CHANGE: Kan inpeih em?

“Be the Change you wish to see in the world” – MK Gandhi

CHANGE kan ti a, kan ram kalphung hi thlak danglam turin thalaite ka inhawrkhawm a, kawng hrang hrangin kan in aukhawm ruih ruih a, 'Together we can make a Change' kan ti a. Kan tanrual chuan kan ram leh hnam hi kan siamthat theih thu kan inzirtir mup mup a, tangrual turin mipui kan aukhawm mek a. Kan sawi tam tawh a, kan  bei nasa tawh a, a hre tur awm chin chuan kan ram leh hnam siamthat a tul zia te, a siamtha tura kan tanrual a tul zia te hi kan hre theuh tawh hlawm niin a lang. Hetih lai hian hma la tak tak tur hian kan inpeih em tih hi a dawt chiaha kan zawhna chhan ngai chu a ni.

            Kan duh ber danglamna/ram kalphung siamtha tur hian thawh tur tam tak a awm a, hun engemaw chen chu hreawm kan tawrh pawh a ngai ngei ang, chumi hreawm tuar tur chuan kan inpeih em? Siamtha peih tak tak silo hian kan lo au ve mai mai em ni zawk? Kan ram leh hnam hi siamthat kan duh takzet anih chuan kan cheziaah, kan ngaihhlut zawngah leh kan nitin hun hman danah hian kan lantir a hun hle tawh a ni. Siamthat tur tam tak awm te hi a zavaia sawi tur chuan tun tumah chuan hmunin min daih lovang, chuvang chuan a pawimawh zual 3 chauh I han tarlang teh ang:

Pakhatna - Zirlai ten lehkha kan zir dan hi Change a ngai:

            Zirlai te kan nu leh pa tena lehkha zir tura min hauhna tawngka lar tak chu, "Lehkha zir tha rawh, chuti lo chu kut hna i thawk ang a, i la rethei mai ang" min ti thin. He tawngkam hi nu leh pa tam tak ten kan fate kan zilhna leh hauhna tawngkam a ni. Han ngaihtuah chiang ta deuh ila, thil chiang tak lo lang ta chu nu leh pa tam tak te hian kan fate hi hnathawh pumpelh turin kan zirtir ni te pawhin a ngaih theih. Kuthnathawh hmusit a kuthnathawk mite anga awm velo turin kan fate lehkha kan zirtir thin. Kan fate chu lehkha zir peih se, nakinah sawrkar hna thawk se, sawrkar hna lian tak an thawh phei chuan thawk mang lo pawhin sum hailut teuh teuh se. Sum an hailuh tam phawt chuan khawi atanga an lakluh nge tih pawh ngaihtuah tulah kan ruat lo. Chu chu kan fate lehkha zir laia kan mitthla a ni fo thin.

            Hei hian a hrinchhuah lian tak chu Corruption a ni! Kut hnathawh kan hlamchhiahin kuthnathawktute kan endan a hniam em em a, hei hian kut tling lova, hnathawkvak lova sum hailuh duhna kan rilruah lian takin a tuh mek a, hei hian kan hnam nun a khawih chhe mek a ni.

            Lehkha zir zawng zawng deuhthawin sawrkar hna kan mitthla a, sawrkar hnain min daih silo! Mahni kuta din tumna lam ai chuan sawrkar hna a nih tawh dek dek chuan inhamtan hram hram kan tum a, sawrkar atanga hlawh hmuh hrim hrim kha kan hmu sang viau ta pawh a ni mai thei e. Sawrkar hna thawklo kha chu hna hmuloah kan inchhuah vek mai a, hei hian kan rama unemployment problem pawh nasa takin a tipung a ni.

            Chuvang chuan zirlai te hian kan lehkhazir danphung pawh hi kan thlak danglam a hun ta hle mai. Sawrkar hna chauh mitthla hi kan ra zirna in kan thanmawhbawk a ni. India ramah lehkhathiam ber dawttu state kan ni a, lehkha thiam pawh kan tam, chuti chung chuan kan ramchhungah kan economy dinhmun a chhe em em a, Silchar kawng ni 2/1 a pin hlekin fairel bel a ruak a ni nghal der mai a. Sawrkar hna kan inchuh hum hum a, kuthnathawk turin tumah kan intirchhuak thei lova, kan ram leilung hausakna te pawh hian a ram neituten haichhuah nachang kan hriat hmain hnamdang hoten min haichhuahsak mek zel zawng anih hi.

            Chhan tlak kan kan la awm lai hian zirlai te hian kan thiamna hmang hian kan ram leh hnam hi i chhan ang u. Sawrkar hna ringawta inhnangfak tum lovin kuthnathawk lamte hi uar ila. BA, MA val kuthnathawk nih hi a zahthlak loh a ni tih hi i hrethar leh ang u. Kan lehkha zir danphung te pawh hi siamtha ila, awmawl leh eitui tur ringawta lehkah zir lovin kan thawhrimnaa finna leh remhriatna kan neih theih nan te lehkha zir ila. Sawrkar hna ringawt mitthla chunga lehkha zir lovin, mahni ke a dingchhuak thei turin lehkha i zir tawh zawk ang u.

Pahnihna - Kan ram leh hnam kan humhalh a ngai e

            'Ram leh hnam humhalh' tih tawngkam na na na hi chu kan hre zing tawh hle mai. Mahse kan rilruah hian engtinnge ram leh hnam kan humhalh ang tih hi kan chiang ta chiah lo emaw chu aw a tih theih. Chuvang chuan mipui te hian kan ram leh hnam humhalhna kawngah hian kan fimkhur lehzual a tul ta hle mai. Kan ramah hian ram neih danphung (Land Settlement system) hi mumal taka kalpui a ni lova, chuvang chuan duh zah zah ram kan nei a, a hausa deuh phei chuan khaw dinna tham zet te ram kan nei a. Hetianga mimal ram neih theih dan bituk mumal sawrkar  lamin a ruahman loh avang hian harsat nasa tak kan tawk mek a ni. Development work thawh dawn reng rengin kan harsatna lian tak ni thin chu compensation hi a ni. Hmasawnna hna thawh dawn reng rengin compensation beiseia a ruka mirethei ho buma ram lei vak hi kan mihausa te hian an ching hle a, hei hi thil pawi tak a ni. Hemi tibo/titawp tur chuan mipuite hi kan tanrual a ngai hle a ni.

            Tin, chu mai bakah sum leh pai kan duh lutuk na lamah hnamdang hnena kan ram kan hralh chiam chiam thin te hi kan inenfiah deuh chu a ngai hle mai. A sum nei nei kan intlawnsiaka a ngam huai huai hnenah kan ram hi kan hralh mai mai anih chuan nakin lawkah chuan hnamdang ho hian min la chimral thuai mai ang. Chuvang chuan mipui te hi i harh ang u. Sum leh pai hmanga hnamdang ten kan ram leh hnam min hnehchhuh mek lai hian kan ram leh hnam chhan nan theihtawp i chhuah ang u.

            Kan ramah hian Mizoram mipui chawm khawp leilung hausakna Pathianin a dah a, sik leh sa leh boruak thianghlim nuam tak min pe a. Hemiah hian lungawi tawk ila, he kan ramchhung ngeia Pathianin malsawmna min pek hi haichhuak thei turin mipui ten theihtawp chhuah ila. Hnamdang tena sum leh pai hmanga min hnehchhuh hi i phal lovang u. Mizo te hian Mizoram lo chu ramdang kan nei lo, chuvang chuan kan ram leh hnam neihchhun hi i humhalh tlat ang u.

Pathumna - Kan Value system hi siamthat a ngai

            Kan ramin Korean Serial Film kan buaipui em em a, chumi rual chiah chuan tunlai khawvel changkanna ina a ken tel Social network zing ami facebook kan buaipui em em a. Hei hian kan zirnaah pawh nghawng nasa tak a nei niin a lang. Kum 2012-ah HSLC Result a pass percentage chu 72.27 anih laiin kum 2013 result-a pass percentage chu 58.63 chauh a ni. kan tlakhniam chak dan hi a zahthlak zawk hial a ni. Heti em ema kum khat thil thua kan matric result a tlahniam ta mai hi sawi tur tam tak a awm ang. Tam tak chuan Facebook leh Korean Serial kan buaipui lutuk hi kan zirna pawh hian a tuar ani an ti a, a dik thawkhat viauin a rinawm. Kan nunphung thlira puhmawh tur remchang ber pawh a ni bawk.

            Tunlai thangthar te hian kan ngaihhlut zawngah hian kan fimkhur a tul ta hle mai, a changkang apiang kan duh a, a chhuak thar apiang kan bel a. Kan rilru a changkang a, mi hmasawnna a bulthut a thlir lovin a rahchhuah atangin kan lawr fo thin. Hei hian kan hnam nun a tichhia a ni. Kan value system en hian kan ram leh hnam hmabak hi a tawrhhlelhawm hle tawh niin a hriat. Sum leh pai awmna lamah kan thle dual dual a, sum awmna tawh phawt chu mawi leh mawilo pawh tlu lovin kan bawh huam huam a. Mahse sum thawkchhuak tura beihna kawngah erawh kan ke pen a khat hle thung si. Hna kan thawk peih lova, rim taka hnathawka an thawhchhuahsa a intungnung te ai chuan thawk mang lova sum nei thei riau leh sawrkar sum tham then dan hre riau te kha kan ngaihsan zawng leh kan entawn an ni tlat tawh a. Hei vang hian kan ramah hian corruption pawh a hluar zel lo theilo a ni.

            Dikna tana huaisen taka hmalatute chu mimawlah kan chhuah hlauh a, kan sual leh hlepruk thup nan Kohhran kan bel a. Simna tel si lovin Kohhranah rawng kan bawl a, hei hian Kohhran hmel pawh nasa takin a tibal mek a ni. Ngaihsan tur, entawn tur kan mamawh kan ti a, mahse keimahni lam mi ngaihsan leh entawn turin kan nung peih lo fo thin. Hetiang tur a ni lo, ngaihsan tur dik hi i ngaisang ngam ang u. Ram leh hnam thatna duhtute hi ngaisang ila, diklo taka thilti te leh mipui bum ching te hi ingaisanglo ngam ang u. Dikna tan avanga rethei te, dikna tan avanga mi zawng zawng pawh ina mimawl ti a an koh te hi kan ngaihsan tur zawk an ni e.

A veitu ni ngawt lova a taka hmalatu kan mamawh

            Kan ram leh hnam veitu nih hi a har lo, kan kalphung diklo lai hriat leh siamthat a tul zia vei em emtu nih hi a har lo. A har ber leh mi tamtak tena kan harsatna ni ta chu a taka hmala ngam kan awm thinlo hi a ni. Inchhiar ta ila he kan ramah hian kan ram kalphung siamthat duh hi tam tak kan awm ang. Mahse siamtha tura ke pen hi hmuh tur an vang hle thung. Hruaitu kan mamawh kan ti a, mahse midangte hruaituah tan kan tum si lo. Chuvang chuan a thuphunga veitu ringawt ni lova ataka hmalatu kan nih hi a tul ta hle a ni.

            Vawiina ram veitute hian kan ram leh hnam hi kan siamtha ngamlo anih pawhin nakinah chuan a siamthatu an la awm tho tho dawn. Chutih hunah chuan tuna siamtha ngamlo te hian midang siamthat saah inthlahrung takin kan la awm tho tho dawn. Chuvang chuan tuna siamtha theia kana wm lai hian nakina thangthar lo la awm lehzel tur tena a chhelai siamthatu min tih theih turin kan ram leh hnam siamtha a CHANGE thleng tur hian tangrual ila theihtawp i chhuah ang u.

-         Laldinpuia