Tunlai khawvela KTP te mamawh Kristian Chhungkua

‘Kristian Chhungkua’ tih ringawt hi chu a hming atang ringawt pawh hian KTP member te zingah hian a mikhual lo hle mai, KTP member te hi Kristian Chhungkaw chungchang hi han inzawt ta thut hlawm ila, a hrilhfiahna awlsam tak kan pek theih theuh a rinawm. ‘Kristian Chhungkua’ tih han lamrik ringawt hian rilru a lo lang chiang nghal leh bet tlat a awm a, chu chu Kohhran Hmeichhia te hi an ni. Anni hian Kristian Chhungkaw hmalakna beihpui hi an kovah an nghatin an ta neih chawt tawh a, thawk pawh an thawk nasa tawh. Thalaite hian Kristian Chhungkaw hmalakna zawng zawng hi Kohhran Hmeichhe kutah kan papek tawp mai a, kumpuan thupui leh bial inkhawmpui velah pawh thalaite zingah thupuia rawt pawh kan awm meuh lo niin a lang.

Kristian Chhungkua hi Kohhran Hmeichhe lam hian an ta hauh deuh tlat mai bawk a, thalaite thawhpuia han insawm a tanho dan tur sawihona leh hmalak hona pawh awm lem lo hian anmahni hmeichhe huang atang hian theihtawpin hma an la a, chhung inkhawm neih leh neihlo hi tehfung berah an hmang ni deuh berin a lang a, kumtin ngawrh takin campaign an nei mup mup reng a ni. Kohhran Hmeichhe lam hian Kristian Chhungkua hi an buaipuina a lo rei tawh hle mai a, kum 1970 atang khan Kristian Chhungkaw dinhmun tehna siamin ram puma hmalak tan a ni a, tun thleng hian ngawrh takin hma an la chho mek zel bawk.

He an hmalakna avang hian Kohhran te pawhin hma kan sawnin chhung inkhawm neih lamah pawh inchhiarna lam atang chuan hma kan sawn hle tih a lang. Kohhran Hmeichhe lam record-a a lan danin Kristian Chhungkaw beihpui an thlak kum(1970) ah Kohhran chhungkuaah nitin chhung inkhawm nei 3.06% an awm laiin kum 2009 report-ah chuan 46.61% an awm tawh a ni.

Kristian Chhungkua hi kan Synod lam pawh hian a ngai pawimawh khawp mai a, kum 1981-ah khan ‘Kristian Chhungkaw Kum’ a lo puang hial tawh a, kum 2001 atang phei kha chuan kumtin Nilai leh beihrual Thupuiah Kristian Chhungkaw pual bikin hun siam a nita ziah a ni.

Kristian Chhungkua hi engnge ni? Enge a innghahna? Tunge a ban pawimawh a awm? Heng zawhna zawng zawng chhanna awlsam te chu thalaite, nakin lawka nupui pasal la innei mai tur te hi kan ni. Chuvang chuan Kristian Chhungkua hi KTP member te hian nupui pasal kan inneih hma atanga din tura hma kan laka kan inbuatsaih a tul hle a ni. Amaherawh chu KTP te hian Kristian Chhungkaw lamah hian rilru kan inpe tawklo hle niin ka hre thin. Biakin hawnga nupui pasal inneih hi kan thupui khel tawk a la nirih mai em aw tih theih a ni. Kristian Chhungkua hi thalaite hian kan ngaihtuah chian a va tul em!

Thalaitena kan inchhiarna a kan ngaih pawimawh ber leh member te kan inzirtirna ber pawh Kohhran Dan Thianghlima nupui pasal inneih hi a ni a, he tehfung hmang dik te chuan chawimawi an hlawh a, a hnulam erawh kan chhutzui pui peih vak tawhlo niin a lang. Kohhran Dan Thianghlima nupui pasal inneih hi a tha thlawt a, hemi ti thei tur hian KTP member te pawh hi kan infuih thar reng a tul. Amaherawhchu Kristian Chhungkaw din tura kan invil zui reng pawh hi a hun ta khawp mai, a chhan chu Kohhran Dan Thianghlima nupui pasal innei si fate enkawlna kawnga hlawhchham leh Kristian Chhungkaw din lo hi tam tak an awm a, hei hi tunlai khawvela kan harsatna tawh mek, kan siamthat hleihtheih siloh a ni.

Kohhran Hmeichhia ten Kristian Chhungkaw beihpui an thlak thin hi an titha in an fakawm hle mai, mahse Kristian Chhungkaw campaign a zan lama hmeichhia zawk an vakchhuak dun dun hi chu an kuang lo an nawr deuh ni hian ka hre thin. Inlama mahni chhungkua awpluma fate kawngdika zirtirtu tur awm tak khan fate chhuahsanin midang fate kan vei a, Kristian Chhungkua din turin midangte kan nawr a, keimahni lam kan indahtha fo thin. Nu tam zawk hi chuan hetianga vakchhuak kher lo hian mahni pasal fanau teah rawngbawlna tur hi kan nei tam si a, mahni pasal fanau te siamthat aia midang thisen zawmpui nilo te siamthat lama kan phur zawk tlat thin te hi a mak ka ti. Nitin chhung inkhawm neih leh neihloha Kristian Chhungkaw hlawhtlinna kan tehfung hi chu a famkim lo deuhvin ka hria. Nitin chhungkuaa Pathian biakna hun hman (Chhung Inkhawm) hi chu Kohhran mi leh ringtu kan nih chuan neih ngei ngei tur chi a ni a, Kristian Chhungkua tehfung ber erawh a nilo. Chhung inkhawm bak deuh hi Kristian Chhungkua a chhiar theih tur chuan tehfung dang kan hman tel a tha hle mai.

Kristian Chhungkaw Campaign hna thawktu tur leh veitu tur ber nia lang chu thalaite hi kan ni. Thalaite hian Kohhran kutke ni tura kan rawngbawlna leh member hla te hnuhhnaih tuma kan beih mek naah hian Kristian Chhungkua hi i vei telve teh ang u. Kristian Chhungkua hi tunlai khawvela KTP tena kan mamawh a ni. Kan thatlai hun, nupui pasal kan la inneih hma ngei hian Kristian Chhungkaw din turin rilru siam ila, nupui pasal kan inneih hnua kan chhungkaw khawsak dan tur rel fel ila, kan KTP member puite hnenah hian Kristian Chhungkaw din pawimawh zia te hi zirtir ila, Kohhran Dan Thianghlima nupui pasal innei tura kan member te kan fuih rual hian a dawt chiah ami Kristian Chhungkaw din tir tur hian theihtawp i chhuah thar teh ang u. Kan rama harsatna tam tak kan tawh thin hi Kristian Chhungkua awmlohna atanga chhuak vek a ni, chuvang chuan KTP te hian Kohhran Hmeichhia ten theihtawp chhuaha hma an lo lakna Kristian Chhungkhaw beihpui hi i thlak ve tak tak teh ang u, Kohhran Hmeichhe lam te nen tang hovin theihtawp chhuah ila a hlawhtlinnaah tun ai hian hma kan sawn ngei ang. Kan ram a him lo, kan Kristianna a him lo, kan khawtlang nun a himlo kan ti. Kan ram, kan hnam leh kan Kristianna a boral hma ngei hian KRISTIAN CHHUNGKUA atangin i siamtha ang u.

-         PC Laldinpuia

Serchhip Zion Veng

dinpuia@yahoo.com