Lal Solomona kha engtiang chiaha hausa nge a nih?

Bible ah hian Chronicles leh Lalte chanchin ziah naah Israel Lal Solomona chanchin kan hmu a, a fin leh hausak avangin a lar hle a, sum leh pai lah a ngah nangiang mai, a thih hnu kum sang tam tak ah pawh a sum leh pail eh a rote kha khawi hmunah emaw hmuhchhuah leh theih inring mi tam tak in a ro awmna zawngin an hmanhlel mek reng bawk a. Hetiang taka Lal thiltithei leh hausa Lal Solomona, khawvel lal zawng zawng hausak leh finna a khum vektu hi tunlai khawvela sum leh pai hlutna atangin engtiang taka hausa nge anih i han chhui dawn teh ang.

Engvanga hausa nge a nih?

Lal Solomona hausak nachhan ber chu Pathian a tih vang ti ila a dik nachen a awm ang. A lal tantirh khan Pathian hnenah thil tam tak a dil a, inngaitlawm takin finna leh remhriatna te a dil a, Pathian chuan a thildil mai bakah hausakna te a pek belh tih Bible ah kan hmu a. Lal dang zawng zawng te aia finna leh hausakna kawngah pawh chungnung zawka a siam tur thu Pathian thutiam kan hmu a, kha vang khan Solomona khan a lal chhungin sum leh paiah hausakna nasa tak a dawng a, a lalram pawhin a ngheh phah a ni. Solomona sum lakluh na hnar te hi kawng 3 in a sawi theih ang –

1) Tax(Chhiah): Solomona khan a finna leh remhriatna Pathian atanga a dawn kha remchangah hmangin a khua leh tui teah chhiah tam tak a khawn thin(I Lalte 12:4) 

2) Thilpek: Solomona kha a hming than em avangin khawvel hmun danga lal te pawh khan a thu leh hla an ngaichang thup thin a, thilpek te an pekhawm ruih ruih thin a ni. Tin Sheba lalnu in a rawn tlawh kha thilpek tam tak a pe bawk (I Lalte 10:25)

3) Sumdawnna: A chhehvela sumdawng te nena an insumdawn tawnna atangin sum leh rangkachak leh thil hlu tam tak a lalut bawk. (I Lalte 10:22)

 

Engtiang chiaha hausa nge a nih?

Bible ah hian Solomona hausakna leh a rohlu neihzat chiah hi chiang taka ziahlan a awm lova, a rangkachak dawn zat leh thil hlu tam tak a dawn thin erawh tarlan a nithung. Chuvang chuan Solomona’n a a sum neih zawng zawng emaw, a hausakna belhkhawm zawng zawng hi a chiah chiah hriat a har deuh a, Bible a tarlan chin mi thiam ten tunlai mila an teh a, a hlut zawng an tarlan ringawt pawh hi puitham fe chu a ni.

Solomona hian Israel te chungah kum 40 ro a rel a, he a rorel chhung hian Solomona hnenah hian kumtin sumdawngtena an rawn lakluh chhiar tel miah lohvin rangkachak talent 666 zet a lut a(I Lalte 10:14). Talent khat hi US pound 75 (Kg 34.3) vela rit a ni. Tunlai hlutna a chhut chuan rangkachak talent khat hi US $ 17,50,400 man vel a ni. Chu chu India pawisa in Rs 120,388,136.00 a ni! Lal Solomona hian kumtin rangkachak talent 666 a dawng anih chuan kumkhatah rangakchak atang ringawta a sum lakluh hi US $ 1,165,766,400.00 zet a ni. Chu chu India pawisa chuan Rs 80,178,498,576.00 vel anih chu! Rangkachak baka a thil dang neih zawng zawng chhut sakin Solomona hausakna zawng zawng belhkhawm hi US $ 2.1 Trillion zet a tling niin mithiam te chuan an sawi. Rangkachak a ngah hle mai a, chuvang chuan a hunlai chuan tangkarua pawh engahmah an ngai lova, lung ang maiin a awm rei rui a ni awm e (I Lalte 10:27).

Bible hunlaia Israel te lal Solomona kha engtiang chiaha hausa nge a lo nih tih hriat nan tunlai khawvela mi hausa te nen han khaikhin dawn ta ila. Tunah hian khawvela mi hausa ber chu Amazon Company neitu Jeff Bezos a ni a, a sum neih zawng zawng belhkhawm chu US $ 108.9 billion a ni. Mi hausa ber dawttu Microsoft neitu Bill Gates a sum neih zawng zawng belhkhawm chu US $ 91.9 billion a ni a, a pathumna Warren Buffett-a sum neih zawng zawng belhkhawm chu US $ 90.1 billion a ni (US $ 1000 billion hi US $ 1 Trillion a ni tih hria ila). Tunlai khawvela mi hausa ber te pawhin pathian hausakna a pek Lal Solomona hausakna hi an la el pha lo hle a ni. Khawvela mi hausa ber 3 te hausakna zawng zawng belhkhawm ai pawhin Lal Solomona hi a la hausa fe zawk a ni.

  - Laldinpuia