Motor Vehicle Amendment Bill 2019

-          Laldinpuia

India ram hi khawvela motor accident tamna ber pawl a ni a, sawrkar report-a a lan danin kum 2015-2017 chhung khan kumtin motor accident avangin mi nuai 1.46 atanga nuai 1.5 inkar an thi thin ni a report a ni. Hetiang anih avang hian heng motor chetsual thin nachhan hrang hrang te zinga atam ber hi fimkhur loh vang leh dan zawmloh vang anih thin avangin he dan thar Motor Vehicle Amendment Bill 2019 hi hman anih hnuah chuan motor accident hi a tlem phah ngei ringin he dan thar hi duanchhuah a lo ni ta a ni.

He Bill, ‘The Motor Vehicles (Amendment) Bill 2019’ hi kum 1988-a siam Motor Vehicles Act siamthatna tur a ni a, July 23 khan India ram rorelna sang Lok Sabha-ah pass a lo ni tawh a, he Bill hi Rajya Sabha ah tunhnai khan pass leh a ni a, India President in a sign chiah a ngai tawh a, India President in a sign veleh he Bill hi Dan(Act) a lo ni tawh ang. The Motor Vehicles (Amendment) 2019 in a tarlan Dan hrang hrang te chu a tlangpui lo tarlang ila:

Dan bawhchhia te chawi tur

·         Traffic Dan bawhchhiat avanga pawisa chawi theih hniam ber, Dan awmsa a Rs 100 ni thin chu Rs 500 a tihsan a ni a. Pawisa chawi theih zat tam ber chu Rs 10,000 a ni ang. Motor Seat belt hren loh vanga chawi thin Rs 100 ni mek chu Rs 500 a ni tawh ang a, Helmet khumloh avanga chawi thin Rs 100 chu Rs 1000 emaw thla thum chhung an license cancel emaw a ni ang.

·         Driving license tel lova motor khalh chu Rs 5000 chawitir an ni ang a, Traffic light/signal bawhchhia emaw motor khalh laia Mobile Phone hmang chu Rs 5000 chawitir an ni bawk ang.

·         Thuneitute dan siam zawmlo chu Rs 2000 chawitir an ni ang a, license hrensak chunga motor khalh lui chu Rs 5000 fine tir an ni ang.

·         Rui chunga motor khalh chu Rs 10,000 fine tir an ni ang. Hlauhawm taka motor khalh te chu Rs 5000 fine tir theih an ni bawk ang.

·         Permit tel lova motor khalh chu Rs 10,000 chawitir an ni ang.

·         Motor-in a phurh zawh tawk aia tam phur te chu Rs 20,000 fine tir annih bakah a phurh zawh tawk aia a rihna Ton 1 zelah Rs 2000 fine tir an ni ang. Passenger phurh zawh tawk aia tam phur te chu, Passenger phurh zawh tawk an pelh naah Rs 1000 zel fine tir an ni ang.

·         Two Wheeler in a phurh theih tur aia tam Passenger inphur te chu Rs 2000 leh thla 3 an license hrensak thlenga hrem theih an ni ang.

·         Kawnga Emergency vehicle kian duhlo te chu Rs 10,000 thleng fine tir theih an ni ang.

·         Naupang kum tlinglo in Motor Vehicle dan a bawhchhiat chuan naupang enkawltu (guardian) ten a mawh an phur tawh ang a, Rs 25000 thleng an fine bakah kum 3 Jail tan thlenga hrem theih a ni ang. Naupang kum tlinglo chu Juvenile Justice Act hnuaiah hrem an ni ang a, Motor Registration chu cancel a ni bawk ang.

·         Insurance thi chunga motor khalh chu Rs 2000 fine tir an ni ang.

Accident-a mawhphurtu

            Motor accident chhan zawng zawng hi driver te inthlahdah emaw thiamloh vang a ni vek bik lova chhan dang emaw vang te pawh awm thei a ni a, chuvang chuan Motor Vehicle Amentment Bill 2019 hian hetiang kawngah hian contractor emaw, a mawhphurtute hremna dan a ruahman tel bawk a ni.

·         Contractor chuan a kawng siam chu dan in a phut anga a siamlo emaw a kawng siam chhiat avanga motor accident phah emaw nunna hial chan emaw an awm anih chuan chu vanduainaah chuan a mawhphurtu a ngaih leh a chunga dan lekkawh a ni ang.

·         Kum tlinglo te hi Motor khalh phal a nilo a, kumtlinglo in motor a khalha chetsualna a tawk anih chuan a enkawltu(guardian) chu a mawhphurtu anga ngaih a ni ang a, thubuai siamsak a ni ang.

Zangna dawmna

·         Motor insut avanga nunna chan an awmin a luman Rs 2,00,000 zangnadawmna atan pek tur a ni ang. Hliam an awm anih chuan Rs 50,000 pek tur a ni ang.

·         Motor accident avanga zangnadawmna hi accident a thlen atanga thla ruk chhungin dil tur a ni a. Accident tawk chu a boral anih chuan amah enkawltu/rokhawmtu chu a dilsaktu a ni ang.

·         Motor accident tawk te, an chetsual hlim ‘Golden Hour’ (chetsual atanga darkar khat) chhunga a thlawna enkawl dan tur sawrkar laipuiin a duang ang.

Tanpuitu humhimna

            Miin motor accident tawk a tanpui a, a hliamte a bawisawm a nih chuan, chu accident tawk chu an bawisawm na lamah emaw lo boral palh pawh nise a bawisawmtu chungah chuan Dan hmangin engmah hremna emaw thubuai emaw siamsak a ni lovang.

Driving License

            Motor Vehicle Act 1988 ah chuan Driving license diltu chu pawl VIII passed a ni tur a ni a, mahse 2019 a dan tharah erawh chuan hei hi tihbo a ni a. Driving School atanga Certificate nei tawh phawt chuan Driving License hi dil theih a ni.

            Heng sawrkarin Dan a siamtharah hian Dan bawhchia te pawisa chawi tur hi a sang ta hle mai a, hei hi mipui ten kan hriat a tul hle. Dan hi mipui te tana siam a ni a, Dan dik taka zawmtute tan chawibelh tur engmah a awmlo, khing hremna hrang hrang tarlan te khi dan bawhchhia te tana siam a ni. Dan hi zawmin ngai pawimawh theuh ila, khua leh tui tha tak kan ni mai ang.

……………………………………………………………………………………….01082019