KTP Gen Conf 2018, West Phaileng

Mizo te zinga thalaite punkhawm tamna ber KTP General Conference vawi 57-na chu March 1-4, 2018 chhung khan Wes Phaileng ah ropui taka hmanzawh a lo ni ta a, Mizoram hmun hrang hrang atanga thalai kalkhawm ten hlimtakin hun kan hmang a, a lawmawm hle mai.

KTP General Conference hi tam tak chuan a hautak zia te, a dawngtu buaizia te leh a senso tam zia leh pawisa sen uihawm zia te kan sawi a, mi tam tak rilru pawh a hnual phah hial thin. Amaherawhchu heti chung hian KTP Gen. Conf hi KTP member te hian a kum a telin kan hlut tial tial zawk niin a lang, hei tak hi Pathian ropui zia KTP te zinga a lanna zawk a ni ngei ang. Tun tum West Phailengah pawh khan palai riaklut zawng zawng kha 21456 kan ni a, lang a Conf hmangtu kha mi 4536 awmin, Conference kal nan motor 2322 hman a ni bawk. Kum 2020-a Serchhip in kan dawn ve hunah phei chuan palai hi 30000 an tling chho thuak mai thei a ni.

Tun tum West Phaileng ina KTP General Conference an dawng tur hi mi tam takin an huphurhpui hle mai a, an khua a te si mikhual sing chuang dawng tur chuan an khawngaihthlak lutuk tih te thawm a ri tam hle. Hei vang hian tam tak chu Confernce kal loh phah te pawh an awm hial awm e. Amaherawhchu West Phaileng mipui te erawh hi chuan chutiang rilru an lo pu ve reng reng lo mai a, engkim Pathian kutah an lo dah vek mai a. An khawchhunga Kohhran pawl hrang hrang te pawhin inhawng takin Conference an thleng ho vek a, chuvang chuan Pathian pawhin mal a sawmin Conference hlawhtling tak, tun hnu thlenga sawizui hlawh an thlen theih phah ta a ni.

Conference report-a a lan danin tunah hian KTP member hi mi 1,47,665 (mipa 92,220 leh hmeichhia 55,445) kan awm mek a, kum hmasa report aiin member 2745 in kan pung a ni. Branch 860 awmin, Bial 201 kan awm bawk. Kum 2017 chhungin KTP member 469(Mipa 405 leh Hmeichhia 64) an boral. Kum 2017 chhungin KTP member Biakina innei 1484 kan awm laiin hmun danga innei chu 2058 lai kan ni. Thawhtan zan KTP member inkhawm zat hi chawhrualin 33387.90 kan ni a, chu chu KTP member zawng zawnga chhutin 22.56% a ni. Kum kalta chhungin KTP member Missionary a chhuak hi mi 166 kan nei a, Bial leh Branch KTP tena Missionary kan chawm zat belhkhawm chu 3089 a ni bawk.

General Conference thupui hi ‘Isua Chhinchhiahna Put’ tih a ni a, speaker Rev Vanlalzuata’n a sawi thiam hle. Inkhawm a nuam a, fellowship a khamawmloh thin hle bawk. Khatianga thalai sing chuang Pathian faka zai han hmuh khan a thlamuanthlak hliah hliah a ni. Heti hian ka ngaihtuah : Tunlai khawvelah kan Mizo thalai te ruihhlo in a tibuai mek a, ram inrelbawlna dik lovin Kohhran a sawhkhawk tan a, hei hian kan pawnlam tisa mai piah lamah kan thlarau nun thlengin a nghawng a ni. Kan ram, Kristian ramah hian Dikna kan aupui a, Rorelna Dik kan mamawh a, heng kan zawn zawng zawng te hi KTP member tin teah hian a lo awm vek a. Keimahnin kan lanchhuahtir thinloh avang hian kan mualpho phah fo thin a lo ni. Mizoram a mipui hmun sawma thena hmun hnih dawn hauhtu KTP member tin te hian keimahniah Isua Chhinchhiahna hi pu theuh ila, midang hmuhah lantir ila, he kan Zoram hi kan siam tha em em ang.

“Tun achinah hian tumahin mi tibuai tawh suh se;

ka taksaah hian Isua chhinchhiahnate ka pu si a.” Galatia 6:17

 -Laldinpuia