Food Security Bill hi enge ni?

Ram rethei India: India ram hi ram zau tak mai a ni a, tunah hian mihring tluklehdingawn 1.21 (2011 census) zet kan awm a. India rama mihring cheng ringawt hi khawvel ram dang US, Indonesia, Brazil, Pakistan, Bangladesh leh Japan a mihring awm zawng zawng belhkhawm nen kan inzat vel nghe nghe a ni. Heti khawpa mihring tamna ramah hian mirethei pawh kan tam nangiang mai. UN in a chhut dan chuan khawvel a mirethei awm zawng zawng za zela 25(25%) hi India rama cheng an ni. Chutih lai chuan India ram hi khawvel a ei leh bar tharchhuak hnem ber kan ni bawk.

Food Security Bill: Hetiang hi kan dinhmun anih avang hian kan sawrkar laipui chuan a khua leh tui te tuihal dangchar a maktaduai tam tak mai rum thawm chu ngawih bosan mai thei lovin sawrkarna chelhmektu UPA chairperson Pi Sonia Gandhi chuan kum 2014 a inthlanpui lo awm tura an party vote zawnna tur mitthla ran chungin ngunthluk taka a ngaihtuah hnuah India rama mirethei tam tak nen man tlawm zawka ei tur an neih ve theih nan ruahmanna lian tham tak mai, Food Security Bill kan tih tak mai hi a lo duangchhuak ta a ni.

He Food Security Bill hian a tum ber chu tuna vantlang a eitur semna(retailer,kudam etc.) kan tih Public Distribution System hmanga a ram mipui te hnena ei tur man tlawm zawk a an lei theih nana ruahmanna a ni a. He Food Security Programme hi khawvelah a lian ber tur a ni dawn nghe nghe. He programme hian India rama mihring cheng zawng zawng za zela 70 vel a huam thei dawn a. He programme hi hman anih meuh chuan India  rama mipui maktaduai 218 zet te chuan man tlawm takin Buhfai kan lei thei dawn a ni. He Food Security Programme kalphung tur tlem azawng lo tarlang ila:

*      He Food Security Programme hnuaiah hian India rama mihring cheng zawng zawng hmun thuma thena hmun hnih te chuan ei tur man tlawm zawkin an lei thei ang.

*      He Food Security Programme hi India ram pum tuam thei tur chuan thla 6 vel a ngai dawn a, ram pum a tuam hunah chuan sawrkar in hemi atana kum khat chhunga a sum senral tur chu Rs 125,000 crore a ni ang!

*      He Food Security Programme hnuaiah hian State sawrkar tena he Programme a tel thei tur mirethei an thlanchhuah te chuan mi 1 zelin thla khatah Buhfai, Wheat leh Cereals te kg 5 theuh kg khatah Rs 3, Rs 2 leh Re 1 te in an lei thei ang.

*      Mirethei zual AAY family tena thla khata Buhfai kg 35 man tlawm zawka an lei thin chu kalpui chhunzawm zel a ni bawk ang.

*      Raipuar te leh nu nau pawmlai nei te chuan tanpuina Rs 6000/- thleng an dawng thei ang.

*      Naupang kum 6-14 inkar ten a thlawnin chaw an dawng ang.

*      Hemi kalpuina tur atan Central sawrkar ten State sawrkarah tanpuina pawisa an pe thin ang.

*      Central Sawrkar ten State sawrkar ah hemi Programme atan Buhfai phurhnaah tanpuina an pe bawk ang.

*      He Programme kalpui chungchangah dik taka kalpui anih leh nih loh a huamchhunga VC ten an vilin an enpui thin bawk ang.

Anni leh keini: Mi State ah chuan Food Security Programme hi hman theih turin an duang tawh pawh a ni mai thei, an hmang dawn nge dawn lo chu an State zalenna a ni ang. Mahse India rama State tam tak hi chuan an hman a rinawm. Hetih lai hian keini State-ah chuan kan pu berin TV Interview ah meuh, ‘Kan State a rethei a, kan afford ve lo’, ‘kan hmang ve lovang’, ‘keini tan a theih veloh’ a ti dum dum a. A hnu lawk kar 1 velah, ‘Kan sawrkar hotuten an buaipui mek a, tun atanga thla 6 velah kan hmang ve thei ang’ a ti leh a. Kan hmang tak tak ang nge hmang tak tak lovang tih hi sawi thiam a har ta hle mai. Engapawh chu lo ni ta se la, ram rethei, ngaihtuahna sang tak nei zofate, ram politics kal dikloh avanga economy belhchhan tur neilo leh rethei taka rum mek te hian he Food Security Programme kan State ina hman hman ve hun hi nghakhlel takin I lo thlir phawt mai teh ang u.  

-Laldinpuia