Hri leng karah i rawngbawlna hlen rawh

 Nang erawh chu engkimah fimkhur la, hrehawm tuar la, lam hna thawk la, i rawngbawlna kha hlen rawh (Ephesi 4:5)

Kum 2020 atangin hripui hlauhawm tak Covid-19 in min tibuai a, thla 9 chhung tehmeuh mai Biak In pawh hawng thei lovin ringtute min tibuai a, a ninawm zo zai ta hle mai. He hri laka fihlim mah ila, kan chhehvel lawkah a la awm reng si avangin fimkhur a la tul bawk si. Kan awmdan hi zalen tak si hian kan ralmuang lo ru riau ni hian a hriat, a pawi hle mai.

            Hri avangin Kohhran rawngbawlna a kal hleithei lova, Kristian  Thalai Pawl rawngbawlna pawh a kal hleithei lova chutiang zelin Sub-Committee dang dang te pawh. Inkhawm theih hun nghakin kan chawl deuh thup ni ber hian a lang. Engchen nge kan la tawrh dawn a, engchen nge Biak In hi kan la khar dawn a hriat si loh. Kan Kohhran mi leh sa te kan ngaihtuahawm hle mai. Inkhawm theih lai pawhin infuih thar reng kan ngai kha a ni a, thla 9 zet kan inkhawm tawh loh hnuah phei chuan infuih thar leh intihchak kan ngai nasa lehzual ngawt ang. Kohhran rawngbawltuten engtin nge hri pui leng karah rawngbawlna kan chhunzawm theih ang? tih hi zawhna pawimawh tak chu a ni ta.

           Pathian Biak ina kan inkhawm theih lai khan Biak in chhungah Pathian thu tha tak tak te kan ngai thla thin a, mahse kum khat chhung dawnlai mai chu Pathian thu zirtirna mumal ngaithla lovin kan awm ta a. Hetiang hunah tak hian ringtuten Biak in pawn lama kan mawhphurhna kan lanchhuahtir  a ngai ta hle a ni. Kohhrana rawngbawltu chauh ni lovin Kohhran member Pathian tihtu zawng zawng ten keimahni tawk theuha kan tih theih rawngbawlna kan kenkawh a tul ta hle a ni. Engtin nge kan tih tak ang? Khawlai a pawngpaw au vak vak lam a ni lo, sawrkar phalloh laia Pathian thu behchhana sawrkar inkaihhruaina dan bawhchhiat lam a ni lo, midang te aia rau bik riaua inhriatna lam pawh a ni chuang lo. Mitin ina kan tihtheih langsar tak chu kan nitin nuna Krista chanchintha hril darh hi a ni. Kan bula awm apiang te hnenah Pathian thu sawi lam ni lovin kan chezia leh tawngkam atangin Pathian tihtu kan ni tih hi lantir ila. Pathian thu zawm ila, dikna ngai pawimawh ila, Kristian te nundan tur ang rengin he khawvelah hian i nung ang u.

            Khawvel ina harsatna kan tawh mek naah hian a rilru hnual zawngin thlir lo ila, midang dem zawnga tuan lovin Pathianin mawhphurhna min pek hmuhchhuah nan hmang zawk ila, Biak Inah inkhawm thei lo mah ila, kan thinlungah Pathian tihna awm se, Pathian ni serh ila, kan Kohhran hotute thu leh hla ngaichang thiam ila. Kohhran member chaklo zawk leh sual bawia tang mek te keimahni kutin dawm kang ila, he hri avanga sual setana’n Kohhran mite a hruai bo mek naah hian ringtute hian theihtawp chhuahin midangte Pathian lam an lo hawi leh theih nan I tang tlang ang u. Pathian Biak ina inkhawm theihloh avanga Pathian biak leh a thu ngaihthlak thulh phah chuang lovin chhungkaw maicham kaltlangin Pathian pawl ila. Hri leng karah kan rawngbawlna bahlah chuang lovin kan mawhphurhna leh tih theih tawkah Pathian ram a zau zel nan kan rawngbawlna hlen turin theihtawp i chhuah tlang zel ang u.

 

-          Laldinpuia

10/01/2021