VELLORE-AH THISEN

  Pathian zarah damloh hrisel vang ni lem lovin, eng engmaw thilah tun kum hnih(2018-2019) chhung hian Vellore ah tum 3 lai ka zin ta reng mai a. Vellore hmuna khawlum leh ei tur mumal lo avanga hreawm ti taka ka awm lai hian CMC a Mizo inkhawmna huna ka va inkhawm ve chang hian damlo tam tak, a bikin ka Mizo pui te, beidawng leh natna khirh tak tuara an awm ka hmuh hian ka rilru a khawih thei hle a, khawlum avanga ka hrehawm tawrh hi anni lak chuan a lo nep zia leh ka vanneih zia ka ngaihtuah fo \hin.
    Hetia Vellore-a kal ve fo ta chu ka Mizopui dang damloh vanga kal te hi ka rilruah an awm fo thin a, engtin nge an tana ka tangkai ve theih ang? Enge tihsak theih ka neih? tih hi ka ngaihtuah fo thin. Ka lehkhabu ziah harsatna tawk tam takina inhnem nana an hman ve thin thu(phone call kaltlanga min rawn hrilh danin) 'Hringnun Thawnthu' tih lehkhabu kha ka present dawn em ni ang? tih ka ngaihtuah a. Mahse damlo chau tan chuan khawlum hnuaiah nen lehkhabu chhiar chu thil peihawm loh tak a nih ka ring leh ta deuh a, ka tipuitlin ta lem lo a. A pahnihnaah chuan pawisa faiin ka tanpui ve dawn em ni ang? tih ka ngaihtuah leh a, mahse he ngaihdan hi sit na ka nei nghal pang mai. Kei sawrkar hnanghet thawk lo, sum leh pai lama chhuan tur neilo tan chuan thil zahthlak mai a ni. Rs 100 vel den denin han sem dawn pawh ni ila, an chawhma Tui intur leina man pawh a daihlo emaw a ni ang a, thilpek hming a pu ve si ang a, a tlem tham si a, a zahthlak mai mai tih ka ngaihtuah a, hei pawh hi ka ti leh ngam ta lo.

    Vellore-a ka Mizopui damlohna hrang hrang avanga mangang taka awm mek te tan hian engkawng ber chuan nge tangkai theihna ka neih ang aw??....... Pathian hnenah te tawngtaiin ka dil a, chuta ka rilru a thil lo awm ta thut chu 'THISEN PEK' hi a ni. Mahse he thil hi ka thil chakloh ber a ni. Thisen pek hi a hlau ber pawl a mi ka ni ngei ang, mahni khuaa KTP leh pawl dang hminga thisen kan pek tum pawh hian a mualpho ber/hriau a vih ka hlauh avanga midang tena ennawm thlira min thlir ber kha ka ni miau va, mahse chu chu Vellore a damlo te tana ka tih theih kawng awmchhun niin ka hre bawk si a. Hospital Chaplian Rev Lalbiaksanga ka rawn a, a nin kawng min kawhhmuh a. Tichuan thisen pe tur chuan ka inbuatsaih ve ta a.
    Thisen chu pek ngei ka tum avangin ka inbuatsaih nasa ve viau. Tuna kan awmna hi hmun hreawm leh lum lutuk mai anih avangin chhun zan zawmin Ceiling Fan hnuaiah kan mu a, South Indian chaw kan ei that theihloh avangin chaw mumal kan ei lova, chaw kan nghei phah fo thin. Chutiang chu thisen pek tum tan chuan pek theihlohna chhuanlam tha tak a ni ngei ang. Mahse ka thiltum tawh chu tihhlawhtlin ngei ka tum avangin thisen ka pek dawn zanah ka mu hma a, a tuk zingah hma takah ka tho a, nidanga ka tih peih ngailoh exer lain kan awmna piah tlangah te kan va lawn a. Chhunah chaw a tam thei ang ber ka ei bawk a. Fit tawk ni a ka inhriat avangin ka thian dang mi 5 te nen vawiin (1.6.2019) tlai dar 4 ah Christian Medical College, Vellore chu kan awmna Otteri, Vellore atangin kan pan phei ta a. Test ngai ang ang te kan test a, ka BP an check a ka BP a lo hniam a, tuisik in tura min tih angin no 3 vel ka innghal a, tichuan ka pe thei ta hlauh a. Ka thian dang 5 pek tum zingah 2 in an pe thei lova, tichuan keimah nen mi 4 in kan pe thei ta a. Vellore hmuna damlo mangang ka Mizo pui te ngei tana thisen pe theia min siamtu Pathian hnenah lawmthu ka sawi e.
    He khawvela kan thiltih chak em em tihlawhtling theia kan awm hi hringnun nawmna lai tak a ni awm e.