Khawtlang hruaitute Consumer lama kan tan a tul

- Laldinpuia, Secretary SDCA

 

India ramah hian consumer chungchangah mipui te hi kan lal em em a, sawrkar hian khua leh tui te hi min humhalh tlat a, kan chanvo te hi dik taka kan chan theih nan dan min siamsak a, chu dan hmang chuan mi rethei ber pawhin kan chanvo kan humhalh thei a ni. Chu dan ‘Consumer Protection Act’ kan tih maiah chuan mipui te humhalhna dan hrang hrang a inziak a. Consumer Protection Act hian Consumer te chanvo a humhalh tha em em a, buk dik takin consumer te hian thil an lei a phut a, consumer te thil lei chu a himdam tur a ni a, buk dik, MRP aia sang lo a ni tur a ni. Bukna diklo leh MRP aia sanga thil zawrh leh hralh hi dan bawhchhiatna a ni a, dan hmanga hrem theih a ni.

 

Tun hma atang tawhin Retailer atanga mipui ten Buhfai kan lak thin hi a buk tling a vang hle mai a, hemi chungchangah hian mipui te atanga phun thawm leh sawi neuh neuh pawh a tam thin, mahse dan hmanga an chanvo humhalh duh a court lamah emaw zualko hi an awm mumal chiah loh avang hian tlangkam ti ti vela kan sawi hi kan duh tawk deuh pawh a ni mai thei e. Hetihlai hian Retailer lam hian sawrkar Kudam atanga an Buhfai lakchhuah hi a kimlo nasa hle thin niin an sawi ve thung a, chutiang chuan inpuh kual tawnna a thleng thin a, he harsatna hi a bulthum atanga chinfel mumal a awm ngai lova, a tawpa a tuartu chu mi rethei retailer atanga Buhfai la tu te bawk an ni leh thin. Hetiang hian thudik hailan mumal loh hian rei tak kan lo kual tawh thin a, Retailer atanga buhfai kan lak hi a buk dik tur a ni tih pawh hre lo tam tak kan awm hial tawh awm e, chutiang khawp chuan dik lohna hian min lo chenchilh tawh a ni.

 

Thil mak ve tak chu retailer te hian Kudam atanga Buhfai an lakchhuah hi a buk a tling lo tih an sawi lang fo thin a. Mipui te hnenah huai takin kudam lamin an buk dik loh thu an tlangaupui thin a, mahse department hotute lama an chanai tur dik taka buk tura zualko erawh an awm leh mumal lo a ni mai thei. Department lama a diklo a an lak ni a an hriat kha a tidiklotu khin emaw sawisel emaw ai chuan an ngam zawng mipuiteah a buk tlingloin an sem chhuak ta thin a, a tuartu chu mi rethei leh harsa te te, dan in a humhalh tlat a te kha an ni lawi si a ni(Department lama an sawisel ngam loh laiin mipui teah erawh inthlahrung lo takin a buk dikloin an pe lehsi a ni ber mai). 

 

Hetih lai hian Retailer te hian an thiltih diklohah hian thiam takin an Buhfai buk tlin loh thin chungchangah hmai phih nan NGO te emaw, khawtlang hruaitute emaw, Party lam hotute emaw phungbawmah sawmin anni lam hian thu delhkilh an lo neihpui mai thin niin a lang a, hei hi a tha lo hle. Tunhnai maiah pawh Mizoram khaw pakhatah chuan an khawtlanga Rulling Party hruaitute leh retailer ten Buhfai buk tlinglo a sem turin inremsiamna an nei a ni awm e. Buk tlinglo a consumer te hnena Buhfai sem hi dan bawhchhiatna lian tak a ni a, chuvang chuan NGO emaw Party emaw khawtlang hruaitute hian mipui chanai pawthek zawng hian sumdawng te emaw sawrkar lam emaw hi rem siampui lo se a tha hle mai. Chu ai chuan mipuiin an chanvo dik tak an chan theih nan sawrkara nawrtu zawkah te pawh tang se an tih tur dik tak a ni zawk ang. Retailer te hian Kudam atanga an Buhfai lak a diklo anih chuan huai takin department hotute emaw sawrkar lamah zuako ngam se a tha hle zawk ang. Sawrkar lam an diklo anih phei chuan dan an bawhchhia tihna a ni ang.

 

Khawtlang hruaitute hi consumer/mipui te lama tang zawk tur kan ni. Chuvang chuan khawtlang hruaitu leh NGO hruaitute hian kan thutlukna siam thin te hi mipui te chanai rahbehna emaw chhuhsakna emaw anih chuan dan hmaah thiamloh kan chang thei dawn a, chuvang chuan department emaw, sumdawng emaw te nena inremsiamna kan neihna kawngah fimkhur taka kan thlir a tul a, kan mipui te lama kan tan zel zawk hi a tul a ni.

 

Consumer te hian chanvo kan nei a, he kan chanvo hi dan ina min siamsak anih avangin khawtlang hruaituten emaw party hotuten emaw min tihdanglam sak ngawt thei lo.

 

 09072024