Kohhran leh YMA rawngbawlna

 Mizo te hi kan tih tawh lam chu nawr na \hin tak kan ni a, kan bawhzui tawh lam chu a eng uar uar zel a, hei hi kan hnam vanneihna leh kan thawhho \hat zia lantirna a ni awm e. Covid-19 khawvelin a buaipui em em pawh a ram puma buaipui lutuk ngailo turin kan in dang chat thei niin a lang a, mipui ten sawrkar thu leh hla kan zawm a, India ram state dang te khaikhin  pawhin kan che \ha hle a ni

      Mizote hian tunhma kan pi leh pute hun a\ang tawhin Kristian sakhaw tan leh khawtlang kan theihtawp kan lo chhuah tawh \hin a, mahni eizawnna hna \hulh \hak \hak ten Kohhran leh khawtlang rawngbawlna hi kan lo thawk kawp tawh \hin a. Missionary ten Kohhran an rawn din a, Missionary te thovin khawtlang rawngbawlna atana thawh hlawk tak mai YMA an din leh bawk a. A dintu thuhmun leh an thiltum pawh inkalhlo anih avang hian tun hma zawng khan Kohhran leh YMA hian lungrual takin hma an la ho \hin. Hetiang anih avang hian YMA ten khawtlang hmasawnna kawnga rawng a bawlna leh Kohhran ina thlarau bo man tura rawng a bawlna hi insi riala kalin in pawlh buai miah lovin hun an lo hmang fo tawh \hin.

      Hetiang anih lai hian \hangthar nun kal zelah hian Kohhran leh YMA rawngbawlna hi kaih darh hret hret, inhlattir hret hret a ni ta em aw, tih hi mi tam tak hmuhdan a niin a lang.

      Mi tam tak chuan Kohhran rawngbawltute chu YMA hruaitu atana hman chiloh, Kohhran a mi tui tak chu YMA lam tuilo tur leh YMA lam ngai pawimawh lo deuh tura ngaihna a awm a. Chutiang bawkin YMA leh khawtlanga inhmang tak chu Kohhran rawngbawlna serh leh sang a tel ve tlak lo emaw, tel lohtir \ha zawka hmuhna a awm fo \hin. He ngaihdan hian Kohhran leh YMA a tihhran mai bakah Kohhran leh YMA dintu kan Missionary hmasa te rilru put hmang ang lo takin ngaihdan a piantir thei a ni. Hemi chungchangah hian ngaihdan \halo Kohhran leh YMA a inep theihna tur zawnga rilru pu awm palh thei a ni a, chuvang chuan Kohhran leh YMA nihna leh a rawngbawlna chin hi kan hriat chian a \ul hle a ni. Kohhran chu inkhawm  tluk tluk ringawt tura ngaihna emaw YMA chu zu zuar hnawtchhuak a, chhiatni \hatni a mi tuamhlawm tur ringawt a ngaihna emaw kan neih chhung chuan Kohhran leh YMA rawngbawlna kan chiang lo tihna a ni ang.

      YMA leh Kohhran te hi rawngbawlho tur an ni. Kohhran hmasawn tur chuan a member te khawtlang nunah hmasawnna a awm a ngai a, khawtlang hmasawn tur chuan YMA ten hma an lak a theihtawp an chhuah a ngai ang.

      Kohhran hian YMA takin hma a la ang a, YMA hian Kohhran duh danin khawtlang a enkawl ang. Chuvang chuan Kohhran a inhmang tak te hian YMA hmalakna kan ngaih pawimawh a \ul a, Kohhrana kan \angkai ang bawkin YMA ah kan \angkai tur a ni a, YMA a mi \angkai tak hi kan awmna Kohhran apiangah mi \angkai kan ni tur a ni.

      Kohhran leh YMA a kan mawhphurhna te hi hlen turin theihtawp kan chhuah tur a ni a, pakhat thlauhthla \hak a a pakhat a zawk uar em em te hi a \ha ber lo. Tin kan Kohhran leh khawtlang thila kan  inhmanna reng rengah midang aia tui fâl lutuk nih hi a \ha ber lo bawk. Kohhran leh YMA a kan rawngbawlna hi kan eizawnna a nih lem loh chuan a chin tawk neih thiam te pawh a \ul ang. He khawvela kan awm chhung chuan kan eizawnna leh chhungkua hi kan ngai pawimawh tur a ni a, chhungkaw uaplum lo lutuk a Kohhran leh khawtlang thila inhman te hi chhungkaw tikehchhetu a ni thei. Tin mahni inchawm thei, mahni mamawh thawkchhuak \hin mi kan nih a pawimawh bawk. Mahni mamawh pawh thawkchhuak thei si lova Kohhran leh khawtlang tana inhmang tak nih te hi thil zahthlak tak a ni. Sawrkarah emaw Private firm ah emaw kan thawk anih pawhin kan nitin hna tibuai lo thei ang bera Kohhran leh YMA a kan inhman a \ul khawp mai. Kohhran a inhmang tak sawrkar hna a thawhna hmuna zelthel tak an awm hian anmahni bakah Kohhran an tihmingchhia a ni. YMA a inhmang tak, khawtlang duhloh zawnga awm reng mai an awm chuan YMA an ti mualpho tihna a ni.

            Chuvang chuan Mizo te hian kan bawh lam kan beih vak rual hian Kohhran leh YMA a kan tel dan chin tawk hi kan thliar thiam a ngai a, hlamchhiah erawh a tih chi loh ang. Kohhran leh YMA hi hmu hrang lo ila, khawtlang nun siam\hatna tura kan mamawh ve ve a ni a, Kohhran leh YMA rawngbawlna hi inrem leh \angho chunga kan kenkawh thiam a \ul hle zawk a ni. Kan ram leh hnam a dinchhuahna tur chuan Kohhran leh YMA rawngbawlna hi kan chhawm nun chhoh zel a ngai ang.

-          Laldinpuia