Aadhaar thla a lak atanga kum 5 naah Aadhaar Card a nei ve ta!

Aadhaar card thla la vek tawh, mahse Dak atanga Card dawng lo, download thei silo, in enroll nawn thei tawh si lo kan awm anih chuan a hnuaia kan harsatna kan chinfel dan atang hian in harsatna chinfel a lo nih hlauh takin ka’n tarlang teh ang.

Kan thianpa fa, PC Malsawmzela chu kum 2017 khan Aadhaar Enrollement Centre-ah thla a la a, a Card hi an nghak char char a, Dak atangin a lo thleng thei silo a. Rei tak an nghah hnuah an beidawngin Consumer hruaitute hnenah hmalakpui turin an rawn ngen a, keini chuan theih ang anga hma lo la in enrollment centre lam kan han zawh sak thin a, tihngaihna vak an lo hre lo va. Lo kal se a thar a enroll kan lo tum dawn nia, an ti mai a. An enrollment receipt atang pawhin a card chu kan download sak thei lova. Kum 2021 khan enrollment centre ah thla an lo lak that sak leh a, chu pawh chu download theih a ni lova, a card a chu dakah emaw pawh a lo thleng chuang hek lo. Kan hnenah an sawi thin a, enrollment Centre lam kan biak lahin an bangbo bawk si a, Dakah a bo a niang an ti mai zel a. An harsatna chinfel dan kawng kan hre bik lo hle mai. Khaw laia inhmuh chang te hian an fapa Aadhaar Card chungchang hi min zawt ang tih kan hlau ru zek zek fo thin. Chutiang chuan hun kan hmang liam a, min zawh chang hian, “Kan complaint sak mek che u, dak atangin a rawn thleng ve mai ang” kan ti leh ringawt zel. Mahse dak atangin an Aadhaar Card an dawng thei si lo. Chutiang chuan hun a liam a, kum a liam zel a.

Kum 2022 kum laihawl velah khan an mangang chuan a tihdan min lo zawnsak leh teh, aadhar card a neih loh avang hian ration ah pawh kan thun thei lova, thil dangah buaina kan nei kan nei mai an ti a. Kei chuan a hmaa ka lo tih ngailoh UIDAI website ah complaint a theih tih ka hmu fuh ta hlauh mai a. UIDAI website lamah complaint ka siam sak a, UIDAI lam hotute nen pawh email hmangin kan indawr kan indawr a, anni lam chuan a Aadhaar Card hi a chhuah tawh thu leh postal department lamah a card hi dak a an post tawh thu te postal lam atang bo anih thu an rawn sawi a, online a lo download mai turin min rawn ti a. Kei chuan online a download turin a no kan hre lova, a enrollment no kan neih atang lahin kan download thei si lova, tiin ka chhang let a, UIDAI lam chu an reh hmak a, min reply zui lo.

A hnuah Prime Minister Office ah ka zualko leh a, UIDAI lam chuan Postal Department-ah an lo refer a, Postal Department lam chuan min rawn be pawp a, postal Department lam chuan dak a UIDAI in an thawnna receipt emaw consigment no a awm loh chuan tihngaihna an hriat bik loh thu min hrilh a.

Beidawng taka kan awm mek maiin Central sawrkarin mipui te lungawihlohna thlenna tura a siam https://pgportal.gov.in/ ah Ocober ni 24 khan ka complaint leh a, October 28 chawhnu lamah khan UIDAI hotu lam ten min rawn be pawpin ka naupang complaint-a chu kum 2017 khan a Aadhaar card hi tihchhuah anih daih tawh thu min lo hrilh a. Kei chuan kan harsatna leh a card a hmuh loh dan te chu ka sawi a, a card duplicate min rawn thawn turin ka ti a. Anni chuan Aadhaar Card hi mimal Document pawimawh anih avangin a hranpa a an thawnchhuah theihloh thu leh a card duplicate emaw pawh direct a min rawn thawn theih loh thu min hrilh a, Aadhaar thla a lak lai khan a phone no a awm loh avangin direct a kan download theih loh thu min hrilh bawk a, Aadhaar no chu lo chhi nchhiah turin min ti a, phone kaltlang chuan a noi chu min rawn hrilh a. Tichuan chumi hmang chuan Enrollment Centre a kal a, a card download turin min ti a. An thurawn ang chuan kan ti ta zel a, Aadhaar thla a lak atanga kum 5 naah PC Malsawmzela chuan a Aadhaar Card tak tak chu ni 30.10.2022 hian a hmu ve thei ta chauh a ni.

(He Aadhaar Card neitu ina a Aadhaar Card neih dan kawng hi a kual kawiin kan buaipui nasa ve em a, a expert ka nih bik loh avangin kawng engmah hre loin kawng awm thei ang ang dap chawpa kan sual chhuah anih avangin a ka rawn tarlang a ni. Hemi ang kawnga harsatna nei an awm anih chuan awlsam takin kan puih theih tawh ngei ka ring)