thin hi a tul hle a ni.

 

I Gas lak kha a dik em?

Gas Book danah IOCL lam a khirh tak viau avang hian mipui tena kan fimkhur na tur leh kan thikthu kan tihchhiatna tur chu kan Gas lak kha a buka tling em? a hman theih hun chhung tur kan hmang em? Tih hi a ni a, thil diklo a awm anih chuan Agency ah emaw Consumer Court lama zualko vat hi kan tih tur a ni ang.

            Mithiam ten an tarlan dan chuan Gas Domestic Cylinder Kg 14.2 hi chhungkaw member 4-5 velin ni khata vawi 3 eirawngbawl nan hmang ta se ni 25-35 a daih tura ngaih a ni a, an hman khat deuh phei chuan chu aia rei ni 45 te pawh daih thei tura ngaih a ni. Kan hman danah kan chhungkaw member nen han chhut ila mithiam tena an sawi ang hi kan hmang em? Hetiang ang kan hmang lova ni 15-20 vela bur 1 a zo mai anih chuan a Gas buk a tlinglo emaw, tui a awm emaw a ni duh khawp mai. Chuvang chuan mipui te hi fimkhur ila, eirawngbawlna Gas kan lakin a buk tling leh dik tak chauh kan lak thin hi kan chanvo a ni.