‘Zotawng Thu Nawi’ Leh Rempuia R.Lutmang

-Laldinpuia

 

Rempuia R.Lutmang ti a a thu leh hla ziah vela inziak thin Pu R.Lalrempuia hi Serchhip a State Bank a a thawh lai khan thian kawma han tihluai chi a ni nemlo a, thu leh hla lamah a tui thin tih pawh a khaw mipui te khan kan hre lawk lo. Bank a han kal pawh hian a kun tlat a, a phone hi a khawih melh melh a. A hnena kan duh leh mamawh kan thlen pawh hian engmah sawi lovin ngawi rengin kan hna chu a thawk mial mial a, a thawh zawhah a phone a khawih leh melh melh thin. Hetiang hi a awmdan anih avangin han nel mai a harsa a, be hmasatu nih a inthlahrunawm viau thin. Mahse a mizia avang hian Bank-a a hnathawh a muan phah lova, kan huatthu a sawi miah bawk si lo. Kan huatthu sawi miah silo kha, a nelawm loh, biak a nuam lo te kan ti a, chu chu mihring rilru leh ngaihdan a ni awm e. Serchhip a a rawn awm hma deuh atang khan, ‘Serchhip SBI a thawkte chu biak an har, an induh’ tih kha tlangkam ti tiah a tam hle a. Pu Rempuia lah kha a rawn awm hnu khan midang nela thian kawm vak chi a nilo bawk nen, kha tih hunlaia SBI a thawkte avanga miten SBI an sawiselna awm mek avang khan nelawm lo deuh tura ngaihna kha a awm ve pah nghal bawk atin ni.

 

SEDAL Life member

Serchhip a thu leh hlaa tui ten pawl an din Serchhip District Acedemy of Letters (SEDAL) ah hian kum engemawzah chu Secretary in ka awm thin a, SEDAL a ka thawhpui te kha kei aia upa leh putar pui pui an ni thin a, rilru leh ngaihtuahna a rualkhai tehchiam lo. Thu leh hla lamah talent ka nei lemlo a, mi talent nei erawh ka ngaisang a, an talent leh kutchhuak te a tam thei ang a pholan sak hi ka tum thin. Tum khat chu SEDAL a kan member pakhat hian, ‘SBI a thawk Rempuia khi thu leh hla lamah a tui lutuk, member ah i sawm ve ang u” a ti a. Secretary hmalakna turah dah a ni a. State Bank a thawk tih anih avangin biak chu a chakawm loh nghal viau nain member induhthawh a na bawk si a, member tur chuan ka han sawm a, a ni chuan inngaitlawm takin, “Keini thu leh hla te chu tumahin an chhiar ve duh lovang” a ti a, ka kalchhan chu hlawhtlingin member ah chuan a rawn inpe ve ta a. Serchhip an chhuahsan dawn khan SEDAL ah Life member a nih duh thu min hrilh a, tichuan Life member fee Rs 1000 pe in life member a thih thlengin a ni ta a ni. 

 

SEDAL member anih chhung hian SEDAL tena kan lehkhabu siam SEDAL Robawm ah thu tha tak a rawn ziak a. Tin SEDAL whatsapp Group ah hian thu a post ve zeuh zeuh bawk. Thu a post tam loh ngaihtuahin a thu post chhun erawh belhchian a dawl a, mifing leh miril ani tih a tawngkam chheh danah a hriat hle thin a, chu chu SEDAL a kan rual u zawkte mak tih a ni hial. A ruk takin SEDAL member dang te hian tlukloh enin kan en thin. Thian thenkhat te phei chuan a chungchang kan sawi hian, “Rempuia hi a awmlohna tur hmunah a awm a ni. State Bank a thawk lovin Teaching line a kal tur zawk a ni, a thu leh hla te hi a fiah a, belhchian a dawl a, chuvang chuan College ah emaw Higher ah emaw zirtirtu hna thawk se a inhmeh zawk ang” an ti fo thin.

 

‘Zotawng thu nawi’ lehkhabu lo pian dan

Kum 2019 atang khan kan awmna Branch YMA chanchinbu ‘Hmar Arsi’ editor atan min ruat a. Ka rilruah chanchinbu a regular features atan Pu Rempuia thuziah hman a lo lang nghal a. Ka bia a, a inthlahrung viau naain ka nawrlui a, tichuan chanchinbu kartin chhuakah regular features atan ‘Mizo tawng huang’ kan siam a, chutah chuan Mizo tawng chungchang a rawn ziak ta a, kumkhat chhung bahlah miah lovin a rawn ziak ta char char a, a bengvarthlak thin hle.

 

Tumkhat chu April 11, 2020 zing lam dar 8:46 khan whatsapp in ka msg a, “I thuziah te hi a buin khawr pum teh, a hlu dawn riau a nia”, tiin. Ani chuan a bu a siam ngaihna a hriat loh thu leh ‘Zotawng thu nawi’ tia a ziah thin chu a bu a siam ve a chak thin thu chu a sawi a. Kei chuan lehkhabua a thuziah te khawr pum aduh phawt chuan puih ka inhuam thu ka hrilh a, tichuan kan inbe chho ta zel a. Hemi ni hian nilengin a khat tawkin lehkhabu buatsaih chungchangah kan inbe reng a, zan dar 10:47 thlengin kan sawi dun a, thutlukna kan siam fel ta. Hei hi ‘Zotawng thu nawi’ tih lehkhabu bul tanna chu a ni.

 

Covid-19 Lockdown lai te a ni bawk a, hunawl a tam bawk nen kan phur dun hle mai a. Ani chuan email leh whatsapp hmangin a thuziah te chu a rawn thawn thin a. Lockdown lai chuan kan lo hman deuh bawk nen, a chang chuan chhun zan zawmin editing kan bei a, a chang leh kan awl vang vang a. Kei, zotawng kalhmang hrelo leh ziah dik dan pawh hre mumal lovina Mizo tawng lehkhabu pawimawh tak tur buaipui chu ka huphurh ru angreng khawp mai a, mahse Pu Rempuia thu leh hla tha leh bengvarthlak tak tak te a bu a kan tichhuak tur chu ka phur em em bawk si.

 

Rempuia’n a thuziah min rawn thawn chu lo siamremin lehkhabu turin ka lo phuah rem zel a. Amah hi thil chikmi a ni a, tawngkam a duh tui a, mi pawi sawi palh a hlau hle a. “Ka thuziak ulh i tih lai leh midang huatthu sawi thei tur lai awm a awm anih chuan lo paih/siamrem zel rawh” a ti tak na a, a thuziakah chutiang ulh leh siamrem ngai a awm pawh ka hre lova, hre mah ila ka siamrem thiam pawh ka ring chiah lo. A lehkhabu kan buaipui chhung hian a chang chuan a inthlahrung em em a, a chang leh a ngenngawl em em a, a duh khirh bawk si a. Amah ang maia taima leh thilchik mi turah min ngai ta emaw ka tih chang a awm fo thin a, a hriatloh hian ka vui fo thin. Mahse keimahah engkim a innghah vek thu te, fahrah leh mi tlahlang mai anih avangin an chhung leh khat hnaiah tuna ka buaipui anga a thu leh hla han buaipui thei tur an awm loh avangin tumah han belh tur chuan a neih loh thu a sawi te chuan amah khawngaihna leh a thu leh hla te a bu a tihchhuah a midang chhiar theih tura tarchhuahpui chakna min neih tir a, chu chuan kan vuivaina te pawh chu a bengdai leh thin!

 

Tichuan a lehkhabu hmasa ber ‘Zo tawng thunawi’ chu uluk mangkhenga kan edit dun chu a bu a chhuah turin kan peih ta a. Tihsual awm thei tawhlo tluka uluka kan edit kha a bu a han chhuah meuh chuan tihsual kan lo la nei tho tih kan hmu chhuak a, mahse tih ngaihna a awm tawh lo. Kum 2022 a kan reprint leh hma zawng kha chu kan tihsual kha kan hai der lui ta anih kha! Ka mi ngaihsan em em lehkhabu kan tichhuak thei a, a bu chhiar tur a lo awm ta chu ka thaw huai a. Tunah chuan ka mawhphurhna ka hlen ta! Ka ti a, mahse kan thu a lo la tawp awzawng lo!

 

A bu kan khawrpum zo a, a chhutna Press leh a hralh dan tur kan han sawi tan chu, ka Press duh zawng leh tlawm ni a ka hriat deuh te ka han sawi chu, “I buaipui thei angem” a ti ta zel a. “Han buaipui tir tur tumah ka nei lo, nangmahah ka innghat” a tih tak zelah chuan ani Bangalore lamah a awm daih si a, a chhut leh hralhna zawng zawng pawh ka kutah a awm dawn tih ka hre nghal a. Phur vak lo chung chuan a tawp thlenga engkim tidun turin kan inbe ta a. Aizawl lamah a sem darh hna lo thawk turin a thianpa Rza nen min inhmelhriattir a(tun thlengin kan la inhmu lo), chu nen chuan phone in kan inbe thin a. Tin hmun hrang hrangah a ngam tlak leh a thian te a lo be kual a, chung tena an mamawh ang chu ka hnenah rawn sawi zelin keiin Serchhip lam atangin Dak ah emaw Sumo remchangah ka lo thawnchhuak zel thung a.

 

Chutiang a kan han thehthang zeuh zeuh takah chuan chhut hmasak ber chu a zo titih ta mai a, State Library in a copy 200 an lei tur pawh a daih tak loh avangin kum 2022 khan State Library in a hlawma an lak dawn tho avangin kan reprint leh ta a ni. A lehkhabu kha release a duh lo a, “a zahthlak, intihlar ka duh lo” a ti tlat a. Mahse release loh ringawt chu thaa kan hriatloh avangin a awmloh laiin Serchhip a SEDAL Foundation Day kan hmannaah Oct 15, 2020 khan kan release ta a ni.

 

Pu Rempuia kha

Mi inngaitlawm a ni a, a thuziak reng reng kha ngun taka kan chhiar chuan a tumah a chiang a. Mi thuziak hnial ngai a awm a a hnial chuan a hnial chhan mumal takin a tarlang thiam a. Mizotawng reng reng kha “hei hi a dik ber” ti ngawt lovin tunhmaa kan pi leh putena an lo hman thin dan leh ziakmi hmasa tena an lehkhabu ziaha an tarlan dan atanga khaikhinin thulakna mumal tak nen ngaihdan rawn vawrhchhuakin “hetiang hian lo hman thin a ni” tiin zawldawh takin a tumah a khalhlut thiam a. Kha tak kha mi bik a nihna a ni. 

 

Tlemlai deuh khan phone call in kan inbia a, “I lehkhabu bu 2-na tur hi buatsaih leh tawh ila” ka ti a. “Nia bu khat daih vel chu ka khawl khawm leh tawh asin” a ti a. E chuti chu lo hrual mum la kan tichhuak leh dawn nia kan inti a. Chumi hnuah kan inbe lo vang vang a, June 22, 2024-ah a thih thuin min han deng thut mai kha a mak ka ti hle mai. Mi inngaitlawm leh biru, mi te hriat hlawh vak lemlo, mahse Mizotawng hmasawnna atana hna ropui tak thawk mek Pu Rempuia hi a lei taksa awm tawhlo mahse a kutchhuak ‘ZOTAWNG THU NAWI’ lehkhabu leh chanchinbu hrang hranga a thuziak hnutchhiah te hian a hlutzia a tarlang fo zel dawn a ni.